خێرخوازەک دێ هاریکاریێن دراڤی ب سەر ٣٦٠ وەلاتیان بەلاڤ کەت
ئەڤرۆ نیوز، عەلی حاجی :
د کونگرەیەکێ روژنامەڤانی دا ئەڤرۆ ل رۆژا پێنچ شەمبێ ٣٠/٤/٢٠٢٠ ل باژێرێ زاخۆ رێڤەبەرێ گشتیێ چاڤدێری و گەشەپێدانا جڤاکی ل پارێزگەها دهوکێ دیار کر ب رێیا خێرخوازەکێ ل باژێرێ زاخۆ دێ کوژمەیەکێ پارەی ب سەر نێزیکی ٣٦٠ خێزانێن کێم دەرامەت دێ هێتە بەلاڤ کرن.
ل دور چاوانیا بەلاڤ کرنا وان هاریکاریا دکتور شێرزاد هروری گۆت: (پشتی د قوناغا ئێکێ دا باژێرێ دهوکێ ب رێیا هندەک خێرخوازان هاریکاری ب سەر هندەک خێزانان دا هاتینە بەلاڤ کرن بۆ قوناغا دویێ ژی ل باژێرێ زاخۆ ب رێیا خێرخواز دلێر حەجی مەشهود هاریکاری دێ ب سەر ٣٦٠ خێزانێن کێم دەرامەت دا هێتە بەلاڤ کرن کو بۆ هەر خێزانەکێ ژی دێ ٢٠٠ دولارێن ئەمریکی بن، ناڤ ژی ب رێیا لژنێن تایبەت هاتینە تومار کرن و ئەو کەسێن ناڤێ وان هاتینە تومار کرن ژ تەخێن کێم دەرامەتن و پێدڤی ب وان هاریکاریان هەیە و ئەڤرۆ رۆژا پێنجشەمبیێ دێ دەست ب بەلاڤکرنا وان هاریکاریان هێتە کرن).
ناڤهاتی ئەو چەندە ژی خویاکر ” هێڤی خازین کەسانێن دیترێن خێرخواز هاریکار بن دا کو ب رێیا مە بشێن هاریکاریێن دیترێن پارەی ب سەر وەلاتیان دا بەلاڤ بکەین”.
ژلایێ خوە ڤە هەر د وی کونگرەیێ روژنامەڤانی دا بوتان محسن قایمقامێ زاخۆ ئاشکەرا کر بۆ جارا دویێ دلێر حەجی مەشهود ب رێیا مە وەکو قایمقامیا زاخۆ هاریکاریان ب سەر خەلکێ دا بەلاڤ دکەت و خێرخوازێن زاخۆ ژی گەلەک هاریکار بوون دگەل مە دا و هەتا نوکە ژی ب رێیا مە هاریکاری ب سەر هەشت هزار خێزانێن کێم دەرامەت دا هاتینە بەلاڤ کرن و هەر دەما هندەک خێرخوازێن دیتر ژی هاریکاریان رادەستی مە بکەن دێ ب سەر وەلاتیان دا بەلاڤ کەین.
