خەلکێ زاخۆ رێزەکا تایبەت ل هونەرمەندان دگریت
بێوار حەمدی:
سترانبێژ( بێوار محەمەد شەریف) کو یێ ناسیارە ب بێوار زاخۆیی د دیدارەکێ دا گۆت: هەر ژ تەمەنێ 15 سالی وەرە سترانان دبێژم و ل سالا 2021 من بەرهەمەک دروستکر ب شێوەیێ ڕیکورد و پاشان ل سالا 2024 من کلیپەک چێکر ژ پەیڤ و ئاوازێن شێخ مەمی بناڤێ “کورتێ”.
ناڤهاتی د بەردەوامیا ئاخفتنا خوە دا گۆت: ب خوەشحالی ڤە خەلکێ زاخۆ رێزەکا تایبەت ل هونەرمەندان ب گشتی دگرن، لەوما ڤێ چەندێ وەکریە پتر گرنگیێ ب هونەرێ خوە بدەین و ئەز ب هەموو شێوازان سترانان دبێژم، لێ ستایلێ من پتر یێ شەهیانایە، بەلێ ب هەر شێوەیەکێ بیت ئارمانجامە خزمەتکرنا خەلکێ مە یێ خۆشتڤی یە و ژ بەر کو من گەلەک حەز ژسترانگۆتنێ دکر ڤێ چەندێ وەکر ئەز حەز ژ مۆزیکێ ژی بکەم، لەوما من خوە فێری ئامیرێن (عود و سازێ) کر بێی هاریکاریا هیچ کەسەکی.
ناڤهاتی ئەو چەندە ژی دازانین، ژێریا چێکری گەلەک کارتێکرن ل سەر هونەری ب گشتی هەبوویە، لێ گەلەک جاران مافێ پەیڤێ هاتیە خوارن و خەلک ژی بتنێ کەیفێ ب مۆزیکا وێ دبەن و گۆت: ب مخابنی ڤە ل کوردستانێ گەلەک گرنگی ب هونەری ناهێتەدان، هەتا کو هونەرمەندەک دچیتە بەردلۆڤانیا خۆدێ ژنوی بوهایێ وی دزانن، دڤێت خزمەت و پاڵپشتیەکا باش بۆ هونەرمەندان بهێتەکرن دا ئەو ژی بشێن پتر گرنگیێ ب هونەرێ خوە بدەن.
ل دووماهیێ ژی بێواری گۆت، ل دا پاشەرۆژەکا نێزیک من نیازا دروستکرنا کلیپەکا نوی هەیە ب ستایلێ شەهیانان، ب حەزکرنا خودێ دێ بدلێ هەموو خەلکێ مەیێ خۆشتڤی بیت، ژ بەر کو ئارمانجامە یا سەرەکی رازیکرنا وانە.
