داخویانیا بەرپرسەکێ بەرێ یێ ئەمریکا دبیتە جهێ دلگرانیا کوردێن رۆژئاڤایێ کوردستانێ
ئەڤرۆ
نوونەرێ بەرێ یی ئەمریکا بۆ کاروبارێن سووریێ راگەهاند چو بەرنامێن ئەمریکا بۆ ئاڤاکرنا هەرێمەکێ بۆ کوردان ل سووریێ نینە، دەمێ رەوشا سووریێ ئاسایی بیت دێ ئەمریکا هێزێن خۆ ژ سووریێ ڤەکێشیت، داخۆیانیا بەرپرسێ ئەمریکی بوویە جهێ دلگرانیا کوردێن رۆژئاڤایێ کوردستانێ و داخوازا دکەن هێزێن کوردی هەر زوی بەرەیەکێ ئاڤا بکەن.
جێمز جێفری نوونەرێ بەرێ یێ ئەمریکا بۆ کاروبارێن سووریێ راگەهاند، وان وەکو ئەمریکا ژ بۆ شەرێ ل دژی تیرۆرێ هاریکاریا هێزێن کوردی کرینە، هەتا مەترسیا داعشێ و گرۆپێن دی یێن تیرۆرستی ل سووریێ هەبیت بێگومان مەترسی بۆ ئەمریکا ژی هەنە، هەتا ئەو مەترسیە بەردەوام بن ئەمریکا دێ هاریکاریا هێزێن کوردی کەت، لێ ئەو یەک رامانا هندێ نادەت ئەمریکا دێ دەولەتەکێ یان ژی هەرێمەکا جودا بۆ کوردان ل سووریێ ئاڤا کەت و گۆت: (هەتا نها ژی ئەمریکا چو سۆز نەداینە کوردان، کو دێ بۆ وان هەرێمەکا تایبەت ل سووریێ ئاڤا کەت، هاریکاریێن ئەمریکا بۆ یەپەگێ و هێزێن سووریا دیموکرات هەتا نها ژی د چارچۆڤێ شەرێ ل دژی تیرۆرێ دا بوویە، ئەو یەک دێ بەردەوام بیت، چونکی هەتا داعش و گرۆپێن دی یێن تیرۆرستی ل سووریێ بمینن، ئەمریکا ژی دێ ل سووریێ مینیت، چونکی مەترسیا تیرۆرێ ل سەر ئەمریکا ژی هەیە).
ناڤهاتی د پشکەکا دی یا ئاخڤتنا خۆ دا ئاماژە ب هندێ ژی کر، مانا هێزێن ئەمریکا رامانا هندێ نادەت دێ هەتا هەتای هێزێن ئەمریکا ل سووریێ مینن، دەمێ قەیرانا سووریێ هاتە چارەسەرکرن وی دەمی چو رامانا هندێ نامینیت هێزێن ئەمریکا ل سووریێ بمینن، ئانکۆ ب کورتی مانا هێزێن ئەمریکا نها ل باکورێ سووریێ گرێدای رەوشا شەرێ ل دژی تیرۆرێ یە، دەمێ داعش و گرۆپێن دی یێن تیرۆرستی ژناڤ بچن، وی دەمی ئەمریکا دی هێزێن خۆ ژ سووریێ ڤەکێشیت و گۆت: (دڤێت هێزێن کوردی پرسێن هەی ل گەل شامێ چارەسەر بکەن، بەری نها ژی ئەمریکا پشتەڤانی ل دانوستاندنەکا وەسا کریە، لێ دیارە هەتا نها تشتەک وەسا نەهاتیە کرن).
د ڤێ دەربارێ دا دلاوەر کۆبانی چاڤدێرێ سیاسی راگەهاند، مخابن هەتا نها هێزێن سیاسی یێن کوردی ل رۆژئاڤایێ کوردستانێ نەشیاینە مفایەکا باش ژ هەبوونا هێزێن ئەمریکا ل باکورێ سووریێ و رۆژئاڤایێ کوردستانێ وەربگرن، تشتێ جێمز جێفری دبێژیت هەموو راستن، چونکی ئەمریکا چو دەمەکێ دەولەتێ بۆ کوردان دروست ناکەت، ئەمریکا بۆ بەرژەوەندیێن خۆ هاتیە سووریێ، ل ئیراقێ ژی وەسایە، ئەمریکا چو هەرێم بۆ کوردان دروست نەکرینە، بەلکو دڤێت کورد خۆ بۆ هەر ئەگەرەکێ بەرهەڤ بکەن، نها ل سووریێ و رۆژئاڤایێ کوردستانێ کوردان گەلەک قوربانی داینە، پشتەڤانیەکا باش د ئاستێ نێڤدەولەتی دا بۆ کوردێن سووریێ ژی هەیە، لێ مخابن هێزێن کوردی ئانکۆ هەر دو جڤاتێن کوردی یێن رۆژئاڤایێ کوردستانێ نەشیاینە هەتا نها پرسێن هەی د ناڤبەرا خۆ دا چارەسەر بکەن و گۆت: (دڤێت هەر دو جڤاتێن کوردی یێن رۆژئاڤایێ کوردستانێ هەر زوی دەست ب بزاڤەکا مەزن یا دبلۆماسی بکەن، دڤێت هێزێن کوردی پرسێن هەی چارەسەر بکەن و پێکڤە ل سەر بنەمایێ بەرژەوەندیێن نەتەوی کار بکەن، ئەو پشتەڤانیا باش یا بۆ کوردێن رۆژئاڤایێ کوردستانێ دشێت ببیتە پالدەرەک گەلەک بهێز، مخابن هێزێن کوردی ب جهێ هەڤکاریا هەڤدو بکەن بەردەوام دژبەریا ئێکتر دکەن، بەری نها ئەمریکا و فرەنسا ژی بێزاریا خۆ ل هەمبەر ناکۆکیێن د ناڤبەرا هەر دو جڤاتێن کوردی یێن رۆژئاڤایێ کوردستانێ دا دیار کربوون، هەکە کورد تشتەکێ بۆ خۆ نەکەن نابیت چاڤەرێی هندێ بن دێ ئەمریکا بۆ وان هەرێمەکێ یان ژی دەولەتەکێ ل سووریێ ئاڤا کەت، چو تشتێن وەسا نینن).
ل ئالیێ دی هژمارەک ژ چاڤدێرێن سیاسی یێن رۆژئاڤایێ کوردستانێ ژی دیار کرن، دەڤەرا رۆژهەلاتا ناڤین بەر ب گوهۆڕینێن مەزن ڤە دچیت، گوهۆڕینێن نها دێ کاریگەریەکا مەزن ل پاشەرۆژا کوردان ل سووریێ کەن، هەکە کورد خۆ ئامادە نەکەن و پرسێن هەی د ناڤبەرا خۆ دا چارەسەر نەکەن دێ رەوشا رۆژئاڤایێ کوردستانێ گەلەک خرابتر لێ هێت، چونکی نها بزاڤەکا مەزن ژ ئالیێ رۆسیا ڤە دەستپێکریە دا تورکیا و سووریێ پرسێن هەی د ناڤبەرا خۆ دا چارەسەر بکەن، هەر رێكکەفتنەک د ناڤبەرا تورکیا و سووریێ دا بهێتە کرن دێ ل دژی کوردان بیت، ئاساییکرنا پەیوەندیێن تورکیا و سووریێ بۆ رۆسیا گەلەک گرنگە، رۆسیا چو دەمەکێ پەیوەندیێن خۆ یێن گرنگ ل تورکیا ژ بۆ کوردان ناکەتە قوربانی، دڤێت هێزێن کوردی یێن رۆژئاڤایێ کوردستانێ ژی ل گۆر راستیا هەی سیاسەتێ بکەن.
