دادگه‌ها كه‌ركووك بڕيارا ده‌سته‌سه‌ركرنێ بۆ رێبوار ته‌له‌بانى ده‌ركر
ئه‌ڤرۆ نيوز، نيوار محه‌مه‌د سه‌ليم:
دادگه‌ها كه‌ركووك ياداشنامه‌ك بۆ ته‌ده‌سته‌سه‌ركرنا رێبۆرا ته‌له‌بانى، سه‌رۆكێ جڤاتا پارێزگه‌ها كه‌ركووك ب وه‌كاله‌ت ده‌ركر، ئه‌و ژى دبێژيت مه‌ره‌مێن سياسى ل پشتن و نه‌ڤێت جڤاتا پارێزگه‌ها كه‌ركووك كۆم ببيت.
رێبۆرا ته‌له‌بانى، سه‌رۆكێ جڤاتا پارێزگه‌ها كه‌ركووكێ ب وه‌كاله‌ت راگه‌هاند كو ل 16ى ئۆكتۆبه‌را 2017ێ دو ترۆمبێلێن حكومى د ناڤ مالا من دا هه‌بوون ل كه‌ركووك و ژ لايێ وان هێزان ڤه هاتنه دزين يێن هاتينه ناڤ باژێرى”.
گۆتژى: “وى ده‌مى ل دادگه‌ها هه‌ولێر و كه‌ركووك من سكالا تۆمار كربوو و ئاگه‌هدار كربوون كو ئه‌و دو ترۆمبێله هاتينه دزين، به‌لێ دادگه‌ها كه‌ركووك و ئه‌و دادوه‌ر كو هه‌ر ئه‌و دادوه‌رێ به‌رێ يه، ب مه‌ره‌مه‌كا سياسى و ب مه‌ره‌ما فرامۆشكرنێ ياداشناما ده‌سته‌سه‌ركرنا من يا ده‌ركرى”.
سه‌رۆكێ جڤاتا پارێزگه‌ها كه‌ركووك ب وه‌كاله‌ت ئاماژه ب وێ چه‌ندێ ژى دكه‌ت كو پارێزه‌رێ خوه راسپارديه ئه‌وان به‌لگان راده‌ستى دادگه‌هێ بكه‌ت يێن وى ده‌مى وى ب سكالا تۆماركرى.
ل دووڤ گۆتنێن رێبۆار ته‌له‌بانى “ئێكرێزيا پارتێن كوردستانى، نێزيك بوويه و ئێكه‌تى و پارتى و كێشا پارێزگارى هه‌موو ل سه‌ر وێ چه‌ندێ مايه جڤاتا پارێزگه‌هێ كۆم ببيت و بهێته كارا كرن، كه‌سێ ئێكانه ژى يێ بشێت وێ كۆمبوونێ بكه‌ت، سه‌رۆكێ جڤاتا پارێزگه‌هێ يه كو ئه‌زم، ژ به‌ر هندێ ئه‌ڤان كێشان دروست دكه‌ن دا كو كۆمبوون نه‌هێته كرن و هه‌تا پشتى هه‌لبژارتنان ره‌وشا كوردان ب وى ره‌نگى بمينيت”.
