داعش دانپێدان ب فرۆتنا كچان كر
ئه‌ڤرۆ نيوز:
د هژمارا خوه يا نوو يا گۆڤارا دابق دا، داعش ئاماژه ب وێ چه‌ندێ كريه كو ئه‌وان كچ و ژنێن ئێزدى برينه و ره‌ڤاندينه و هنده‌ك ژ وان فرۆتينه، ئه‌ڤه ژى ب دانپێدانا ئێكێ يا داعش دهێت ب ڤێ كريارێ.
ئه‌سۆشيه‌يت پرێس دياركر كو د ئێك ژ وان گۆتارێن د گۆڤارا دابق دا ب زمانێ ئنگليزى هاتينه به‌لاڤكرن دا هاتيه: “چه‌كدارێن ده‌وله‌تا ئيسلامى خێزانێن ئێزدى يێن عه‌بد يێن فرۆتين”.
زێده‌تر گۆت: “چه‌كدارن ژن و كچ يێن ژ زارۆيان جودا كرين ل ده‌مێ ده‌ست ب سه‌رداگرتنا شنگال ل هه‌يڤا هه‌شت”.
رێكخراوا هيومه‌ن رايتس ووتش ژى رۆژا ئێكشه‌مبى راگه‌هاند بوو كو ب سه‌دان ژن و زه‌لام و زارۆيێن ئێزدى ل عيراقێ د گرتيگه‌هێن به‌روه‌ختێن داعش دانه ل سوريا و عيراقێ و ب گۆره‌ى راپۆرتا رێكخراوێ دا هاتيه: “داعش ژن و كچ و زارۆ و سنێل يێن ژ خێزانێن وان جودا كرين و زۆرى يا لێكرى كو شوو ب چه‌كدارێن وان بكه‌ت”.
