داعش داوای 10 ده‌فته‌ر دۆلار ده‌كات ل به‌رامبه‌ر ئازادكردنی گه‌نجێكی كورد
ئه‌ڤرۆ نیۆز، عه‌زیز هه‌ورامی:
سه‌رچاوه‌یه‌كی تایبه‌ت به ئه‌ڤرۆ نیۆزی ڕاگه‌یاند” ئه‌و گه‌نجه كورده‌ی 15 ڕۆژ له‌مه‌وبه‌ر له ڕێگای ناحیه‌ی جه‌له‌ولا له‌گه‌ڵ 8 كه‌سی تر له‌لایه‌ن گروپێكی تیرۆرستی داعش فڕێندراوه به‌ناوی (هه‌ڵۆ نووری )دانیشتوی ناحیه‌ی زه‌ڕایه‌نی سه‌ربه‌قه‌زای شاره‌زوور، ئه‌مڕۆ 11/2/2020 كاتژمێر 12 بۆ 1ی نیوه‌ڕۆ ته‌له‌فۆنێك بۆ خانه‌واده‌كه‌ی دێت و كه‌سێك به‌زمانی عه‌ره‌بی قسه‌ده‌كات و خۆی به‌چه‌كداری داعش ده‌ناسێنێت، ده‌ڵێ، (هه‌ڵۆ نووری) لای ئێمه‌یه.
سه‌رچاوه تایبه‌ته‌كه وتیشی” ئه‌وكه‌سه‌ی خۆی به‌چه‌كداری داعش ناساندووه داوای 10 ده‌فته‌ر دۆلاری كردووه له به‌رامبه‌ر ئازاد كردنی گیانی (هه‌ڵۆ نووری) به‌ڵام پاش گفتوگۆییه‌كی زۆر ده‌ڵێ، ته‌نها به 7 ده‌فته‌ر دۆلار پێتان ده‌ده‌ینه‌وه.
هه‌ڵۆ نووری خه‌ڵكی ناحیه‌ی زه‌ڕایه‌نی سه‌ربه قه‌زای شاره‌زوور ته‌مه‌نی له نێوان 20 بۆ 21 ساڵ ده‌بێت و خێزانداره و هاوسه‌رگیری له‌گه‌ڵ كچێكی به‌ڕه‌گه‌ز عه‌ره‌ب كردووه، له ماوه‌ی ڕابردوو بۆ سه‌ردانی ماڵه خه‌زوورانی ده‌ڕوات بۆ جه‌له‌ولا و له‌گه‌ڵ 8 كه‌سی تردا ده‌كه‌وته سه‌یته‌ره‌یه‌كی چه‌كدارانی داعش و ده‌فڕێندرێن.
