داپیر و نەڤیێن وێ
دایەخان بۆتانی
بەری بگەهمە ڤێ قۆناغا ژیانێ، دەمێ من گوهـ ل دانعەمر و مەزنان دبوو دگۆتن: “زارۆک گویزە، لێ نەڤی کاکلە!”، یان دەمێ ئاماژە ب وێ گۆتنێ دکر ئەوا دبێژیت: “ژ زارۆکی شرینتر، نەڤیە”، من وەسا هزر دکر کو ئەڤە بتنێ زێدەرۆییەکا دەربڕینێ یە. لێ دەمێ بۆ ئێکەم جار من نەڤیا خۆ کریە د هەمبێزا خۆ دا و بێهنا وێ یا پاقژ چوویە د ناخێ من دا، من زانی کا خودای چ موعجیزەیەکا سۆز و دلۆڤانیێ کریە د دلێ داپیران دا.
هەستێ داپیربوونێ تشتەکێ جودایە؛ هەستەکە ب چ پەیڤان ناهێتە سالۆخدان. هەروەکو خودای دەلیڤەیەکا دی یا دایکینیێ دايه وێ، لێ ڤێ جارێ ب دلەکێ ئێمنتر و بێى فشارێن دەستپێکا گەنجاتیێ، پێشکێشی تە بکەت. داپیر وەسا هەست دکەت کو ئەڤ نەڤیە پارچەیەکە ژ گیانێ وێ، بەلکو جاران ژ بەر کووراتییا ڤێ ڤیانێ، گەلەک ب غیرەت و هەستیاری ڤە سەرەدەریێ ل گەل دکەت، تەنانەت دگەل دایک و بابێن وان ژی دکەڤیتە ململانێ کا کیژ پتر حەژێ دکەت! داپیر ئامادەیە هەمی داخوازیێن نەڤیێن خۆ بجھ بینیت، هەر تشتێ ب دلێ وان بیت بێ دوودلی بۆ بکەت، و چ جاران دلێ وان نەشکێنیت. نەڤی ژی ڤێ چەندێ زوی هەست پێ دکەن؛ وان باش یا زانی کو باوەشا داپیرێ، کانییا بێ مەرجا ڤیانێ و پەناگەها هەرە ئارامە ل دەمێ تەنگاڤییان.
دەمێ نەڤیەک نەخۆش دبیت یان بێتاقەت دبیت، دونیا ل بەر چاڤێن داپیرێ ڕەش دبیت؛ خەو ل چاڤێن وێ حەرام دبیت و ئەڤ برینە پتر ناخێ وێ دخۆت، جاران زێدەتر ژ دایکا زارۆکی ب خۆ! ئەڤە هەمی بەلگەیێن وێ ڤیانا پیرۆز و پاکن یا کو خودێ د دلێ مە دا چاندی.
لێ ڤێرێ پرسیارەکا هەستیارا هەژی تێهزرینێ هەیە: ئەرێ ئەڤ هەمی نازدارکرنه، د بەرژەوەندییا زارۆکی دایە؟ ئەرێ ئەڤ حەژێکرنا بێ سنوور نابیتە ئەگەرێ سستبوونا پەروەردێ و تێکچوونا کەسایەتییا وی و تێکدانا ڕەوشتێ وی؟
پێدڤیە ب وژدان دانپێدانێ ب وێ یەکێ بکەین کو زارۆک، هەر چەندە پێدڤی ب ئەڤین و سۆزێ یە، ب هەمان ئەندازە پێدڤی ب سنوور و ڕێنمایان ژی هەیە. ئەگەر داپیر ب ناڤێ “حەژێکرنێ” هەمی سنووران بشکێنیت و هەر شاشییەکا نەڤی دکەت بۆ جوان بکەت، زارۆک هێدی هێدی ژ قالبی دەردکەڤیت؛ دبیتە مرۆڤەکێ ڕککێش، خۆپەرست و بێ هەداری، کو باوەر دکەت پێدڤییە هەمی جیهان ل دویڤ حەزێن وی بزڤڕیت! ئەگەر ڤیان ب هوشمەندی نەهێتە ئاراستەکرن، دبیت ژ دەرمانەکێ شرین ببیتە ژەهرەکا نەدیار بۆ پاشەڕۆژا زارۆکی.
پەیاما من بۆ هەمی داپیرێن مە یێن جان و دلسۆز ئەوە کو ڕۆڵێ تە ل بەرامبەر نەڤیێن تە، گەلەک مەزنتر و پیرۆزترە ژ هندێ کو بتنێ ببیتە جهێ دانا شریناهییان و پڕکرنا بەرسینگێ وان ژ نازدارییان. باوەشا داپیرێ، پێدڤیە ببیتە ئێکەمین قوتابخانا ڕەوشتی و نیشتیمانی بۆ زارۆکی. دەمێ تە نەڤیێن خۆ ل دەورێن خۆ کۆم کرن، پێدڤیە وەکو مامۆستایەکی بی بۆ وان و فێر بکەى و هاریکاریا وان بکەى د خواندن و نڤیسینێ دا، ئەڤە هەمی ب شێوەیەکێ نەرم و سڤک.
ژ لایەکێ دی ڤە، ل شوینا شاشەیێن تەلەفۆنان، چیرۆک و سەرهاتیێن فۆلکلۆری یێن کوردی بۆ وان ڤەگێڕیت؛ وان فێری ڕێزگرتنا مەزنان و هەڤکاریێ و راستگۆییێ و جوامێریێ بکەت.
یا ژ هەمیێ گرنگتر، وی تۆڤێ پیرۆز د دلێ وان دا بچینیت کا ئەوان چەند پێدڤی ب پاراستنا ئاخ و وەلاتێ خۆ هەیە. بلا ژ دەڤێ تە ببهیسن کا ناڤێ “کورد” و “کوردستان” ب چ بهایەکێ گران و ب چ ڕەنجەکێ هاتیە پاراستن، دا کو هەر ژ زارۆکینیێ هەست ب شانازیێ بکەن ب زمانێ خۆ یێ شرینێ دایکێ و ب ناسنامەیا خۆ یا نەتەوەیی.
نەڤیێن مە، شتلێن نوی یێن جڤاکێ مەنە. بلا حەژێکرنا مە بۆ وان، نەبیتە بەربەست ل هەمبەر پێگەهشتنا وان، بەلکو بلا ببیتە ئەو ئاڤا زەلال یا کو وان دکەتە کەسایەتیێن خۆڕاگر و خودان ئیرادە.
خودایێ مەزن هەمی داپیرێن مە یێن دلۆڤان بپارێزیت، ئەوێن کو خانی و مالێن مە ب هەبوونا وان دبنە بهه‌شت، و بەرەکەتێ بێخیتە تەمەن و پاشەڕۆژا نەڤیێن وان، کو هیڤی و ڕۆناهییا سوباهییا وەلاتێ مەنە.
