دبلوماسیەتا حوكمەتا هەرێمێ و ڕاگرتنا بەلانسێ د ناڤبەرا وەلاتێن هەرێمی و جیهانی دا
عەبدولرەحمان مەحموود
د ڤان سالێن داویێ دا ب تایبەتی پشتی ڕوودانێن بهارا عەرەبی، ڕۆژهەلاتا ناڤەڕاست د كاودانەكێ دژوار و نەسەقامگیر دا دەربازدبیت و قەیران ل دویڤ قەیرانێ بەرەف دەڤەرێ دهێن و ڕۆژ ب ڕۆژ كاودان بەرەف ئالۆزیێن زێدەتر دچن، سەدەمێ ڤان هەمی نەهامەتیان بۆ وەلاتێن زلهێزێن جیهانێ ژلایەكیڤە و هندەك ژ وەلاتێن دەڤەرێ ڤەدگێڕیت، نەخاسمە ڕۆژهەلاتا ناڤەڕاست بوویە خالا پێكدادانا د ناڤبەرا هەردو جەمسەرێن ئەمریكا و هەڤپەیمانێن وێ ژلایەكیڤە، هەردیسا رۆسیا و ئیران و چین ژلایەكێ دیڤە، ئەڤە ژبلی شەڕ و هەڤڕكیێن تائیفی و مەزهەبی و ئایینی و تیرۆری ل دەڤەرێ، ژ ئەگەرێ ڤان قەیرانان گەلەك ژ وەلاتێن ڕۆژهەلاتا ناڤەڕاست تووشی كارەساتێن مەزنبوون، گەلەك ژ ناڤچان ب تەمامی وێرانبوون، میناك ڕژێما ئەسەدی ژناڤچوو، لبنان وێرانبوو، ژبلی ڤان زیانێن مەزنێن ب بەركەرتێ غەزە كەفتین ل فلستینێ و دیسا یەمەن خڕابتر و وێرانتر.
هەلبەت تایا ڤان گۆڕانكاریا ئیراق ژی ڤەگرت و ژ ئەگەرێ لاوازیا حوكمەتا ئیراقێ و بتایبەت دامودەزگەهێن وێ یێن ئەمنی و لەشكری و نەمانا ئینتیمایا لەشكرێ ئیراقێ بۆ دەولەتێ، ڕێكخراوا تیرۆریستی یا داعش سەرهلدا، هەر ژ ئەگەرێ لاوازیا لەشكرێ ئیراقێ، دەڤەرا شنگالێ كەفتە ژێر دەستێ ڤێ ڕێكخراوێ، مخابن زیانەكا مەزن بەر ب كوردێن ئێزدی كەفت و ئازارەكا كویر ب لاشێ هەر كوردەكی گەهاند، هندەك ژ وان لایەنێن ل ڕۆژهەلاتا ناڤەڕاست كو یاریكەربوون، تا نهاژی دگۆرەپانا هەڤڕكیان دانە، بزاڤێن ڕژد كرن كۆ كوردان تێكەلی ڤا ن هەڤڕكیێن لدەڤەرێ بكەن، ددەمەكی دا وەلێهاتبوو كۆ ڕۆژانە درۆن و موشەكێن خۆ ئاراستەی كوردستانێ دكرن و د كەلكەلا شەڕێ داعش دا وان دڤیا مۆڕالا پێشمەرگەی ب ڕۆخینن تاكو دەڤەرێن كوردستانێ بكەڤنە بن دەستێ وێ ڕێكخراوا تیروریستی، بەلێ ل دوماهیێ ب حیكمەت سەركردایەتیا سیاسیا كوردی و دبلوماسیا وێ خۆشبەختانە شیان كوردستانێ ژڤێ كێشمەكێشا دەڤەر كەفتییە تێدا بپارێزن و شنگالێ ژی جاردن ژ دەستێ تیرۆریستێن داعش ڕزگاربكەن و خەونێن دوژمنان ژی بوونە خوەلی و نەشیان وێ پیلانا بۆ ژناڤبرنا هەرێما كوردستانێ دانای جێبەجێ بكەن و حەزێن خۆ یێن چەپەل هەمبەر خاك و خەلكێ كوردستانێ بجه بینن، دزانین د وان چەند سالێن چوویی دا تیرۆریستێن داعش ژلایەكیڤە و میلیشیاتێن شیعەیان ژلایەكێ دیڤە د وی پەڕێ بهێزیێ دابوون و مەترسیەكا مەزنبوون لسەر دەڤەرێ، ئەو قۆناغە مەترسیدارترین قۆناغ بوو د دیروكا ڕۆژهەلاتا ناڤەڕاست دا و خەتەرناكترین كاودانبوون گەلێ كورد كەفتییە تێدا، لێ سەركردایەتیا سیاسیا هەرێما كوردستانێ ژ وێ سیاسەتا وانا ل ئاست ڤان گوهۆڕینان و بێلایەنیا گەلێ كورد ژ وان هەڤڕكیێن دەڤەر كەفتییە تێدا، شیان هەرێما كوردستانێ ژ وێ قۆناغا مەترسیدار بپارێزن، نوكەژی ئاگرێ ڤی شەڕێ وێرانكەرێ ل دەڤەرێ خۆشبووی خوەشتر لێدهێت و باسێ هێرشا ئەمریكا و ئیسرائیل بوسەر ئیران و ئیراقێ هەیە و زۆر ب ڕۆنی باسێ گوهۆڕینا نەخشێ زۆر وەلاتێن ناڤچێ دهێتە كرن، خۆشبەختانە حوكمەتا هەرێما كوردستانێ و دبلوماسیەتا وێ یا سەركەفتی ل هەمبەر وەلاتێن هەرێمی، شیاینە ئاگرێ ڤی شەڕی ژ ئاخا هەرێمێ دویربێخن و چو مەترسی و هەرەشەیەك لسەر هەرێما كوردستانێ نینە و ب ئانەهیا خۆدێ و خۆڕاگریا خەلكێ وێ پاشەڕۆژەكا ڕۆن و پڕشنگدار چاڤەڕێی گەلێ مە دكەت.
