دخوازین هەتا حەفتییا بهێت بگەهینە رێككەفتنێ ل گەل بەغدا
ئەندامەكێ شاندێ دانوستاندكارێ هەرێما كوردستانێ ل گەل حوكمەتا ئیراقا فیدرال راگەهاند، دخوازین هەتا حەفتییا داهاتی ل گەل بەغدا، ل دۆر داهاتێن نە پەترۆلی بگەهینە رێككەفتنێ.
نیڤرۆیا دوهی چارشەمبی 20/8/2025، كۆمبوونا شاندێ حوكمەتا هەرێما كوردستانێ ل بەغدایێ، ل گەل تەیف سامی، وەزیرا داراییا ئیراقێ ب دووماهی هات كو تایبەت بوو ب دانوستاندنێ ل دۆر رادەستكرنا داهاتێ نە پەترۆلیێ هەرێما كوردستانێ.
فارس عیسا، سەرۆكێ نوونەرایەتییا حوكمەتا هەرێما كوردستانێ ل بەغدایێ د داخۆیانییەكا رۆژنامەڤانیدا گوت» كۆمبوونا مە یا باش بوو».
فارس عیسا گوت ژی» پێشڤەچوونەكا باش د كۆمبووناندا هەبوو و دخوازین د دەمێ حەفتییەكێدا ل سەر پرسا داهاتێ نە پەترۆلی بگەهینە رێككەفتنێ».
ل دووڤ پێزانینان، ل دەستپێكا حەفتییا داهاتی شاندێ هەرێما كوردستانێ دێ زڤریتە بەغدا و دێ درێژیێ ب دانوستاندنێت خوە دەن، تاكو بەری كۆمبوونا جڤاتا وەزیرێن ئیراقێ یا حەفتییا داهاتی رەشنڤیسا دووماهیێ بەرهەڤ بكەن.
دهێتە زانین ل رۆژا سێشەمبییا بۆری 19/8/2025، جڤاتا وەزیرێن ئیراقێ كۆمببوو و پاشی د بەیاننامەیەكێدا راگەهان، جڤاتا وەزیران بڕیار دایە ب شێوەیەكێ بنەڕەتی رازیبوونێ ل سەر نووكرنا كاركرنێ ب بڕیارا هەژمار 550 یا سالا 2025 بدەت بۆ دابینكرنا پارەیێ فەرمانبەرێن هەرێما كوردستانێ بۆ مەها خزیرانێ، پشتی ل بەرچاڤ وەرگرتنا ڤان خالێن ل خوارێ:
-ئەو لژنەیێن بۆ دانوستاندنێ ل دۆر رادەستكرنا داهاتێ نە پەترۆلی و هنارتنا پەترۆلا هەرێما كوردستانێ هاتینە پێكئینان، كارێن خوە تمام بكەن، ب مەرجەكی هەر ئێك ژوان كۆنووسەكا ئیمزاكری د دەمێ هەفتییەكێدا، پێشكێشی جڤاتا وەزیرێن ئیراقێ بكەن.
-ئەو تیمێن ب گۆڕەی بڕگەیا دوی هاتیە پێكئینان، د دەمێ حەفتییەكێدا كارێن خوە تمام بكەت، ب هەژمارتنا پشكا گەنجینەیا گشتییا فیدرالی ژ داهاتێن نەپەترۆلی یێن هەرێما كوردستانێ ب گۆڕەی قانوونێ. هەروەسا حوكمەتا هەرێما كوردستانێ وێ پشكێ بدەت ل شوونا وی گۆژمێ پارەی كو ل بڕگەیا (دو/1) ژ بڕیارا ئاماژە پێكری، ب مەرجەكی میكانیزما هەژمارتنێ ژ ئالیێ وەزارەتا دارایی فیدرالی و دیوانا چاڤدێرییا دارایی فیدرالیڤە یا پەسند كری بیت.
-حوكمەتا هەرێما كوردستانێ، كۆمپانیێن پەترۆلی كو ل هەرێما كوردستانێ كاردكەن، پێگیر بكەت ب رادەستكرنا وێ پەترۆلا دهێتە بەرهەمئینان، ب گۆڕەی بڕگەیێن قانوونا بودجەیا گشتییا فیدرالی و بڕیارا هەژمار 550 یا سالا 2025 یا جڤاتا وەزیران.
