دلخاز مووسا: جلوبەرگێن ئەردەوان زاخۆیی و ئەیاز یوسڤی ل مۆزەخانا زاخۆ هاتنە دانان
دلخاز مووسا، ڕێڤەبەرێ ڕەوشەنبیری و هونەری ل ئیدارەیا سەربخوە یا زاخۆ بۆ ڕۆژناما ئەڤرۆ دیارکر کو ب هەلکەفتا بیرەوەریا وەغەرکرنا هەر دوو هونەرمەندێن کورد ستێرێن نەمر ئەردەوان زاخۆیی و ئەیاز زاخۆیی ل ژێر چاڤدێریا گوهدار شێخۆ سەرپەرشتێ ئیدارەیا سەربخوە یا زاخۆ، د ڕێورەسمەکێ تایبەت دا جهێ پاراستنا جلوبەرگێن هەر دوو هونەرمەندان ل مۆزەخانا زاخۆ هاتە ڤەکرن.
ناڤهاتی ئاماژە ب وێ چەندێ ژی کر کو ئەڤ جلوبەرگە ژ لایێ مالباتا وێنەگرێ خودێ ژێ ڕازی یێ دهۆکێ تەوفیق عەبدوللا حەسەن ڤه هاتبوونە پاراستن و هاتینە پێشکێشکرن بۆ مۆزەخانا زاخۆ، دا کو خەلکێ زاخۆ و گەشتیارێن نافخۆ و بیانی ڤان جلوبەرگان ببین، هەر دیسان دا نڤشێ نوو بزانیت هونەرمەندێن مە بۆ ئەنجامدانا کارەکێ هونەری گەلەك ڕەنج و زەحمەت دکێشا.
گۆت ژی:» ئەڤ جلوبەرگە ژ لایێ وێ خێزانێ ڤە هاتبوونە پاراستن چونکی ل دەمێ کو هونەرمەند ئەردەوان زاخۆیی و ئەیاز یوسڤ بۆ کارێ کلیپ کرنا سترانەکێ یان ژی چوونا ئاهەنگ و شەهیانەکێ دچوو دەف وێ خێزانێ جلوبەرگێن خوە ل بەر خوە دکرن و بەرەڤ کارێ خوە دچوون، پشتی ژ کارێ خوە ب دوماهیك هاتبا جارەکا دی دچوونە وێ مالێ و جلوبەرگێن خوە ڕادەستی وێ خێزانێ دکرن، لەوڕا هەتا ئەڤرۆ ل دەف وان هاتبوونە پاراستن».
