دلگه‌ش محه‌مه‌د: تایكواندۆیا كچێن زاخۆ چوویه د قۆناغه‌كا باشتر دا
عەلی حاجی:
د داخویانیه‌كێ دا ڕاهێنه‌رێ تیما تایكواندۆیا یانه‌یا زاخۆ گه‌شبینییا خوه دیار كر بۆ سالا بهێت دێ ل سه‌ر ئاستێ كچان یاریزانێن باشتر هێنه دیتن، ئه‌ڤ چه‌نده هات پشتی یاریزانه‌كا زاخۆ شیایی بۆ جارا ئێكێ رێزا سێیێ ل سه‌ر ئاستێ ئیراقێ بهێت، د هه‌ڤڕكیێن واندا ئه‌وا ل حه‌فتییا بۆری ل پایته‌ختێ ئیراقێ به‌غدا هاتیه كرن ئه‌وا ب پشكدارییا 52 یانه‌یان ل سه‌ر ئاستێن جود هاتییه كرن.
زێده‌تر دلگەش محەمەد بۆ رۆژنامەیا ئەڤرۆ دیار کر تیما وان ب دو یاریزانان ل سەر ئاستێ پێشکەڤتیان پشكداربوون كو ب تیما زاخۆ یا کچان پشکداری قارەمانیا ئیراقێ بۆ یاریا تایکواندۆیێ بووین و گۆت: هه‌ردو یاریزانێن مه ئێخلاس شوکری و شرین سەعید بۆ کێشه‌یێن جودا پشکداربوون و هەتا ڕادەیەکێ هەڤرکیێن وێ قارەمانیێ ب هێز بوون ژبەر کو هەموو تیمێن ئیراقێ پشکدار ببون، کچا زاخۆ ئێخلاس شوکری ل سەر کێشەیا 62 کێلوگرامی شیا رێز سیێ د قارەمانیێ دا ب دەستڤە بینت و بۆ ئێکەم جارە بشێت ڤێ پلەیێ ب دەست ڤە بینیت.
ناڤبری گۆت ژی: هه‌رچه‌نده گه‌شبین بووین ئه‌نجامێن باشتر بینن لێ ب ده‌ستڤه ئینانا رێزا سێیێ و بۆ جارا ئێكێ ل سه‌ر ڤی ئاستی پشكداربین پێنگاڤه‌كا باشه و تیما زاخۆ چوویه د قۆناغه‌كا باشتر دا كو دێ دگه‌ل كارگێریێ كار كه‌ین ژبۆ پێشڤه‌چوونا ڤێ یاریێ ژبه‌ركو دەستەیا کارگێریا یانەیا زاخۆ پشتەڤانیەکا تمام ل تیما مە کر و گه‌شبینن د قارەمانیێن بهێت دا دێ هەڤڕکیا رێزا ئێکێ ئێکێ کەین.
