دهۆك و زاخۆ دوور ژ جەماوەرێن خوە دێ بزاڤێن سەركەڤتنان كەن
قەیس وەیس:
چاڤەڕێ دهێتە كرن ئەڤرۆ پێنچ یاریێن مایی ژ هەڤڕكیێن گەڕا 31ێ یا خولا ستێرێن ئیراقێ یا فوتبۆلێ بهێنە كرن ژ وانا هەر چار یانەیێن كوردستانی، دهۆك، زاخۆ، هەولێر و نەورۆز، ژلایێ خوەڤە یانەیا كارەبا دێ یانەیا كەرخ مێڤان كەت.
سەركەڤتن تاكە چارەسەرییە
بڕیارە ئەڤرۆ ل دەمژمێر 7:30 شەڤ تیما یانەیا دهۆك ببیتە مێڤانا یانەیا نەجەف د یارییەكا گرن گدا بۆ ئەلهۆیێن چیا، ئەوا بۆ یارییا چوارێ یە ل دووڤ ئێك نە شیایە دلێ جەماوەرێ خوە خۆشبكەت، دێ بزاڤێ كەت دڤێ یاریێ دا گەشبنیێ بۆ پەیدابكەت، د نوكە دا دهۆك ل ڕێزا 12ێ دهێت ب كۆمكرنا 38 خالان، ژ 10 سەركەڤتن، هەشت وەكهەڤی، 12 خوسارەتی هەنە، یاریزانێن وێ 31 گۆل تۆماركرینە لێ 33 گۆل ل سەر هاتینە تۆماركرن، ژلایێ خوەڤە یانەیا نەجەف ئەوا ل ڕێزا 19ێ و بەری دووماهیێ دهێت ب كۆمكرنا 15 خالان.
زاخۆ چاڤ ل سێ خالێن دی یە
ژلایەكێ دووڤە یانەیا زاخۆ دێ ل یاریگەها كەرخێ بیتە مێڤانا یانەیا نەفت یا بەغدایی ل دەمژمێر پێنجێ ئێڤاری، كوڕێن خابووری ل گەڕا بۆری سەركەڤتنەكا گرنگ و یا مەعنەوی ئینابوو پشتی ژ كۆپا كەنداڤی دەركەڤتی و تا ڕادەیەكی هزرا یاریزانان ماییە د خولا ستێرێن ئیراقێ دا، تیما زاخۆ ل ڕێزا حەفتێ مۆكمتر لێكرن ب 50 خالان ژ 14 سەركەڤتن، هەشت وەكهەڤی و حەفت خوسارەتیان، 26 گۆل ڤەڕێژا گۆلێن یاریزانێن زاخۆیە دبەرانبەردا 38 گۆل ل سەر بووینە، ژلایێ خوەڤە یانەیا نەفت 38 خال هەنە ل ڕێزا 11ێ دهێت.
هەولێر و تەلەبە شەڕێ
ڕێزبەندیێ یە
هەر ژ یاریێن ب هێ زیێن یانەیێن كوردستانی چاڤەڕێ یە ئەڤرۆ ل دەمژێر 7:30 شەڤ یانەیا هەولێر ل یاریگەها ئەلمەدینە ببیتە مێڤانا یانەیا تەلەبە یا بەغدایی ئێك ژ یاریێن گۆپیتكا هەڤڕكیێن ڤێ حەفتیێ دا، تیما هەولێریان ئەوا دگەل خودانا سەرێ لیستێ جەوییە وەكهەڤبووی دێ بزاڤێ كەت ئەنجامەكێ باش دگەل تەلەبە ژی بینیت، ئەوا دنوكە دا 60 خال هەنە ل ڕێزا سێیێ دهێت، هەڤڕكا وێ تەلەبە 58 خال هەنە ل ڕێزا چارێ دهێت.
نەورۆز بەرانبەر سەركێشا خولێ یە
ژلایێ خوەڤە یانەیا نەورۆز دێ ل یاریگەها خوە یانەیا جەوییە سەركێشا خولێ ل دەمژمێر پێنجێ ئێڤاری مێڤان كەت، ئەركێ یانەیا باژێرێ سلێمانیێ ب زەحمەتە ئەوا ل ڕێزا نەهێ دهێت ب كۆمكرنا 43 خالان ژ13 سەركەڤتن، چار وەكهەڤی د بەرانبەردا 13 خوسارەتی هەنە، ژلایێ خوەڤە یانەیا جەوییە سەرێ لیستێ دهێت ب كۆمكرنا 70 خالان.
وەحید رەشید شرۆڤەكرنا هەر چار یاریان بڤی شێوەیی دایە
لدۆر یاریێن یانەیێن كوردستانی وەحید رەشید شرۆڤەكارێ وەرزشی و شارەزایێ ڕاهێنانێ ل پارێزگەها دهۆكێ بۆ ڕۆژنامەیا ئەڤرۆ گۆت: دەستپێكێ هیڤییا مە ئەوە یانەیێن كوردستانی ب سەركەڤن و ڕێزبەندیێن باش ب دەستڤە بینن.
لدۆر یارییا زاخۆ گۆت: پشتی دەركەڤتنا تیما زاخۆ ژ كۆپا كەنداڤی پێدڤی ب سەركەڤتنەكێ بوو هەتا ژ گڤاشتنێن دەرۆنێ دەرباز ببیت، خۆشبەختانە سەركەڤتنا گەڕا بۆری دگەل كارەبا ئەو گڤاشتن نە مایە و دێ ب مۆرالەكا بلند هێتە دناڤ یاریێ دا، لێ ڕامانا وێ ئەو نینە یاری ب سانەهی نابیت تایبەت دگەل یانەیەكێ دێ دناڤ ئەردێ خوە دا كەت و بزاڤا وان خۆ ژ داكەڤتنێ قۆرتالبكەن.
ڕاهێنەرێ تیمێ خودان ئەزموونە د خولێ دا و دشێن سەرەدەریێ دگەل یاریێ بكەن، سێ خالێن یاریێ گەلەك گرنگن و پێدڤینە، هەرچەندە ئێدی هەر یارییەك بۆ هەموو تیمان د گرنگن، شێوازێ یارییا یانەیا نەفت یا گرتییە بزەحمەت گۆل ل سەر بهێنە تۆماركرن، لێ د باوەرێ دامە هەكە زاخۆ ل دووڤ ئاستێ یارییا كەنداڤی بكەت دێ سێ خالان ب دەستڤە ئینیت و هیڤییا بەختەكێ باش بۆ كوڕێن خابۆری.
لدۆر یارییا دهۆك و مێڤاندارا وێ نەجەف ناڤهاتی گۆت: وەكو دیار ڕەوشا دهۆكێ یا ئارام نینە، هەر ژ گوهۆڕینا ڕاهێنەران هەتا گەهشتییە ئەحمەد خەلەف ئەوێ لدووڤ ئەنجامان هەتا نوكە یێ سەركەڤتی نینە دگەل دهۆكێ كو سەرجەمێ حەفت یاریێن بۆری ب سەرپەرشتییا وی بتنێ سەركەڤتنەك و دو وەكهەڤی هەنە و چار خوسارەتی و ئەڤ ئەنجامە ژی جەماوەر دلتەنك كرینە، دێ یاریێ بەرانبەر یانەیەكێ كەت ئەو یا د داكەڤتنێ دا، هێشتا دەلیڤە بوو مایە هەكە بشێت سەركەڤتنێ بنیت و مفایی ژ ڕەوشا دهۆكییان وەربگریت.
هەروەسان ناڤهاتی گۆت: سەرباری یارییا بۆری وەكهەڤبوو لێ ئاستێ وێ دلخوەشكەربوو، بتنێ شاشیێن كەسۆكی و نە مفا وەرگرتن ژ دەلیڤەیان نەشیان بسەركەڤن، هەرچەندە یاری ب زەحمەتە لێ گەشبینم دهۆك دێ سێ خالان دەستڤەئینیت و پێدڤییە ژی ژبۆ دوبارە پێشڤەچوونێ، هیڤییا مە ئەوە دهۆك ژی ب سەركەڤتن ڤەگەڕیت، سەركەڤتن دێ ل بن گڤاشتنان ڕاكەت و ڤەگەڕیتە.
لدۆر یارییا هەولێر و تەلەبە گۆت: كەیفخوەشین ب ڕێزبەندی و ئەنجامێن هەولێرێ وەكو ئێك ژ یانەیێن كوردستانی د ناڤ خولێ دا، ب هیڤی نە بەردەوامبن پێخەمەت بشێن پلێتەكا قارەمانییا دەرڤە ب دەستڤە بنیت، لێ ئەو ڕەوشا نوكە یا دارایی نە ئارامییەك دناڤ كادرێ راهێنانێ و یاریزانان دا پەیداكرییە، بهیڤینە ئەو ڕەوشە كارتیكرنێ ل سەر ئەنجامێن وان نەكەت، خالێن سەركەڤتی یا تیما هەولێر بۆ ڕاهێنەرێ وان باسم قاسمی ڤەدگەریت خودان شیان و سەربۆرە، دەلیڤەیەكا كێم بۆ هەولێرێ ماییە بۆ پێشڤەچوونێ لێ یارییا وێ یا ئەڤرۆ ئێك ژ ئاستەنگێن مەزنە بۆ ڤێ دەلیڤێ.
