ده‌ڤه‌را به‌هدینان گه‌نجیه‌نه‌كا فولكلۆری ژ ده‌ست دا
ئامێدیێ، مه‌حمود نهێلی
هه‌لالا به‌رچی ده‌نگبێژا به‌رنیاسا ده‌ڤه‌را نهێلێ، د ژیێ 92 سالیێ دا وه‌غه‌را دووماهیێ كر و گه‌نجینه‌كا سترانێن فۆكلۆری ل گه‌ل خوه بن ئاخ كرن.
عه‌بدولره‌زاق نهێلی، برازایێ وێ ده‌نگبێژێ بۆ رۆژناما ئه‌ڤرۆ دیار كر كو هه‌لالا به‌رچی 84 سالان خزمه‌تا فۆكلورێ ده‌ڤه‌رێ كریه، چنكو د ژیێ هه‌شت سالیێ دا ستران گۆتینه، ژوانا حه‌یرانوك، پیره پایزۆك، لاڤژه و چیرۆك و چیڤانۆك، ده‌هوات، و گه‌له‌ك ته‌وه‌رێن دی، له‌ورا ژ ده‌ست دانا وێ زیانه‌كا مه‌زن بوو ل ده‌ڤه‌را به‌هدینان، چنكو ئه‌و نه‌به‌س سترانبێژ بوو، به‌لكو فۆكلۆرناس ژی بوویه.
ئێك ژ قوتابێن وێ ب ناڤێ زه‌هرا به‌رچی دبێژیت: من ژیێ خوه ل گه‌ل بۆراندیه و گه‌له‌ك ستران و لاڤژه و حه‌یرانوك ژێ گرتینه، لێ ئه‌ز چ جاران نه‌شێم بگه‌همه وێ قوناغێ یا هه‌لال گه‌هشتیێ.
هه‌لال عه‌لی حاجی، به‌رنیاس ب (هه‌لال به‌رچی) ل سالا 1930 ل گوندێ به‌رچی یێ ده‌ڤه‌را نهێلێ ژ دایكبوویه و هه‌ر ل زارۆكینیا خوه ستران گۆتینه و پشكداری د چه‌ندین ڤیسته‌ڤالێن ده‌ڤه‌رێ و كوردستانێ دا كریه و چه‌ندین خه‌لاتێن رێزگرتنێ وه‌رگرتینه، ب مخابنی ڤه ل رۆژا 1/5/2022 د ژیێ 92 سالیێ دا وه‌غه‌را دووماهیێ كریه و ل گۆرستانا گوندێ به‌رچی هاتیه ڤه‌شارتن.
