دویماهیک بهار
ئارین عیسا عبدولڕەحمان
دیسان و وەکی هەرشەڤ من بارێ هزران کرە پشتا خوە و گەشتەک بۆ جیهانەکا نەدیار کر، من هند دیت چاڤێن من کەڤتنە سەر ئێک و د جیهانەکا دیتردا نقۆ بووم، من هیڤی دخواستن ئەڤ جارە بهارا ژییێ من قەستا من بکت و دەست بکتە دلێ من، بهارەکا ڕەنگاوڕەنگ بیت، یا پڕبیت ژ گولبەرۆژان ل هنداڤ ئاسمانەکێ شین و وەکی خەونێن من جیهانەکا تژی ژ جوانییا ڕەنگێ زەر و شین بیت، من ددیت ڕێکەکا نەخشاندی ب گولبەرۆژ، نێرگز و گول نەسرینان، هەتاڤەک وەکی پاشەرۆژا من یا گەش و نەدیار ل هنداڤ سەرێ من بوو و کانییێن ئاڤێ ل هەر ئالییەکێ لێ زڤڕیبام د برسقین، ئاوازێن چویچک و بلبلان دلێ هەر تشتەکێ ل ئەوێرێ خوەش کربوو و هەمییان ل گەل ئاوازێن ئەوان سەما دکر، گولان دەستێ ئێک گرتبوون و گۆڤەندەکا ئاشقانە گرێدابوون، هەر تشت د ناڤ ئەوێ جوانییێدا مەست ببوو. ل ژێر پێیێن من ئەردەکێ نەرم وەکی ئاڤرمیشی هەبوو هەر وەکی ب پێیێن منڤە ماچی دکر، بای هێدی هێدی و ب نازکی ب ڕویێ منڤە ماچی دکر، هەر داروبار و گولەکێ ئەز ب توندی هەمبێزدکرم دێ بێژی بیست و دو بهارێن ژییێ خوە من ل ئەڤێرێ یێن بۆراندین، هەر تشتەکی ناڤێ من دئینا و دگۆت دلاڤین، ئەی کچا ببەخت تو ژ هەژی هەر باشییەکێی تو یا پیرۆزی ئەڤجا بگڕنژە و خوەشییێ ژ هەر خۆلەکەکێ ببە، ل ئالیێ دی سیتاڤکەک دیاردبوو و کەسەکێ گازی من دکر و دگۆت دلاڤین وەرە و نێزیکی من ببە، ئەرێ ما تو ژ هەمبێزا ئێکەم خوەشتڤییێ خوە خەریب نەبوویە! ئەرێ تو ژ دەستگرتنا من خەریب نەبوویە ل دەمێ دەستێن تە یێن بچویک دناڤ دەستێن من یێن مەزندا بەرزەدبوون، ئەز هێدی هێدی نێزیک دبووم ل گەل هەر پێنگاڤەکا ئەز نێزیکببام ئەو دویرتر دچوو و ئەوێ بهارێ خەمل و جوانییا خوە ژ دەستددا، لێ ئەز پاشڤە نەزڤڕیم گەلەک نێزیکبووم دەملدەست بایەکێ دژوار هات و ئەز بهێز پاشڤەبرم و ئەز ل دۆرێن خوە زڤڕیم چ بهار، چویچک و گول نەماینە..! ژ نشکەکێڤە دەنگەکێ د گوهێ مندا دەنگڤەددا و دگۆت: بزڤڕە، جهێ تە دناڤ جیهانا خەوناندا نینە و ئەڤ بهارە مولکێ کەسێ نینە.
