دو كنچیڕۆك
بلند محەمەد
١
ل سەر پەیسكێ یێ روونشتی بوو، گولەك د ناڤ دەستان دا بوو و ب سەرێ تلان پەڕێن وێ دگرتن. ب نازكی دەستێ خوە ڤێڕا دئینا و د بر. پرسیار ژ خووشكا خوە كر:
– ئەرێ، رەنگێ وێ یێ جوانە؟
خووشكا وی كرە كەنی و گۆتێ: رەنگێ وێ یێ سپی یە.
بشكوڕی و گۆت: ئەزێ هەست پێ دكەم یا ل گەل من دكەتە كەنی.
٢
زاڕۆكان، خوە د ئاڤێ د ئێخستن و مەلەڤانی دكرن. ئەو ل سەرێ گڤاندێ بوو و گوهدانا بلقێن ئاڤێ و شەپڕەپا دەستێن زاڕۆكان دكر كو د ناڤ ئاڤێ دا مەلەڤانی دكرن و تلپێن ئاڤێ لێك د قولپاندن.
د خەیالێ دا، خوە ئێك ژ ئێخستیێن ئاڤێ دیت و هەست ب شلبوونا پرچا خوە كر. دەستێن خوە وەكو پەیداران د لڤاندن.
زارۆك ژ ئاڤێ هاتنە دەرێ و ل سەرێ گڤاندێ ل نك وی روونشتن.
ئێكی گۆت: دێ بۆ هەوە تشتەكی بێژم كا كی دێ زانت چ تشتە؟
هەموویان گۆت: ئێ.
وی گۆت: ئەو چ تشتە سەر هەیە و مەژی نینە؟
هەر ئێكی تشتەك گۆت و چ بەرسڤێن دروست نەهاتنە دان.
ئەوی داركێ خوە لڤاند و گۆت: ئەو تشتە ئەوە ئەوێ ئەڤ پرسیارە كری.
هەموویا پێ كرە كەنی و تژی وی دەراڤی بشكوڕین و خۆشی كرن.
وی ژی داركێ خوە ل ئاخێ ددا و هەر دكەنی و دكەنی و هەتا جارەكێ دەنگێ خووشكا وی هاتیێ و گۆتیێ:
-كوردۆ.، تە خێرە هۆسا دكەنی؟!
داركێ خوە ل دۆر خوە لڤاند، لێ هەست ب چ كەسەكی ل دۆر خوە نەكر.
