دو ناسناڤ بۆ پارێزگەھا دھۆکێ بدەستڤەئینان
ئەڤرۆ نیوز، محەمەد عەلی نوری:
کچێن ھەلبژارتیێ پارێزگەھا دھۆکێ شیان دو ناسناڤا و رێزا سیێ یا قارەمانیا عیراقێ بۆ یاریا تێنسا ئەردی ب دەستڤەبینن، پشتی د ھەڤرکیێن واندا ئەوا ئەڤرۆ ل یاریگەھێن ئەکوا پارک ل ھەولێرا پایتەخت ب پشکداریا ٤٥ یاریزانا ژ ١٢ پارێزگەھێن جودا یێن عیراقێ ھاتینە ئەنجامدان، تێدا پێنچ یارزانێن پارێزگەھا دھۆکێ پشکداربوون و ئەنجام بڤی رەنگی بوون.
ل سەر ئاستێ ١٠ سالی ھانا ئاڤدەل ناسناڤێ قارەمانیێ بدەستڤەئینا، لسەر ئاستێ ١٢ سالی خووشکا وێ لارا ئاڤدەل ناسناڤەکێ دی ئینا، ژلایەکێ دیڤە ھەڤالا وێ لاڤین عابد رێزا سیێ بدەستڤەئینا.
لدور ڤان ئەنجاما ئاڤدەل حەسەن راھێنەرێ ھەلبژاتیێ پارێزگەھێ و یانا دھۆک بۆ ئەڤرۆ نیوز گوت: پێخووشحالین یاریزانێن مە شیان ئەنجامێن باش و سەرکەفتی بدەستخوەڤەبینن، سەرباری ھەبوونا ھەڤرکیەکا دژوار دناڤبەرا یاریزانا دا، ھەر پێنچ یاریزانێن مە ئاستەکێ مەزن نیشان دا و بوونە جھێ حێبەتیێ و پووتەدانا ھەموو حازربوویا.
ژلایەکێ دیڤە ناڤھاتی ئەڤ چەندە ژی دیارکر کو ئەگەر وەستیانا یاریزان زەلال سەعید بۆ ١٤ سالی د ماوێ ھەڤرکیان دا نەبا، ئەو ژی دا رێزێن پێشیێ و ناسناڤی ب دەستڤەئینت، لێ ھەر چەوا بیت زەلالێ و ھەر سێ یاریزانێن دی شیان ببنە جھێ باوەریا راھێنەری و ئێکەتیا عیراقێ ژ بۆ پشکداریێ دگەل ھەلبژارتیێ عیراقێ د قارەمانیێن عەرەبی و دەولەتی دا و ئەڤە ژی دەستکەڤتەکێ دیرۆکی یە بۆ وەرزێ ٢٠١٨ێ و بەردەوامی دانە ب ئەنجامێن مەزن.
