دو یاریزانێن ئافرەتێن دهۆكێ هاتنە سزادان
قەیس وەیس:
لژنەیا دێسپێلینێ یا فیدراسیۆنا فوتبۆلا ئیراقێ ب فەرمی هەردو یاریزانێن تیما فوتسالا یانەیا ئافرەتێن دهۆكێ خەلات ئەسعەد و ئاواز یونس سزادان ب دوورئێخستنا وان ژ یاریێن هەلبژارتیێ ئیراقێ و چالاكیێن فیدراسیۆنا فوتبۆلا ئیراقێ بۆ ماوەیێ ئێك سال ل دووڤ بەندێ 13/10 یێ رێنمایێن بەریكانەیێن خولێت فوتسال و یاریگەهێن مەزن دا، هەروەسان ب سزادانا وان ئێك ملیۆن دیناران.
خەلات ئەسعەد گۆلپارێزا یانەیا ئافرەتێن دهۆكێ بۆ رۆژنامەیا ئەڤرۆ گۆت: بڕیارا فیدراسیۆنێ نە داپەروەریە دژی كچێن كوردستانێ، و نە پشكدارییا من د كەمپێ راهێنانێ دا ژبەركو تیما من پێدڤی من بوویە بۆ یاریێن چارگۆشەیا زێرین و یاریێن چارەنڤیس بۆ دووماهیا خولا فوتسالا كوردستانێ، نە پشكدارییا من د كەمپی دا بۆ بەرژەوەندی و خاترا ئافرەتێن دهۆكێ بوویە، من گرێبەست یا دگەل یانەیا خوە هەیی و ئەوان داخواز ژ من كر ئەز پشكداری كەمپێ نەبم ژبەركو یارییەكا گرنگ یا هەیی، دڤیابا فیدراسیۆنا فوتبۆلا ئیراقێ و كوردستانێ دگەل مە دا هاریكاربان تایبەت د ژڤانێ یارییا چارگۆشەیا زێرین، مخابن ئەڤ بریارە یا نە دادپەرەوەرانە بوویە.
ژلایەكێ دووڤە فیدراسیۆنا فوتبۆلا ئیراقێ ژبەر پشكدارییا وان د بابەتێ هەردو یاریزانێن ناڤهاتی دا بریاردا بابەتێ هەر ئێك ژ مەزن محەمەد وسیرۆان نەجمەدین بۆ لژنەیا ئافرەتان د فیدراسیۆنا فوتبۆلا ئیراقێ بهێتە هنارتن ژبۆ دانانا بڕیاران ل دووڤ بەندێ 35 یێ رێنمایێن بەریكانەیان.
بۆ زانین ل ئەینییا بهێت تیما ئافرەتێن دهۆكێ دێ یارییا خوە یا دویێ یا چارگۆشەیا زێرین و چارەنڤیس دگەل تیما یانەیا سیروانی حەلەبچە ل باژێرێ سلێمانیێ كەت، دهۆك ب وەكهەڤی و سەركەفتن ب هەر ئەنجامەكی دێ دەربازبیتە یارییا دووماهیا خولا كوردستانێ.