دڤێت هەر مالەكێ ئامیرەكێ ئاگرڤەمراندنێ هەبیت
هەولێر، قائید میرۆ:
پەیڤدارێ بەرگریا شارستانی ل هەرێما كوردستانێ دیار كر، روودانێن ئاگربەربوونێ بۆ بلندبوونا پلەیێن گەرمێ ڤەدگەڕیت و دبێژیت: دڤێت هەر مالەكێ ئامیرەكێ ئاگرڤەمراندنێ هەبیت، داكو د دەمێ پەیدابوونا روودانێن ئاگری دا بشێن كۆنتڕۆل بكەن.
سەركەوت كاڕەش، پەیڤدارێ بەرگریا شارستانی ل هەرێما كوردستانێ بۆ رۆژناما ئەڤرۆ دیاركر، سالانە د ئەڤی دەمی دا چەندین روودانێن ئاگربەربوونێ دهێنە تۆماركرن، مخابن ئەڤان روودانان زیانێن گیانی و مادی هەنە و گۆت: «مە مەرجێن توند داناینە و هەر جهەكێ بهێتە ڤەكرن، بێی پێگیری كرن ب مەرجێن بەرگریا شارستانی مۆهلەت ناهێتەدان، دڤێت هەر وەلاتیەكی ژی د ناڤا ترۆمبێلێ و مال دا ئامیرێ ئاگرڤەمراندنێ هەبیت، چونكی ئاگر ل دەستپێكێ یێ بچووكە، ئەگەر ئامیرێ ئاگرڤەمراندنێ هەبیت، دێ شێت كۆنترۆل بكەت».
گۆت ژی: «هندەك جاران وەلاتی پێگیریێ ب رێنومایێن لایەنێن پەیوەندیدار ناكەن و دبیتە ئەگەرێ پەیدابوونا كارەساتان، نابیت ب چو شێوەیەكی ئاگر د ناڤا كۆلانان و ل نێزیك جهێن بازرگانی بهێتە هەلكرن، چونكی ئەو ئاگر دەرباز دبیت بۆ ناڤا خانیێن وەلاتیان و جهێن بازرگانی، ب تایبەتی هندەك وەلاتی بۆ سۆتنا گیایێ هشك روودانێن مەزن پەیدا دكەن».
