دڤێت پارتی هشیار ببیت!
ئه‌وا دپه‌رله‌مانێ كوردستانێ دا هاتیه رویدان، بویه‌ره‌كا مه‌زن نه‌بویه كو پارتی بێ بهێته شكاندن و به‌لێ بویه‌ره‌ك بو دڤێت پارتی مه‌زنترین وانه لێ وه‌رگریت و ژ ئه‌ڤرۆ پێڤه ئاگه‌ه ژ دلسوزێن خوه هه‌بیت.
ل روژا ٢٣ ڤێ مه‌هێ ئه‌وا هیچ جاره‌كێ پارتی و لایه‌نگرێن وێ چاڤه‌رێ نه‌دكر هاته رویدان و پارتی وه‌كو ته‌ماشه‌ڤانه‌كێ لێ هات دوێ یاریا دناڤا پهرلهمانی دا دهاته ئه‌نجامدان، كو مه‌زنترین پرسا ڤی ملله‌تی ئه‌و ژی پرسا یاسایا سه‌روكاتیا هه‌رێما كوردستان بوو دهاته پێشكێشكرن.
بخوه پێشكێشكرنا وان پروژه یاساێن دوێ رونشتنێ دا هاتینه ئه‌نجام دان، هێشتا گه‌له‌ك قوناغێن دی یێن ماین كو بكه‌ڤنه د قوناغا جێبه‌جێكرنێ دا، شنی ئه‌و پروژه دێ چنه لیژنا یاسایی و پاشان دێ زڤرنه‌ف پهرلهمانی ڤه، دڤێت بهێنه په‌سه‌ندكرن و پاشی بو سه‌روكێ هه‌رێمی بهێته ره‌وانه‌كرن، سه‌روكێ هه‌رێمی ژی په‌سه‌ند بكه‌ت ژ نوو ئه‌و پروژه دێ بیته یاسا و چیته قوناغا جێبه‌جێكرنێ.
گه‌له‌ك ژ به‌رپرسێن پارتی ئه‌ڤێ چه‌ندێ ب تشته‌كێ كێم دبینن، بخوه ژی وه‌كو پێشكێشكرنا وان پروژان كاره‌كێ نه‌گه‌له‌ك مه‌زنه و ١٠٠% ئه‌و پروژه بێ پارتی ناكه‌ڤنه دقوناغا جێبه‌جێكرنێ دا، چونكه پارتی نوكه مه‌زنترین هێزه ل باشورێ كوردستانێ و زێده‌ترین جه‌ماوه‌ر ژی هه‌یه، به‌لێ ئه‌و بویه‌ره زه‌نگه‌كا گه‌له‌ك بهێز بوو بو پارتی هاتیه لێدان!
هه‌تا نوكه وه‌كو پێدڤی پارتی گرنگی ب دلسوزێن پارتا خوه نه‌دایه، عه‌لی شنگار كو ژیه‌كێ مه‌زن دكه‌ل مه‌لامسته‌فا و مه‌سعود بارزانی دا بوراندینه به‌ری شه‌ش سالان گوته من خراپترین سالوخه‌تێ پارتی ئه‌وه كو چه‌ند كه‌سكه‌ك یان ده‌ڤه‌ره‌ك دلسوزبن بو پارتی ئه‌و وان كه‌س و ده‌ڤه‌ران ب ره‌نگێ وێ دلسوزێ فه‌راموش دكه‌ن ته‌نانه‌ت ده‌ڤه‌را بارزان بخوه ژی هه‌تا نوكه ئه‌وا پێدڤی پارتی بو نه‌كریه.
د سه‌رجه‌م هه‌لبژارتنێن ل ١٩٩١ وه‌ره و هه‌تا نوكه هاتینه ئه‌نجام دان مه‌زنترین رێژه‌یا ده‌نگێن پارتی ل پارێزگه‌ها دهۆكێ بویه، ته‌نانه‌ت دوماهی هه‌لبژارتن ژی بو پهرلهمانی كوردستانێ نێزیكی ٢٥ ئه‌ندام په‌رله‌مان ژ پارتی و هه‌ڤپه‌یمانێن خوه ل دهۆكێ بونه، ٢٤ ساله پارتی ده‌ستهه‌لاترین پارتا باشورێ كوردستانێ یه، به‌لێ ل دیف نویترین ئامارێن لبه‌ر ده‌ست ب داتا دبێژم فه‌راموشترین باژار پارێزگه‌ها دهۆكێ یه چونكه سێ سالان لیف ئێك ژی دهۆك بویه هه‌ژارترین باژار ل كوردستانێ، كو به‌ره به‌ره ئێدی ئه‌و خه‌لكی پارتی یێ دهۆكێ ژی توره دبن، بتایبه‌ت دقه‌یرانا په‌نزینێ دا ئه‌وا پتنی ل دهۆكێ هه‌ی به‌ری ده‌مه‌كێ، تورێن كومه‌لایه‌تی تژی ره‌خنه بون.
فه‌ره ئێدی پارتی بزانیت ده‌نگه‌ك گه‌له‌كه یان كه‌سه‌ك گه‌له‌كه بو پارتی رێزه‌كا مه‌زن ل دلسوزێن پارتا خوه بگریت، چونگه ل روژا ٢٣ ڤێ مه‌هێ بو پارتی باش روهن و دیاربوو كو ئه‌ندام په‌رله‌مانه‌ك چه‌ندێ گرنگه كو ئه‌گه‌ر پارتی ئێك یان دوو ئه‌ندامێن دی هه‌بان ئه‌و هه‌ولا هاتیه ئه‌نجام دان دا هێته شكاندن و دا بو ٢٠ سالێن دی وانه‌یه‌كا مه‌زن بیت بو هه‌فركێن پارتی ل كوردستانێ و دوژمنێن وان ل ده‌رڤه‌ی كوردستانێ.
• ماموستایێ زانكویی