دڤێت پتر گـرنگـی ب بـاژێرێن کـوردی ل تورکـیا بهێتە دان
ئەندامەکێ پەرلەمانێ تورکیا سەر ب پارتا کۆماری دیار دکەت، مخابن وەکو پێدڤی گرنگی ب باژێرێن کوردی ناهێتە دان و ئاستێ خزمەتگوزاریان ژی وەکو پێدڤی نینە، دڤێت حوکمەت گرنگیەکا زێدەتر بدەتە باژێرێن کوردی، چونکی ئەو یەک کاریگەریا خوە ل سەر هزرا خەلکی ژی دکەت.
سەزگین تاریکولو ئەندامێ پەرلەمانێ تورکیا سەر ب فراکسیۆنا پارتا کۆماری د داخۆیانیەکێ دا راگەهاند، مخابن بۆدجە بۆ هەموو باژێرێن وەکو ئێک ناهێتە تەرخانکرن و ئەو بۆدجێ بۆ باژێرێن کوردی ژی دهێتە تەرخانکرن وەکو پێدڤی ناکەڤیتە د خزمەتا خەلکی دا، ژ بەر ڤێ یەکێ ژی ئاستێ خزمەتگوزاریان ل دەڤەرێن کوردی ل تورکیا وەکو پێدڤی نینە و ئەو یەک ژی کاریگەریا خوە ل سەر هزرا وەلاتیان ل هەمبەر دەستهەلاتێ دکەت، دەستهەلاتا ئاکپارتیێ بەری نها گەلەک سۆز داینە وەلاتیێن دیاربەکرێ، وانێ و باژێرێن دی و دڤێت سۆزێن خوە بجه بینیت و گۆت: (نها رێژەیا بێکاریێ ل باژێرێن وەکو وان، دیاربەکر و مێردینێ ل گۆر باژێرێن دی یێن تورکیا گەلەک زێدەیە، خەلک ژ سیاسەتا ئابووری یا دەستهەلاتێ بێزار بووینە، ژ بەر ڤێ یەکێ ژی گرنگە دەستهەلاتا نها سۆزێن کو بەری هەلبژارتنان داینە وەلاتیان ژبیر نەکەت و خزمەتا خەلکی بکەت).
ناڤهاتی ئەو یەک ژی دیار کر، هەکە پارتا کۆماری بهێتە سەر دەستهەلاتێ دێ گرنگیەکا گەلەک زێدە دەتە باژێرێن کوردی، چونکی هەتا نها گەلەک زۆلم ل خەلکێ وان باژێران هاتیە کرن و ئاستێ خزمەتگوزاریان ژی گەلەک خرابە، وەلاتی گازندان دکەن و دڤێت دەستهەلات ژی گرنگیێ بدەتە وان باژێران و رەوشا ژیانا وەلاتیان باش بکەت، دڤێت رێژەیا بێکاریێ بهێتە کێمکرن و ئاستێ خزمەتگوزاریان ژی بهێتە باشکرن، مخابن رەوشا نها گەلەک خرابە و ئاکپارتی ژی بەرپرسە ژ رەوشا خراب یا باژێرێن کوردی ل تورکیا.
ئەو یەک د دەمەکێ دایە کو مەها بۆری ناڤەندەکا راپرسیان ل تورکیا ژی دیار کربوو د ئەنجاما راپرسیەکا وان دا دیار بوویە، رێژەیا بێکاریێ ل باژێرێن وەکو وان، دیاربەکر و مێردین و باتمان ل گۆر باژێرێن دی یێن تورکیا گەلەک زێدەیە، ژ بەر نەبوونا دەلیڤەیێن کاری ژی گەنج بەرێ خوە ددەنە باژێرێن مەزن یێن تورکیا و گەلەک جاران ژی ل دەمێ کاری کەسێن توندرەو ئێرشی وان دکەن، ژ بەر ڤێ یەکێ ژی گرنگە دەولەت رێژەیا بێکاریێ ل باژێرێن کوردی ل تورکیا کێم بکەت.
چاڤدێرێن سیاسی ژی دیار دکەن، دڤێت باژێرڤانیێن باژێرێن کوردی پتر خزمەتا خەلکی بکەن، نابیت گەندەلی ل وان باژێرڤانیان هەبیت، چونکی بۆدجەیەک باش ل بەر دەستێ باژێرڤانیان هەیە و ئەو دشێن ئاستێ خزمەتگوزاریان گەلەک باش بکەن، لێ مخابن باژێرڤانیێن وان باژێران ژی هەتا نها وەکو پێدڤی کارێن خوە ئەنجام نەداینە.
