دیدەڤانێن دۆزەخا 1983، ژیانا مە پشتی ئەنفالێ بوو جـەهـەنـەم
بەرهەڤكرن: رەمەزان زەكەریا
رۆژا 31/7/1983 رژێما بەعسا ئیراقێ دەست ب گرتن و ئەنفالكرنا بارزانییان كر و هەتا دووماهی رۆژا ئەنفالێ 8000 هزار بارزانی گرتن و بێ سەروشوین كرن، هەتا نوكە 696 رۆفاتێن ئەنفالكریێن بارزاتی هاتینە زڤراندن و ل گۆرستانەكا تایبەت ل بارزان هاتینە ڤەشارتن و سالانە رێورەسمێن تایبەت بۆ بیرئانینا وان دهێنە ئەنجامدان.
تاهر مەلا سالح، كو ئێك ژ دیدەڤانێن دۆزەخا وێ كارەساتێ یە ب ئاخینكەكا پڕ ژ ژان بەحسێ وێ سپێدەهیا نەخۆش دكەت و بۆ ئەڤرۆ دبێژیت: دەمژمێر یازدێ سپێدێ بوو، ل ناڤ گەرەكێ دەنگەدەنگ و ترسەكا مەزن چێبوو، مە دیت سەربازێن رژێمێ مال ب مال دگەڕیان، بێی كو بزانین گوننەها مە چییە، یان زەلامێن مە بۆ كیڤە دبەن! ئەوێن ژیێ وان مەزن ژ مال دەرئێخستن و بتنێ گۆتن: بۆ كارەكێ فەر و كورت دێ بەین، ئەڤە 43 سال ب سەر وێ ڕستێ دا دەربازبوون، بەلێ ئەم هێشتا ل سەر ڕێكا ڤەگەڕیانا وان دچاڤەڕێنە و هەتا ئەم ژی دمرین، چاڤێن مە دێ هەر ل سەر رێكێ بن.
تاهر هێشتا گۆت: پشتی گرتنا باب و كەسوكارێن مە، ژیانا مە بەر ب جەهەنەمێ ڤە چوو. ژ لایەكی ڤە ئاشۆبا دەروونی و خەما نەزانینا چارەنڤیسێ كەسوكاران، ژ لایەكێ دی ڤە ژی دژواریا ژیانێ. د گەلەك دەمان دا مە هزرا مرنێ دكر، دا كو ژ نەخۆشیا ڕزگار ببن.
تاهر خۆیاكر: چ تشت نەشێن وێ كولا د دلێ مە دا هەی كێم بكەن هەر سال د وێ ڕۆژێ دا هەست دكەم كو سەر ژ نوو ئەو ل بەر چاڤێن من دهێنە گرتن من چ دەمەكی د ژیانا خۆ دا هەست ب خۆشییا دروست نەكریە بەردەوام دچمە سەر گۆڕستانا بارزان هەتا كێمەكێ سەبرا دلێ خۆ بینم ناخێ مە ب چ تشتێ ئارام نابیت.
پشتی ژناڤچوونا رژێما بەعس سالا 2003، پڕۆسەیا لێگەڕیان ل دووڤ گۆڕێن بێسەروشوینان دەستپێكر. هەتا نوكە ژ كۆما 8,000 ئەنفالكریێن بارزانی، بتنێ 696 رووفات هاتینە دیتن و ب ڕێوڕەسمێن هەژی ڤەگەڕاندینە بۆ ئاخا بارزان: سالا 2005: 503 رووفات. سالا 2014: 93 رۆفات. سالا 2022: 100 رۆفات. هێشتا زێدەتر ژ 7,000 بارزانیێن دی چارەنڤیسێ وان د ناڤ تاریاتییا دیرۆكا كارەساتێ دا ماینە.
