دیندار نه‌جمان: د عێراقا نوو دا پێدڤیه هه‌موو پێكهات پێكڤه د رێڤه‌برنا وه‌لاتی دا پشكدار بن
دهۆك ، زنار تۆڤی:
خوه‌شكرنا په‌یوه‌ندیان ل گه‌ل هێزێن سیاسی یێن عیراقی د به‌رژه‌وه‌ندیا هه‌رێمێ و حوكمه‌تا عیراقێ و هێزێن سیاسی دایه
دیندار نه‌جمان دۆسكی، چاڤدێرێ سیاسی، بۆ رۆژناما ئه‌ڤرۆ راگه‌هاند، سیسته‌مێ سیاسی ل عیراقێ سیسته‌مه‌كێ په‌رله‌مانی، دیموكراتی یه، هه‌روه‌سا ئه‌م چه‌ند بشێین په‌یوه‌ندیێن خوه ل گه‌ل حوكمه‌تێ و هێزێن سیاسی یێن عه‌ره‌بی خوه‌شتر بكه‌ین، دێ بۆمه وه‌كو هه‌رێم باشتر بیت، چونكی هه‌ر ژ سالا 2005 ل دانانا دستۆرێ عێراقا فیدرال، خوه‌شكرنا په‌یوه‌ندیان ل گه‌ل ئالیێن عه‌ره‌بی، ببوو ئه‌گه‌ر كو هه‌رێما كوردستانێ گه‌له‌ك ده‌ستكه‌فتان ب ده‌ست خوه‌ڤه بینیت، وان ژی پشته‌ڤانی ل مه كریه، هه‌ر چه‌نده هه‌ر ژ سالا 2003 هه‌تا نوكه په‌یوه‌ندیێن مه ل گه‌ل حوكمه‌تا عیراقێ و هێزێن سیاسی یێن عه‌ره‌بێن شیعی و سوننی، جاران ئه‌و په‌یوه‌ندییه د ئاسته‌كێ باش دابووینه و جاران ژی داكه‌فتینه، دیسان گوهۆرین ب سه‌ر وان په‌یوه‌ندیان دا هاتینه، چونكی هه‌ڤپه‌یمانی چێبووینه و ژیانا سیاسی ل عیراقێ ب ڤی ره‌نگی بوویه، ڤێ چه‌ندێ كارتێكرن ل سه‌ر وان په‌یوه‌ندیان كریه، له‌وما د نوكه دا خوه‌شكرنا وان په‌یوه‌ندیان ل گه‌ل هێزێن سیاسی یێن عه‌ره‌بی د به‌رژه‌وه‌ندیا هه‌رێما كوردستانێ و حوكمه‌تا عیراقێ و هێزێن سیاسی دایه، دیسان هه‌كه هه‌ماهه‌نگیه‌ك د ناڤبه‌را هێزێن سیاسی و هه‌ردو حوكمه‌تان دا هه‌بیت، ئه‌م دێ شێین ب ره‌نگه‌كێ باشتر كارێن خوه ئه‌نجام ده‌ین، چونكی هێشتا مه گه‌له‌ك كار یێن ل به‌غدا هه‌ین، ژ وان ژی هێشتا مادێ 140 نه‌هاتیه بجهئینان، دیسان بابه‌تێ پێشمه‌رگه‌ی، هه‌روه‌سا هه‌ر سال مه پرسا بودجه‌ی ل گه‌ل عیراقێ یا هه‌ی زێده‌باری چه‌ندین كێشێن دی ، له‌وما د نوكه دا چوونا سه‌رۆكێ هه‌رێما كوردستانێ (نێچیرڤان بارزانی) بۆ به‌غدا گرنگیه‌كا مه‌زن هه‌یه و دێ بیته ئاسانكاریه‌ك كو تێگه‌هشتنه‌كا سیاسی یا باش بهێته كرن، ژ بۆ برێڤه‌برنا كاروبارێن عیراقێ.
دیندار نه‌جام گۆت” نوكه عیراق یا د قۆناغه‌كێ دا ده‌باز دبیت، كو هه‌ر ژ سالا 2003 هه‌تا نوكه پێكهاتێ شیعی یێ عیراقێ برێڤه دبه‌ت و كونترۆلا هه‌موو سازیێن ده‌وله‌تێ یێن ئه‌منی و سیاسی و دارایی و له‌شكری كریه و هه‌ردو پێكهاته‌یێن كورد و سوننی پشتگۆه خستینه، ئه‌ڤه د به‌رژه‌وه‌ندیا كوردان دا نینه، چونكی د عیراقا نوودا دڤێت هه‌موو پێكهات پێكڤه د رێڤه‌برنا وه‌لاتی دا پشكدار بن و ل هه‌ڤهاتنه‌ك د ناڤبه‌را وان دا هه‌بیت، چونكی دستۆرێ عیراقێ ل سه‌ر بنه‌مایێ دیموكراتیا ل هه‌ڤهاتنێ هاتیه دانان، هه‌روه‌سا نوكه بزاڤ یێن دهێنه كرن، كو به‌ری هه‌لبژارتنان یان ژی پشتی هه‌لبژارتنان هه‌ڤپه‌یمانی بهێنه دروستكرن ل سه‌ر بنه‌مایێ نیشتیمانی، ئه‌ڤێ گرنگیه‌كا تایبه‌ت هه‌یه ودێ بیته ئه‌گه‌ر كو ئه‌م تائیفیێ رزگار بین، چونكی هه‌كه كوردان هه‌ڤپه‌یمانی ل گه‌ل شیعه‌ان و سوننه‌یان كر، هه‌موو پێكهاتێن عیراقێ دێ پشكداریێ د ئێك لیستا نیشتیمانی دابن، دیسان هه‌كه كورد ژی هه‌موو ب ئێك لیسته بن، دێ یا باشتر بیت، هه‌كه ئه‌م هه‌موو پێكڤه ل گه‌ل ئالیێن دیتر بین، دێ مه پتر كارتێكرن ل سه‌ر سیاسه‌ت و برێڤه‌برنا حوكمه‌تا فیدرالی هه‌بیت، له‌وما ئه‌ز گه‌له‌ك ب گرنگی به‌رێ خوه دده‌مه سه‌ره‌دانا سه‌رۆكێ هه‌رێما كوردستانێ بۆ به‌غدا و كۆمبوونا وی ل گه‌ل ئالیێن عه‌ره‌بی، هه‌روه‌سا یا گرنگه ئه‌ڤ سه‌ره‌دانه دناڤبه‌را هه‌ردو حوكمه‌تێن هه‌رێمێ و به‌غدا دا د به‌رده‌وام بن”.
دیاركر” د نوكه دا مه‌رج نینه، په‌یوه‌ندیێن مه ل گه‌ل حوكمه‌تا عیراقێ وه‌كو به‌رێ بزڤرن، چونكی نوكه به‌رژه‌وه‌ندیێن سیاسی ل عیراقێ هه‌نه، دیسان مه به‌رژه‌وه‌ندیێن جودا ل گه‌ل ئێك هه‌نه، لێ ئه‌م دشێین نێزیكی ئێك بین و دشێین په‌یوه‌ندیێن خوه باشتر لێ بكه‌ین، دیسان دیدارێن نێچیرڤان بارزانی سه‌رۆكێ هه‌رێما كوردستانێ، ل گه‌ل سه‌ركردێن عه‌ره‌بێن عیراقێ دگرنگن، چونكی وان هه‌موویان كارتێكرن ل سه‌ر بریارا سیاسی یا عیراقێ هه‌نه، هه‌بوونا په‌یوه‌ندی و هه‌ماهه‌نگیێ ل گه‌ل وان یا گرنگه، ژ پێخه‌مه‌ت ئه‌م بگه‌هینه هنده‌ك تشتێن هه‌ڤپشك ل گه‌ل ئێك، ژبۆ برێڤه‌برنا عیراقا فیدرال، دیسان چوونا وی دێ بیته رێخوه‌شكه‌ر، كو ئه‌ڤ ده‌ستكه‌فتێن ل كوردستانێ هه‌ین، باشتر بپارێزین ل سه‌ر بنه‌مایێن دستۆرێ عیراقێ”.
ناڤبری ئاماژه‌كر” كۆمبوونا سه‌رۆكێ هه‌رێمێ ل گه‌ل ئالیێن سیاسی یێن كوردستانی گه‌له‌ك گرنگیا خوه هه‌بوویه، هه‌ر چه‌نده ل كوردستانێ ئایدولۆجژیێن جودا هه‌نه، لێ هنده‌ك خالێن نیشتیمانی و نه‌ته‌وی یێن هه‌ین و دڤێت ئه‌م كورد هه‌موو ل سه‌ر وان خالان رێكبكه‌ڤین، نابیت بۆچوونێن جودا ل سه‌ر وان خالان هه‌بن، له‌وما ئه‌و دیدارا سه‌رۆكێ هه‌رێمێ ل گه‌ل وان ئالیێن سیاسی یێن كوردستانی دگرنگ بووینه، داكو ئه‌م بگه‌هینه ئه‌نجامێن باش، مه هه‌لویسته‌كێ هه‌ڤگرتی هه‌بیت به‌رامبه‌ر حوكمه‌ت و لایه‌نێن عیراقی، دیسان چه‌ند كۆمبوونێن ژڤی جۆری بهێنه كرن، هه‌كه ئالیێن سیاسی بۆچوونێن جۆدا ژی هه‌بن، دێ په‌یوه‌ندیێن وان ب هێزتر كه‌ڤن و دێ پتر نێزیكی ئێك بن و دێ بنه ئه‌گه‌رێ ئێك هه‌لویستیا لایه‌نێن كوردی ژی ل گه‌ل ئێك”.
به‌رپرسه‌كێ گۆران به‌حس ل ئه‌گه‌رێن رێك نه‌كه‌فتنێ ل سه‌ر جڤاتا پارێزگه‌ها هه‌له‌بجه دكه‌ت
