دێرالوك بۆ نه‌بوونا په‌رتۆكخانه‌كا گشتی دنالیت
ئامێدیێ، مه‌حمود نهێلی:
په‌رتوكخانه ئێكه ژ گه‌نجینێن زانست و زانینێ و ره‌وشه‌نبیركرنا جڤاكی و نه‌بوونا وێ ل دێره‌لۆكێ كارتێكرن كریه سه‌ر خوانده‌ڤان و قوتابیان ب تایبه‌تی ژی ده‌مێ چێكرنا ڤه‌كۆلینێن زانستی. قوتابیه‌ك ژی دبێژیت: ل ڤێ ده‌ڤه‌رێ ب سه‌دان قوتابی سالانه دچنه زانكۆ و په‌یمانگه‌هان و پێدڤی ب ژێده‌ران دبن، لێ ب مخابنی ڤه هه‌تا نوكه په‌رتوكخانه ل ڤێ ده‌ڤه‌رێ دا نینن.
دلشاد یوسف وه‌ك ئێك ژ خوانده‌ڤانان ل ناحیا دێره‌لۆكێ بو رۆژناما ئه‌ڤرۆ دیار كر، هه‌بوونا په‌رتوكخانێ ل دێره‌لۆكێ گه‌له‌ك گرانگیا خوه هه‌یه و گۆت: خوه هه‌تا دناڤ مالێ دا دڤێت مروڤی په‌رتوكخانه هه‌بیت، نه‌خاسمه باژێره‌كی وه‌كو دێره‌لۆكێ كو پتر ژ 20 هزار كه‌س تێدانه دڤێت په‌رتۆكخانه هه‌بیت، چونكه په‌رتوكخانه ژێده‌رێ زانین و زانستی و ره‌وشه‌نبیریێ یه و ل ڤێ ده‌ڤه‌رێ ب سه‌دان قوتابی سالانه دچنه زانكو و په‌یمانگه‌هان و پێدڤی ب ژێده‌ران دبن، لێ ب مخابنی ڤه تا نوكه په‌رتوكخانه ل ڤێ ده‌ڤه‌رێ دا نینه.
دیار كر، چه‌ندین جاران وان لایه‌نێن په‌یوه‌ندیدار ل سه‌ر ڤێ یه‌كێ ئاگه‌هدار كرینه كو په‌رتوكخانه ل ڤێ ده‌ڤه‌رێ ژی بهێته ڤه‌كرن، لێ تا نوكه به‌رسڤ نه‌بووینه.
عه‌بدولجه‌بار حه‌مید وه‌ك ماموستا بو رۆژناما ئه‌ڤرۆ دیار كر، په‌رتوكخانه گرنگه بۆ هه‌ر ده‌ڤه‌ره‌كی و بۆ دێره‌لۆكێ ژی هه‌بوونا په‌رتوكخانێ گرنگیا خوه هه‌یه بتایبه‌تی ژی بو ڤی سه‌ر ده‌می و بۆ قوتابیان ئه‌وێن ڤه‌كولینێن زانستی دروست دكه‌ن گه‌له‌ك پێدڤی دبنێ و خویا كر، بۆ ره‌وشه‌نبیران ژی گه‌له‌ك گرنگه و هه‌ر كه‌سه‌ك د وارێ خواندنێ دا هه‌كه په‌رتوكخانه‌كا گشتی هه‌بیت دا خوانده‌ڤان مفای ژێ وه‌رگریت.
ئاشكرا كر، زێده‌باری وێ یه‌كێ وه‌ك دورهێل خواندنا په‌رتوكێ یا كێمه، لێ مرۆڤی هه‌ر پێدڤی ب په‌رتوكێ هه‌یه و گه‌له‌ك جار خوانده‌ڤان و لێكوله‌رێن ده‌ڤه‌را مه نه‌چار دبن بچنه جهێن دیتر بۆ خوه ژێده‌ران په‌یدا بكه‌ن و ئاشكرا كر، هه‌كه په‌رتوكخانه ل ده‌ڤه‌رێ بهێته دروستكرن دێ خه‌لك ژی پتر خوه ل گه‌ل گونجینیت و دێ پتر حه‌زا وان كه‌ڤیته سه‌ر خواندنێ و دێ ره‌وشه‌نبیریا وان پتر لێ هێت و دێ پتر تێكه‌لیا خواندنێ كه‌ن.
ماموستا سه‌یفه‌دین ئێك ژ نڤیسه‌ر و وه‌رگێرێن په‌رتوكان ل ده‌ڤه‌رێ بۆ رۆژناما ئه‌ڤرۆ دیاركر، هه‌بوونا په‌رتوخانا د ناڤا هه‌موو جڤاكان دا گه‌له‌ك گرنگه، چونكو په‌رتوكه مروڤی ئاڤا دكه‌ت و دكه‌ته مروڤه‌كێ تێگه‌هشتی و گۆت: ل ڤێ داویێ ژی هه‌ژماره‌كا زۆرا په‌رتوكان دهێنه وه‌گێران بۆ سه‌ر زمانێ كوردی و په‌رتوك یا هه‌ی به‌س جهێ هه‌بوونا په‌رتوكێ و خواندنا وێ نینه ژ به‌ر وێ یه‌كێ ژی نه‌بوونا په‌رتوكخانێ گه‌له‌ك كارتێكرنا خوه ل سه‌ر خوانده‌ڤانان كریه ب تایبه‌تی ژی قوتابیان ڤه‌كوله‌ران.
ده‌رباره‌ی گرنگیا وه‌رگێرانا په‌رتوكان بۆ سه‌ر زمانێ كوردی ناڤهاتی وه‌ك نڤیسه‌ر و ئێك ژ وه‌رگێرێن په‌رتوكان ئاشكرا كر، وه‌رگێران هه‌ر دكه‌ڤنه دا هه‌بوویه و هه‌تا نوكه ژی رۆلێ خوه یێ هه‌ی و گۆت : وه‌رگێرانێ گه‌له‌ك گرنگیا خوه هه‌یه بۆ جڤاكێ به‌رف پێشكه‌فتنێ، چونكو دبیته ئه‌گه‌رێ ڤه‌گوهاستنا زانیاریان دناڤبه‌را جڤاكان دا.
