دێ چاوان زارۆیان ژ بلندبوونا كولیسترولی پارێزین؟
ئه‌ڤرۆ، به‌رپه‌رێ ساخله‌میێ:
هه‌موو بۆچوونێن نوشداری به‌روڤاژی هاتنه راستڤه‌كرن و دیاردبیت كو زارۆ ژی تووشی بلندبوونا كولیسترولێ خوینێ دبن، به‌ربه‌لاڤبوونا قه‌له‌ویێ دناڤ زارۆیان دا، دبیته ئێك ژ ئاماژه‌یێن هه‌بوونا ئاریشه‌یه‌كا ساخله‌میێ د ژیه‌كێ به‌روه‌خت دا، پێدڤیه هزر د پاراستنا زارۆیان دا بهێته كرن. وه‌كو دهێته زانین كو بلندبوونا رێژا كولیسترۆلی د خوینێ دا پتریا جاران ل ژیێ بالقبوونێ په‌یدادبیت، له‌ورا تشته‌كێ ده‌گمه‌ن و گه‌له‌ك ب مه‌ترسیه هه‌كه ل ده‌ڤ زارۆیان ژی په‌یداببیت و ره‌نگه ئه‌ڤ چه‌نده هاندانه‌كا زكماكی بیت و قه‌له‌وی ژی په‌یداببیت، سیسته‌مێ خوارنێ یێ پری روین و ب تایبه‌ت هه‌كه زارۆ خوارنێن ئاماده‌كری بخوت ئه‌گه‌رێن سه‌ره‌كی یێن ه‌پدابوونا ڤێ چه‌ندێ نه.
ژبۆ دووڤچۆنا ڤێ ئاریشه‌یێ، پێدڤیه سه‌ره‌كی ل گه‌ل هه‌ر حاله‌ته‌كی جودا بهێته كرن، هه‌كه بلندبوونا كولیسترولی یا هه‌ڤسه‌نگ بیت، باشتره ئه‌م زارۆیی ب رێ:ا دووڤچونا سیسته‌مه‌كێ خوارنێ ب پارێزین، به‌لێ نابیت ده‌رمان بۆ بهێنه دان به‌ری كو ژیێ وی ببیته 18 سال، به‌لێ هه‌كه رێژا كولیسترولی یا بلند بیت، ره‌نگه ئه‌و ژبه‌ر نه‌خوشیه‌كا زكماكی بیت و هه‌كه ئه‌و نه‌خوشی ب رێیا دایكێ یان بابی بۆ هاتبیته ڤه‌گوهاستن، هوون دشێن ده‌رمانان ل دووڤ شیره‌تێن نوشداران بده‌نه زارۆی، به‌لێ هه‌كه ب رێكا هه‌ردویان بیت( دایك و باب) كو ئه‌ڤ حاله‌ته گه‌له‌ك یێ ده‌گمه‌نه، ئه‌ڤێ چه‌ندێ چو چاره‌سه‌ری ژبلی چاندنا مێلاكا ره‌ش یان كریارا سافیكرنا خوینێ ژ كولیسترولێ نه‌باش نینن. دوور ژ حاله‌تێن گران، دا ڤه‌گه‌رینه په‌یوه‌ندیێ دناڤبه‌را قه‌له‌ویا زارۆیان و بلندبوونا كولیسترولی دناڤ خوینا وان دا، گه‌له‌ك گرنگه دڤی حاله‌تی دا زێره‌ڤانیا شێوازێ ژیانا وان بهێته كرن و ل دووڤ شێوازه‌كێ ساخله‌م بچن، یا گرنگ ل ڤێرێ پشته‌ڤانیا وان بهێته كرن كو وه‌رزشێ بكه‌ن و ل دووڤ سیسته‌مه‌كێ ساخله‌م یێ خوارنێ بچن و گه‌له‌ك فێقی و زه‌رزه‌واتی بخوون و خۆ ژ شرینیی و چپسا و بتاتێن قه‌لاندی دور بكه‌ن، ژبیرنه‌كه‌ن قه‌له‌وی ل ده‌ڤ زارۆیان نیشانه‌كا نه‌باشه به‌لكو نه‌خوشی یه و پێدڤیه ب گرنگی بهێته وه‌رگرتن، پێدڤیه دایك ژی یا دژواربیت د هنده‌ك ده‌مان دا و ساخله‌میا زارۆیێ خۆ ل پێش هه‌ر تشته‌كی وه‌رگریت و ئه‌ڤ چه‌نده دێ پێنگاڤه‌كا باش بیت بۆ پاراستنا زارۆكی ژ نه‌خوشیێن دلی و ده‌ماران.
