دەرسۆك نەبوویە ڕێگر ل هەمبەر كارێ من
بێوار حەمدی
ویداد ئەحمەد، پەیامنێرا ئاژانسا خانی ل دەڤەرا بەردەڕەش، د دیدارەكێ دا گۆت: ئەڤ حەفت سالن ئەز كارێ پەیامنێریێ دكەم و هەردەم دبێژم كارێ پەیامنێریێ بگشتی یێ ب زەحمەتە، ب تایبەت ژی بۆ كچێ ب زەحمەترە، ئەو ژی ژ بەر هندەك دابونەریتێن جڤاكی، لێ سوپاس بۆ خودێ و ب پشتەڤانیا خێزانێ ئەم ژوێ قوناغێ دەرباز بووینە و نوكە هەر چالاكیەكا دچینێ پێشوازیەكا باش ل مایكا مە دهێتە گرتن، هەروەسا خەلكێ دەڤەرێ ژی گەلەك ڕێزێ ل مە دگرن.
سەبارەت ل بەركرنا دەرسۆكێ و ڕاپێچا وێ، ویدادێ گۆت: چ جاران ل بەر كرنا دەرسۆكێ نەبوویە ڕێگر ل هەمبەر كارێ من، هەروەسا چ جاران ژلایێ دەزگەهێن ڕاگەهاندنێ ڤە داخاز ژ من نەهاتیە كرن كو دەرسۆكا خۆ دانم، بەرۆڤاژی وێ چەندێ گەلەك رێز ل من هاتیە گرتن، چنكو ئەڤە بابەتەكێ تایبەتە ب مرۆڤی ڤە، لەورا دخوازم كچ و ژنێن ڕاگەهاندكار پتر كارێ مەیدانی بكەن دا پتر شارەزایی ل دەف وان پەیدا ببیت، هەروەسا د كاری دا بەردەوام دووفچوونا تەكنۆلۆژیایێ و تشتێ نوو بكەن، هەروەسا ب پیشەیانە كاربكەن.