دەسـت ب چێكـرنا پڕۆژەیـێ جۆتسایـدێ سیارەتیكا بۆ دێرەلۆكێ دێ هێتە كرن
ئامێدیێ، مەحمود نهێلی:
بەهرام عریف یاسین، بەرپرسێ لقێ 18 یێ پارتی ل ئامێدیێ د رێورەسمێن ئاهەنگا شۆڕەشا 26ی گولانێ دا ل دێرەلۆكێ دیار كر، د دمەكێ نێزیك دا دەست ب چێكرنا پڕۆژەیێ جۆتسایدێ سیارەتیكا بۆ دێرەلۆكێ و پڕۆژەیێ تۆنێلا مەتینا ل بامەرنێ بۆ بەرواری بالا دێ هێتە كرن و دبێژیت: ئەڤ هەردو پڕۆژە ژ لایێ گەشتوگوزاری و بازرگانی و ئابووری ڤە دێ خزمەتەكا مەزن یا خەلكێ ڤێ دەڤەرێ كەن.
ناڤهاتی د پەیڤەكێ دا گۆت: «نوكە ئەم كار دكەین ناڤونیشانەكێ كوردستانی بۆ ڤێ دەڤەرێ ب دەست ڤە بینین، ئەڤ دەڤەرە یا ژ هەژی خزمەتێن پترە و پاشەرۆژەگا گەش چاڤەرێی ڤێ دەڤەرێ دكەت، ئەم ب هیڤی نە رێیێن دەڤەرێ بهێە ڤەكرن و خەلكێ مە بشێن قەستا سەر گوندێن خوە بكەن، چونكی پتر ژ 40 سالانە دەرگەهێن دەڤەرا مە هاتینە گرتن».
ناڤهاتی تەكەزی ل سەر پاراستنا ژینگەهێ كر و گۆت: «ژینگەهپارێزی ئێكە ژ شەنگەستێن رێبازا پیرۆزا بارزانی یە و گۆت: «ژ بەر وێ یەكێ پێدڤیە ئەم هەموو پێكڤە بزاڤا پاقژڕاگرتنا ژینگەها دەڤەرا مە بكەین».
