دەنگێن هەرێمێ كێ بەندكرینە؟
شێرزاد نایف
هەكە د بیاڤێ ئەجیندەیێن دەرەكی دا مێزە بكەین، دێ دیاربیت كی ژ ڤالاهیێ یێ مفادارە، كی ژ جوداكرنا ناڤخۆییا كوردی ژ و دەستهەلاتێ و سازیێن وێ یێ مفادارە، گیرۆكرن ژ ڤالاهیەكا جیۆسیاسی چێنابیت، لێ ئەڤە ژی ل دەمەكی یە كو بەغدا وەكو ناڤەند حوكمەتەكا لاوازە و نەمازە دەرزێن ڤێ دووماهیێ پتر فرەه بووینە ژ بەر گەلەك بابەتان ژ بلی یێن رەهەندێن شەڕێ ئەمریكا ل سەر ئیرانێ چونكو ژ وی بابەتی كەڤنترە!، هەروەسا ژی بابەتێ نەهێلانا گەندەلیێ و دەستەسەركرنا كەسێن زەبەلاح ل ناڤا ئیراقێ، لەورا بەغدا حەزا دانوستاندنان ل گەل هەردو حزبێن مەزن یێن كوردی دكەت، ل شووینا سازیەكێ. پەرلەمانێ كوردستانێ هەكە هاتە لدارخستن، دێ گەلەك بادەكێن گرتی ڤەكەت، دێ قانوونێن نەفت و غازێ دەرئێخیت و ئێخیتە د پەرژانەكێ دەستووی دا. ئەڤ ئێكە دێ بژارەیان ل سەر ناڤەندێ دۆرپێچ كەت.
هەلبەت هەڤسویێن مە یێن هەرێماتیك هەمی دزانن كو بەرژەوەندیێن خۆ ل ناڤا هەرێمەكێ دا هەنە، كو ئەو هەرێم یا سەقامگیرە ب ئیدارەیا خۆ.
بۆ میناك توركیا رێككەفتنێن ئەولەهی و یێن ئابووریێ دخوازیت و ب لەز برێڤەدچن، هەروەسا ژی ئیران دخوازیت كوردستان نەبیتە مینا پلاتفۆڕمەكا هێزێن دژی وێ. هەردیسا ئەو ڤالاهیا پەرلەمانی بارزگانێن سیبەر یان (فەیك) هەكە دەربرن یا دروست بیت، ل بەر وان هێزێن خۆ دڤەنیسن ب ساناهی دئێخیت!.
ژلایەكێ دی ڤە لۆژیكێ «رێڤەربرنا قەیرانان» یا نێڤدەولی هەیە كو هندەك ژ هێزێن نێڤدەولی هەنە سەقامگیریا كوردستانێ یا رێژەی، هەكە بێژین، دبینن باشترە ژ دیمۆكراسیەكا ئاژاوگیر، لەورا پەرلەمانەكێ بژالە واتە حوكمەتەكا ب خۆڤە مژوول, و نەكاریت پێنگاڤێن وەسا بهاڤژیت جهێ نیگەرانیا وان بن، مینا ریفراندۆمێ یان هندەك هەمواركرنان د ناڤ ماددەیێن دەستووری دا.
ئەڤجا هەكە گیرۆبوونا جڤینێن پەرلەمانی د ناڤبەرا رێڤەبرینا ناڤخۆی و ئەجیندەیین دەرەكی دا، بنێڕین دێ بینین كو پەرلەمان وكو سیهێن مرۆڤی یە د ناڤ جەستەیێ دیمۆكراسیەتێ دا، هەر گاڤا ئەڤ سیهە ژ هەناسەیا خۆ راوەستیا، ئەو هەمی لاش دێ خەندقیت. ڤێجا ئەڤ گیرۆبوونە كو بۆ جارا سیێ یە ل دویڤ ئێك دهێت، بۆ مە دیار دبیت كو نەوەسایە وەكو هزر لێ دهێتە كرن، كو ئەگەرێن تەكنیكینە یان هەنگافتنەكا رێككارانە، لێ قەیرانەكا فەلسەفی و سیاسی یە هەڤڕكیەكا كوورتر ژێ دهێتە رەنگڤەدان د ناڤبەرا پرەنسیپێ ئیرادەیا پۆپۆلیست و د ناڤبەرا لۆژیكێ ئەجیندەیێن درەكی كو دخوازن كوردستان د دۆخەكێ ئیردەكا قەیرانانا دا بمینیت.
ئەڤە خواندنا مەیە د ڤی رەهەندی دا، كو دوور نینە هندەك لایەنێن قانوونی ئەڤێ بۆچوونا مە ب رەشبینی دابنن و بێخنە د خانەیا بیردۆزەیا پیلانگیریێ دا، وەسا ببینن كو ئەگەرێن ژیوارینە ژ ئەگەرێن راگەهاندی مینا ناكۆكێن ل سەر تەكنیكا قانوونێن هەلبژارتان، یانژی بەهرا پێكهاتەیان وەكو كۆتا و نوونەراتیێن نەتەوەیی و ئایینی. ئەنجامێن هەلبژارتنان د ناڤ بادەكێن كۆمسیۆنێ و تانلێدانێ دا، بریارێن دادگەها فیدرال .. هتد. ئەڤە راستە لێ ل هەمی دونیایێ ئەڤە جۆرە ئاریشە هەنە بەلێ ناكێشیتە دو هەیڤان یان سێیان. بەلێ بابەت هەكە گەهشتە هەستی ئەو فەلسەفەكا دیترە زیانێ دگەهینتە ناخێ پەرلەمانێ مللەتێ كوردستانێ و لێدانا ئیرادەیا دەنگدەرێن كوردستانێ.. ئەڤە یە خواندنا من بۆ ڤی بابەتی و دبیت ژی هندەك ئەگەرێن دی بن!
