د بۆدجا عیراقێ یا 2015 دا پشكا هه‌رێمێ هاته دیاركرن
ئه‌ڤرۆ نیۆز، سالار دۆسكى:
برایارده‌رێ لیژنا دارایى ل په‌رله‌مانێ عیراقێ دیاركر كو بۆدجا عیراقێ یا گشتى بۆ سالا 2015 ب 150 تریلۆن 634 ملیار 421 ملیۆن دیناران هاتیه خه‌ملاندن، ل سه‌ر بنه‌مایێ هنارتنا 2 ملیۆن 750 هزار به‌رمیلێن گازێ د رۆژه‌كێ دا هاتیه‌دانان، دیسا دڤێت هه‌رێم رۆژانه 150 هزار به‌رمیلێن گازێ فرێكه‌ت.
ئه‌حمه‌د حاجى ره‌شید برایارده‌رێ لیژنا دارایى ل په‌رله‌مانێ عیراقێ گۆتژى: پشكا هه‌رێما كوردستانێ د بۆدجێ 2015 دا 17 تریلۆن 741 ملیار و 23 ملیۆن دینار بۆ هاتینه دیاركرن، كو 57 ملیار بۆدجا پێشئێستنا هه‌رێما نه و ئه‌وێ دى بۆدجه‌یه.
بریارده‌رێ لیژنا دارایى ل په‌رله‌مانێ عیراقێ ئه‌وچه‌نده‌ژى ئاشكراكر كو دبۆدجا 2015 دا عیراقێ بریار دایه پێشینا ب ده‌ته پێشمه‌رگه‌ى ب مه‌رجه‌كى سه‌رۆك وه‌زیرێن عیراقێ و سه‌رۆك وه‌زیرێن هه‌رێما كوردستانێ رێك بكه‌ڤن و هه‌كه رێك نه‌كه‌فتن ناهنێریت، دیسا دڤێت دیوانا چاڤدێدریا هه‌رێم و به‌غدا دڤێت داهاتێ بۆ هه‌رێمێ بهێت دیار بكه‌ن و بزڤریته به‌غدا و ئه‌ڤه هه‌ر گرفتا سالا بورى یه.
بریارده‌رێ لیژنا دارایى ل په‌رله‌مانێ عیراقێ ئاشكراكر كو 35 تریلۆن ژ بۆدجا عیراقێ بۆ بیاڤێن ئێمناهیێ و به‌ره‌ڤانیێ هاتینه ته‌رخانكرن وئه‌ڤه ده‌مه‌كى دایه كو 12 تریلۆن بۆ بیاڤێ په‌روه‌رده و فێكرنێ هاتینه ته‌رخانكرن، جهێ ئاماژه‌كرنێ یه كو بۆدجا عیراقێ ل گه‌ل سالا بورى 21 تریلۆنان هاتیه‌كێمكرن چونكه سالا بورى 171 تریلۆن بوویه و ئه‌ف ساله ژى ب 150 تریلۆنان هاتیه خه‌ملاندن.
