د. بیوار خنسی:غازا سروشتی ل هه‌رێما كوردستانێ دێ بیته داهاتێ سه‌ره‌كی
ئه‌ڤرۆ:
شیره‌تكاره‌كێ سه‌رۆكێ هه‌رێما كوردستانێ، راگه‌هاند، حوكمه‌تا هه‌رێما كوردستانێ د بوارێ غازا سروشتی دا ده‌ستی بكاری كریه و دخوازیت غازا سروشتی ببیته داهاتێ سه‌ره‌كێ ل هه‌رێما كوردستانێ، چونكه هه‌رێما كوردستانێ یا زه‌نگینه ب غازا سروشتی و هه‌كه په‌ترۆل ل جیهانێ ژی نه‌مینیت، غازا سروشتی ل هه‌رێما كوردستانێ وه‌سا یا زۆره كو هه‌ر دێ مینیت.
د. بێوار خنسی، شیره‌تكارێ سه‌رۆكێ حوكمه‌تا هه‌رێما كوردستانێ، گۆت” یا گرنگه كو حوكمه‌تا هه‌رێما كوردستانێ یا ده‌ست ب پیشه‌سازیكرنا غازا سروشتی ل هه‌رێما كوردستانێ كری و سه‌رۆكێ حوكمه‌تا هه‌رێمێ ب خوه ژی ل سه‌ر خه‌ته و هاریكاریا كۆمپانیان دكه‌ت بۆ وێ چه‌ندێ داهاتێ غازا سروشتی بۆ رێژه‌كا باش بهێته زێده‌كرن و غازا سروشتی یا پێدڤی بۆ هه‌رێما كوردستانێ دابین بكه‌ت، بۆ وێ چه‌ندێ ژی كار ل سه‌ر هاتیه كرن و دێ هێته كرن ژی، ژ به‌ركو 70% ژ غازا سروشتی یا هه‌رێما كوردستانێ بۆ كاره‌بێ یه و كار یێ دهێته كرن بۆ وێ ئێكێ غازا سروشتی نه‌هێته سوتن و ب هه‌ده‌ر نه‌چیت”.
د. بێوار خنسی ئه‌وژی گۆت” به‌رده‌وام داهاتێ غازا سروشتی ل هه‌رێما كوردستانێ د زێده‌بوونێ دایه و كارێ جدی دێ هێته كرن بۆ وێ چه‌ندێ ببیته ژێده‌ره‌كی سه‌ره‌كی ل هه‌رێمێ، چونكه هه‌كه وه‌كو خام بهێته فرۆشتن، یان بهێته بكارئینان، ژ داهاتێ په‌ترۆلێ زێده‌تره، ژبه‌ر وێ چه‌ندێ هه‌رێما كوردستانێ گه‌له‌ك یا زه‌نگینه ب غازا سروشتی”.
خنسی پتر رۆهنكر” هه‌رێما كوردستانێ وه‌سا یا زه‌نگینه ب غازا سروشتی هه‌كه بهێت و په‌ترۆل ل جیهانێ نه‌مینیت ژی، غازا ل هه‌رێما كوردستانێ هه‌ر دێ مینیت و شاره‌زایێن وی بیاڤی به‌حس ل وێ ئێكێ دكه‌ن، هه‌كه ب وی شێوه‌ی داخوازی ل سه‌ر په‌ترۆلێ هه‌بیت، دبیت هه‌تا 40 سالێن بهێت بمینیت، به‌لێ غازا سروشتی دێ تێرا 65 سالێن دی كه‌ت، چونكه هه‌رێما كوردستانێ گه‌له‌ك یا زه‌نگینه ب غازێ و گه‌له‌ك وه‌لات بزاڤێ دكه‌ن ب رێیا كۆمپانیێن مه‌زن بهێن كاری د بوارێ غازا سروشتی دا ل هه‌رێما كوردستانێ بكه‌ن، له‌وما غازێ گرنگیه‌كا مه‌زن بۆ هه‌رێما كوردستانێ یا هه‌ی”.
