د. خلیل غازی دۆسكی: پارتی وه‌رگرتنا پوستێ سه‌رۆك كوماری وه‌كو مافه‌ك بۆ كوردستانیان نه‌كو بو ئالیه‌كێ دزانیت
ءءئه‌ڤرۆ، سالار دۆسكی:
ئه‌ندامه‌كێ جڤاتا نوونه‌ێن ئیراقێ راگه‌هاند، پێدڤییه ئالیێن سیاسی زێده‌تر بگه‌هنه وێ باوه‌ریێ كو ل دووڤ سه‌نگا خوه یا ده‌نگان دهه‌لبژارتنان دا پۆستان ل به‌غدا وه‌ربگرن و كار ل سه‌ر رێكخستن و ئێكرێزیا ناڤمالا كوردی بهێته‌كرن.
د.خلیل غازی دۆسكی، ئه‌ندامێ جڤاتا نوونه‌ێن ئیراقێ ژ فراكسیونا پارتی دیموكراتی كوردستان بۆ ئه‌ڤرۆ گوت”پارتی دیموكراتی كوردستان وه‌رگرتنا پوستێ سه‌رۆك كوماری بمافێ خوه دزانیت و به‌ربژارێ مه ( رێبه‌ر ئه‌حمه‌د)ه و ب هیڤی نه ل نێزیك سه‌رۆك كومار بهێته هه‌لبژارتن و كار بۆ دروستكرنا حوكمه‌تا نوو ل ئیراقێ دنێزیكترین ده‌مدا بهێته‌كرن”.
غازی ئه‌و ژی گوت” تێكچوونا كاودانێن ئیراقێ ژ روویێ ئه‌منی و ئابووری و سیاسی بۆ نه‌باوه‌ریا ئالیێن سیاسی ڤه‌دگه‌ریت كو باوه‌ری ب ئێك دو نینه و ئه‌و ئیراقا به‌ری سالا 2003 كار بۆ دهاته‌كرن كو ل سه‌ر بنیاتێ هه‌ڤپشكیێ تنێ ئاخفتن بوو و نه‌بوو كریار به‌لكو پشتی 2003 ئالیێن سیاسی بۆ هنده‌ك مه‌ره‌مێن دی كار كر ل ئیراقێ كو نه دبه‌رژوه‌ندیا خه‌لكێ ئیراقێ دابوون و ئه‌و به‌رژوه‌ندیه بوونه ئه‌گه‌ر ئێدی خه‌لكی ژی باوه‌ری ب دروستكرنا وێ ئیراقێ نه‌بیت ئه‌وا خه‌ون پێڤه دیتن”.
خویاكر ” ساله‌ك ده‌ربازبوو ل سه‌ر ئه‌نجامدانا هه‌لبژارتنێن جڤاتا نوونه‌ێن ئیراقێ و هێشتا ئالیێن سیاسی نه گه‌هشتینه ڕێككه‌فتنێ ل سه‌ر دروستبوونا حوكمه‌تێ و گه‌له‌ك ئالۆزی دروست بوون و نه گه‌هشتیه وێ باوه‌ریێ كو ئالیێ سه‌ركه‌فتی ل هه‌لبژارتنان مافێ وی یه حوكمه‌تێ پێكبینیت و گه‌له‌ك بزاڤ هاتنه‌كرن و دیسا تنێ ئه‌ڤه نه ئه‌گه‌ر بوو به‌لكو گه‌له‌ك مایتێكرنا وه‌لاتێن هه‌رێمی ژی د كارۆبارێن ئیراقێ دا و هه‌ر وه‌لاته‌كی بۆ به‌رژوه‌ندیێن خوه كار دكر پێخه‌مه‌ت پاراستنا سه‌نگ و هێزا خوه ل ئیراقێ و هه‌لبه‌ت ئه‌ڤه ژی نه د به‌رژوه‌ندیا خه‌لكێ ئیراقێ دا بوو و هه‌ر خه‌لك بوونه قوربانی و نه‌شیان ب ده‌نگێن خوه نوونه‌رێن خوه بۆ دروستكرنا حوكمه‌تێ هه‌لبژێرن”.
ئاماژه‌كر ژی” نابینم ل نێزیك حوكمه‌ت بهێته دروستكرن راسته نزیكبوونه‌ك دناڤبه‌را ئالیێن سیاسی دا ل ئیراقێ یا هه‌ی لێ ئه‌ڤه وێ نا گه‌هینیت كو حوكمه‌ت زی بهێته پێكئینان،لێ هه‌تا به‌ری سالا نوو حوكمه‌ت نه‌هێته پێكئینان دێ گه‌له‌ك زیان گه‌هیته خه‌لكێ ئیراقێ لێ مه باوه‌ری یا هه‌ی سه‌رۆك كومار ل نێزیك بهێته هه‌لبژارتن”.
ل دور چاره‌سه‌ریێ ژی، گوت” تنێ چاره‌سه‌ری نێزیكبووونا ئالیێن سیاسی یه و پێكئینانا حوكمه‌ته‌كا به‌روه‌خت بۆ بڕێڤه‌برنا وه‌لاتی، هه‌روه‌سا هه‌لبژارتنێن پێشوه‌خت نابینم چاره‌سه‌ری چونكه هه‌ر ئالیه‌كێ سیاسی سه‌نگ و قه‌وارا خوه دزانیت و بتنێ چاره‌سه‌ری ئه‌وه نێزیكیبوونه‌كا نشتیمانی د ناڤبه‌را هه‌موو ئالیان دا دروست بیت و ڤان ئالیان هه‌ستێ نشتیمانپه‌روه‌ریێ هه‌بیت و تنێ هیڤیا وان بۆ گه‌لێن ئیراقێ بیت”.
د.خه‌لیل غازی دۆسكی رۆهنكر ژی” بۆ ڤێ قوناغێ ئێكگرتنا ناڤمالا كوردی ژ هه‌ر قوناغه‌كێ گرنكتره و گرنگه گوتارا كوردی ل به‌غدا ئێك بیت و هه‌موو ئالیێن كوردی بگه‌هنه وێ باوه‌ریێ كو هه‌ر ئێك ل دووڤ سه‌نگ و كورسییێن خوه داخوازا ماف و ئه‌ركان بكه‌ت”.
