د مەراسیمەكا تایبەت دا تەرمێ محەمەد خالد بوسەلی هاتە ڤەشارتن
ئەڤرۆ
زاخۆ، عەلی حاجی:
ب بەرهەڤبوونا فازل میرانی، بەرپرسێ دەستەیا كارگێریا مەكتەبا سیاسی یا پارتی دیموكراتی كوردستان و سیداد بارزانی، نوونەرێ سەرۆك مەسعود بارزانی و د. پشتیوان سادق، بەرپرسێ مەكتەبا رێكخستنا پارێزگەها دهۆكێ و پارێزگەرێ دهۆكێ و سەرپەرشتێ ئیدارەیا سەربخوە یا زاخۆ و بەرپرسێن لقێن بەهدینان و بەرپرسێن لەشكری و ئەمنی و كەسایەتیێن دەڤەرا زاخۆ، د رێورەسمەكێ تایبەت دا تەرمێ پێشمەرگێ هەردو شۆڕەشێن ئیلۆن و گۆلانێ خودێ ژێ رازی محەمەد خالد بوسەلی هاتە ڤەشارتن.
فازل میرانی د رێورەسمێن ڤەشارتنا تەرمێ خودێ ژێ رازی دا و د پەیڤەكێ دا گۆت: “هەر ژ مەندەلی هەتا باژێڕێ زاخۆ محەمەد خالد بوسەلی ناڤەكێ دیارە و دەڤەرا زاخۆ و بەهدینان شاهدن بۆ قارەمانیا وی، خودێ ژێ رازی پێشمەرگەیێ هەردو شۆڕەشێن ئیلۆن و گولانێ بوو، محەمەد خالد ئێك ژ وان فەرماندەیان بوو، كو ل بەر دەستێ شەهید عەلی هالوی رابۆیی، بەلێ یا كو تێبینی هاتیە كرن گەلەك هەڤالێن وی ئەڤرۆ د گەل مە دا پشكدار نەبووینە، ژ بەر كو پڕانیا وان د ژیانێ دا نەماینە، ژ دەستدانا محەمەد خالد خەمەكا گرانە بۆ مە هەمیان، گوندێ بوسەلێ گوندەكێ بچیكە، بەلێ قارەمانێن مەزن لێ رابووینە، شەهید عەمەر محەمەد دا جهێ بابێ خوە گریت، ئەگەر یێ ساخ با، بەلێ شەهید بوونا وی زێدەتر محەمەد خالد ئێشاند و هەر جهەكێ زەحمەتبا د دەمێ شۆڕەشێ و شەڕێ داعشێ دا ناڤبری دا ژ بەریا هەمیان بێژیت ئەز دێ چم و هوین نەهێن، بەلێ هەكە د دەمێ شۆڕەشێ دا كەسانێن وەكی محەمەدی ژ دەست دابان دا شۆڕەش راوەستیت، ب مێرخاسیا وان شۆڕەشێن مە د بەردەوام بوون، دیسا بەرهەڤبوونا ڤێ رێژەیا مەزن ژ كەسایەتیێن دەڤەرێن كوردستانێ نیشانێ وێ چەندێ یە، كو حەقەكێ ل سەر مە هەیی و ئەم یێ بزاڤێ دكەین وی حەقی بدەین”.
فازل میرانی د درێژاهیا پەیڤا خوە دا گۆتژی: “ژ دەستدانا ڤان قارەمانان نابیت باوەریا مە كێم بكەت، بەلكو پێدڤیە زێدەتر ببیت و ئەڤە مێژوویا مە یا كوردستانێ و پارتی دیموكراتی كوردستانە، بەلێ پێدڤیە ب شێوەیەكێ زانستی بەردەوام بین ل سەر رێبازا ڤان قارەمانان، گەلەك نەحەزێن ناڤخوەیی و ژ دەرڤە وەسا دیار دكەن، كو چ نەهاتیە كرن، بەلێ گەلەك كار هاتیە كرن و هێشتا گەلەك یا مایی ژی، ژ بەر كو خەلكێ مە ژ هەژی هندێ یە كارێن باشتر بۆ بهێتە كرن، ژ بەر كو خەلكی گەلەك زەحمەتی یا دیتی هەتا گەهشتیە ئەڤرۆ، ئیدارەیا سەربخوە یا زاخۆ پێنگاڤەكا گەلەك باش بوو، ژ بەر كو كارەكێ باش ل زاخۆ یێ هاتیە كرن و دێ هێتە ئەنجامدان ژی، سەرەخوەشیێ ل سەرۆك مەسعود بارزانی و ل خوە و هەموو خەلكێ كوردستانێ دكەم ژ بۆ ژ دەستدانا محەمەد خالد بوسەلی و داخوازێ ژ خودێ دكەین جهێ وی بهەشتا بەرین بیت”.
