د گەڕا دویێ دا سەرۆک کۆمارێ ئیرانێ دێ هێتە هەلبژارتن
هەلبژارتنێن سەرۆک کۆماریێ ل ئیرانێ برێڤە چوون و د گەرا ئێکێ دا چو بەربژارەکێ نەشیا پتر ژ ٥٠٪ دەنگان بدەستڤە بینیت و ژ بەر ڤێ یەکێ ژی هەلبژارتن چوونە گەرا دویێ و دێ د ناڤبەرا مەسعود پزشکیان و سەعید جەلیلی دا ئێک بیتە سەرۆک کۆمارێ ئیرانێ.
موحسن ئیسلامی پەیڤدارێ کۆمسیۆنا هەلبژارتنان یا ئیرانێ راگەهاند کو د گەرا ئێکێ یا هەلبژارتنان دا مەسعود پزشکیان بەربژارێ ریفۆرمخوازان شیایە پتر ژ ١٠ ملیۆن دەنگان بدەستڤە بینیت و ل هەمبەر دا سەعید جەلیلی ژی شیایە پتر ژ ٩ ملیۆن دەنگان بدەستڤە بینیت، چونکی د گەرا ئێکێ یا هەلبژارتنان دا چو بەربژارەکێ نەشیایە پتر ژ ٥٠٪ دەنگان بدەستڤە بینیت دێ د گەرا دویێ یا هەلبژارتنان دا سەرۆک کۆمارێ نوو یێ ئیرانێ هێتە هەلبژارتن، هەلبژارتن ژی دێ ل رۆژا ٥ مەها حەفت هێنە کرن و دێ هەڤڕکی د ناڤبەرا سەعید جەلیلی و مەسعود پزشکیان دا بیت و کیژ ژ وان پڕانیا دەنگان بدەستڤە بینیت دێ بیتە سەرۆک کۆمارێ نوو یێ ئیرانێ.
ل ئالیێ دی ل گۆر دەزگەهێن راگەهاندنا ئیرانێ د گەرا ئێکێ یا هەلبژارتنێن سەرۆک کۆمارێ دا رێژەیا پشکداریێ یا وەلاتیان گەلەک کێم بوو و ل چو پارێزگەهەکا ئیرانێ رێژە نەگەهشتە ٥٠٪ و رێژا هەری زێدە ٤٦٪ بوویە و ل تەهرانێ رێژە نەگەهشتیە ٢٠٪.
د ڤێ دەربارێ دا شەهریار ئەحمەدی چاڤدێرێ سیاسی یێ رۆژهەلاتێ کوردستانێ ژی دیار کر، هەلبژارتنێن سەرۆک کۆماریێ ل ئیرانێ چو کاریگەریا خوە ل سەر ژیانا وەلاتیان نینە، ئانکۆ ب کورتی کی بیتە سەرۆک کۆمار ژی چو گوهۆڕینەک ل ئیرانێ روو نادەت، چونکی سەرۆک کۆماری دەستهەلاتەکا وەسا نینە کو بشێت گوهۆڕینێن مەزن د سیاسەتا دەرڤە یان ژی یا ناڤخوە یا ئیرانێ دا بکەت، بەلکو سەرۆک کۆمار تنێ دێ فەرمانێن رێبەرێ شۆرەشا ئیسلامی یا ئیرانێ بجه ئینیت و نەشێت چو گوهۆڕینان بکەت، یا دی نها ئاریشا سەرەکی یا خەلکێ ئیرانێ رەوشا ئابووری یە، ئیران د قەیرانەکا گەلەک مەزن دایە، ب هزاران نۆشدار ئەڤسالە ل ئیرانێ ڕەڤین، خوەدانکار ئێدی پارێ خوە دبەنە دەرڤەی ئیرانێ، ب گشتی رەوشا ئابووری گەلەک خرابە و سەرۆک کۆمارێ نوو ژی نەشێت بۆ چارەسەرکرنا قەیرانا ئابووری چو تشتەکێ بکەت، ژ بەر ڤێ یەکێ ژی خەلک گەلەک ژ ڤان هەلبژارتنێن بێ هێڤینە و ناچنە سەر سندۆقێن دەنگدانێ.
ل ئالیێ دی چاڤدێرێن سیاسی یێن ئیرانێ ژی دیار دکەن، رێژەیا گەلەک کێم یا پشکداریا وەلاتیان ژی نیشا ددەت خەلک ژ سیستەمێ نها یێ ئیرانێ رازی نینن، کی بیتە سەرۆک کۆمارێ ئیرانێ ژی نەشێت چو بۆ خەلکی بکەت، ئانکۆ قەیرانا ئابووری دێ بەردەوام بیت، خەلک ژی باش دزانن سەرۆک کۆمار نوو ژی نەشێت ژ بۆ چارەسەرکرنا قەیرانا ئابووری چو تشتەکێ بکەت.
