راهێنه‌رێ ئیراقێ: پشككێشان یا هه‌ڤسه‌نگه و ئارمانجا مه ده‌ربازبوونه
قەیس وەیس:
ل باره‌گایێ فیدراسیۆنا ته‌پا پێی یا ئاسیا ل پایته‌ختێ مالیزییا كۆالالمبۆر پشككێشانا قۆناغا دویێ یا ڤاڤارتنێن ئاسیا ده‌ربازبوون بۆ مۆندیالا جیهانی 2026 و كۆپا ئاسیا 2027ێ هاته ئه‌نجامدان.
د پشككێشانێ دا 36 هه‌لبژارتی بۆ نه‌هـ كۆمان هاتنه به‌لاڤكرن، هه‌ر كۆمه‌ك چار هه‌لبژارتی هاتنه دانان، یاریێن وان دێ ب شێوه‌یێ خول دو قۆناغ هێنه كرن، هه‌ڤڕكیێن گه‌ڕا ئێكێ دێ ل ده‌ستپێكا چریا دویێ یا ئه‌ڤ ساله هێنه كرن هه‌تا خزیرانا 2024ێ یاریێن كۆمان ب دووماهی هێن، دو هه‌لبژارتی یێن هه‌ر كۆمه‌كێ دێ ده‌ربازبنه قۆناغا سێیێ بۆ ڤاڤارتنێن ئاسیا و د هه‌مان ده‌مدا ئه‌ڤ هه‌لبژارتییه دێ پلێتا قاره‌مانییا كۆپا ئاسیا 2027 ل سعۆدیێ وه‌رگرن.
دیسان پشككێشانا قۆناغا سێیێ یا ڤاڤارتنێن مۆندیالێ دێ ل سالا 2024ێ هێته كرن كو ئه‌و 18 هه‌لبژارتیێن ده‌ربازبوو بۆ ڤێ قۆناغێ هێنه به‌لاڤكرن ل سه‌ر سێ كۆمان، هه‌ر كۆمه‌ك شه‌ش تیم، خودانێن رێزێن ئێكێ و دویێ دێ ئێكسه‌ر ده‌ربازبنه مۆندیالا 2026ێ ئه‌وا دێ ل وه‌لاتێن كه‌نه‌دا و مه‌كسیك و ئه‌مریكا هێنه كرن، ئه‌و هه‌ردو پلێتنێن دی یێن ئاسیا دێ هێنه دیار كرن پشتی هه‌ڤڕكیێن پاشكۆ یێن یێن دناڤبه‌را كێشوه‌ران دا دهێته كرن دێ دیاربیت، پشككێشان بڤی ره‌نگی هاتیه كرن
كۆما ئێكێ: قه‌ته‌ر، هندستان، كوه‌یت، سه‌ركه‌فتیێ ئه‌فغانستان و مه‌نگۆلیا
كۆما دویێ: چاپان، سوریا، كوریا باكۆر، سه‌ركه‌فتیێ میانمار و ماكاو
كۆما سێیێ: كوریا باشۆر، چین، تایله‌ند، سه‌ركه‌فتیێ سانگاپۆرا و غۆام.
كۆما چارێ: عومان، قیرغستان، مالیزیا، سه‌ركه‌فتیێ چین تایبیه و تیمۆرا رۆژهه‌لات.
كۆما پێنجێ: ئیران، ئۆزپاكستنان، توركمانستان، سه‌ركه‌فتیێ هۆنگ كۆنگ و بۆتان.
كۆما شه‌شێ: ئیراق، فێتنام، فلێپین، سه‌ركه‌فتیێ ئه‌ندۆنیسیا و برۆنای.
كۆما حه‌فتێ: سعۆدییه، ئوردن، تاچاكستان، سه‌ركه‌فتیێ كه‌مبۆدیا و پاكستان.
كۆما هه‌شتێ: ئیمارات، به‌حره‌ین، سه‌ركه‌فتیێ یه‌مه‌ن و سریلانكا، سه‌ركه‌فتیێ نبپال و لاوس
كۆما نه‌هێ: ئوسترالیا، فله‌ستین، لوبنان، سه‌ركه‌فتیێ مالدیڤ و به‌نگلادش.
راهێنه‌رێ هه‌لبژارتیێ ئیراقێ پشككێشانا ب هه‌ڤسه‌نگی دا زانین و گۆت: سه‌رباری چو یاری ب سانه‌هی نینن تایبه‌ت د ته‌پا پێی دا ژبه‌ركو قۆناغا كۆمان هه‌می هه‌لبژارتی دێ شه‌ڕی بۆ ده‌ربازبوونێ كه‌ن و كۆما مه یا باشه، بۆ هه‌ر قۆناغه‌كێ دێ ب ئاوه‌یه‌كێ جودا سه‌ره‌ده‌ریێ دگه‌ل ڤاڤارتنان كه‌ین پێخه‌مه‌ت گه‌هشتنا خه‌ونا جه‌ماوه‌رێ ئیراقێ و ده‌ربازبوون بۆ مۆندیالا 2026ێ، هیڤییا مه ئه‌وه هه‌می لایه‌ن هاریكاربن پێخه‌مه‌ت گه‌هشتن بۆ ڤێ ئارمانجێ.
