راهێنەری دەست ژ كارێ خوە كێشا و هەلبژارتیێ دهۆكێ تووشی خوسارەتیەكا گران بوو
تیما تەپا پێی یا هەلبژارتیێ پارێزگەها دهۆكێ ب ئەنجامەكێ گران تووشی خوسارەتیێ بوو بەرامبەر هەلبژارتیێ پارێزگەها هەولێرێ ب چار گۆلان بەرانبەر گۆلەكێ د یارییا واندا ئەوا ل ئەینیا بۆری ژ چارچووڤێ قارەمانییا ئیراقێ و كۆما دەڤەرا هەرێما كوردستانێ ل یاریگەها یانەیا دهۆك هاتییە كرن.
هەرچەندە ل دەستپێكێ هەلبژارتیێ دهۆكێ شیابوو گۆلا ئێكێ د خولەكا 31ێ دا ژلایێ ئەحمەد سەبری بینیت، لێ د خولەكا زێدەكری یا نیڤا ئێكێ دا یاریزانێ یانەیا دهۆك و هەلبژارتیێ پارێزگەها هەولێر ژیار گۆڤەند شیا گۆلا وەكهەڤیێ بینیت، د نیڤا دویێ و پشتی دوورئێخستنا یاریزانێ دهۆكێ رەمەزان سەدیق ب كارتا سۆر و لێدانا پەنەلتیێ بۆ هەولێرێ، تیما مێڤان شیان گۆلا وەكهەڤیێ و دووڤدا دو گۆلێن دی تۆماربكەت و یاری د بەرژەوەندیا خوە دا ب چار گۆلان بەرانبەر گۆلەكێ ب دووماهی بینن و رێكا دەربازبوونێ بۆ دهۆكێ ب زەحمەت لێبكەن.
راهێنەری دەست ژ كارێ خوە بەردا
پشتی یاری ب دووماهی هاتی ئێكسەر راهێنەرێ هەلبژارتیێ دهۆكێ عەلی وەحیددین دەست كاركێشانا خوە راگەهاند و پێشكێشی ئێكەتییا تەپا پێی یا پارێزگەهێ كر، ئەوێ بۆ راگەهاندنێ حێبەتییا خوە دیار كر ب ئاست و ئەنجامێ نە چاڤەڕێ كری یێ تیما خوە.
ژلایێ خوەڤە ب هەمان كۆم دا هەردو هەلبژارتیێن سلێمانی و كەركووك ب گۆلەكێ وەكهەڤ بوون یاریا، بۆ زانین شێوازێ قارەمانیێ خول ئێك قۆناغە دو هەلبژارتی دێ دەربازبنە قۆناغا دویێ و دووماهیێ، ئەوا 16 هەلبژارتیێن پارێزگەهان پشكداری كرییە و هاتینە بەلاڤكرن ل سەر چار كۆمان ل دووڤ دەڤەرێن جودا، هەلبژارتیێ دهۆكێ بۆ جارا ئێكێ یە پشتی 33 سالان پشكداری قارەمانیێ بوویە.
