راهێنەرێن دهۆك و زاخۆ: ئەركێ مە ب سانەهی نابیت لێ پلان بۆ سەركەفتنێ هاتیە دانان
ئەڤرۆ
دهێتە چاڤەڕێ كرن ئەڤرۆ ژی پێنچ یاریێن مایی ژ گەڕا19ێ و دووماهیا قۆناغا ئێكێ بۆ یانەیێن پلا نایابا ئیراقێ یا تەپا پێی بهێنە ئەنجامدان، ئەوا هەردو یانەیێن دهۆك و زاخۆ ب ژڤانن یاریێن خوە بۆ دەستڤە ئینانا ئەنجامەكێ باش و دووماهیەكا سەركەفتنی بهێنە دناڤ یاریگەهێ دا.
زاخۆ دێ بۆ قەرەبوویا خالان كەت.
ل دەمژمێر 1:45 نیڤرۆ تیما یانەیا زاخۆ ب ژ ڤانە ل باژێرێ بەسرا ببیتە مێڤانا یانەیا نەفت یا بەسرایی د یاریەكا پری هەڤڕكی دا، كوڕێن خابووری ئەوێن 21 خال كۆمكرین ژ پێنچ سەركەفتن، شەش وەكهەڤی و حەفت خوسارەتی ل رێزا 13ێ دهێت، وەكو ئاست و ئەنجام شیایە د شەش یاریێن بۆری دا بتنێ ئێك خوسارەتی، وەكهەڤیەك و چار سەركەفتنان بینت، لێ بەرانبەری وێ تیما نەفت ئەلبەسرا خودانا 24 خالان رێزا نەهێ دهێت.
حەیدەر عەبدولئەمیر راهێنەرێ زاخۆ دیاركر بۆ رۆژناما ئەڤرۆ گۆت: ئەم پێدڤی ب سەركەفتنێ نە ژبۆ پێشكەفتن بەر ب رێزێن باشتر بەری ب دووماهی هاتنا قۆناغا ئێكێ، یاریا مە ب سانەهی نابیت بەرانبەر خودانێن ئەردی ئەوێن ئاست و ئەنجامێن وێ ژ د باشن، دڤێت قەرەبوویا یاریا بۆری و ئاشت بوونا جەماوەرێ خوە بكەین.
دهۆك بەرانبەر دەلیڤا رێزێن پێشیێ.
ژلایەكێ دووڤە تیما یانەیا دهۆكێ ل دەمژمێر 6:45 شەڤ ل یاریگەها خوە یا سەرەكی دێ مێڤانداریا یانەیا زەورا ئێك ژ گرنگترین یاریێن ڤێ گەڕێ و دووماهی تاقیكرن بۆ ئەلهۆیێن چیا ژ قۆناغا ئێكێ، كاروانێ تیما دهۆكێ سەرباری ئاستەنگان د یاریێن بۆری دا گەلەك باش بوویە پشتی هەشت سەركەفتن، حەفت وەكهەڤی و سێ خوسارەتی ئیناین ل رێزا شەشێ دهێت ب 31 خالان وەكو تیمەكا هەڤڕك هاتیە دیتن، بەرانبەری وێ یانەیا زەورا بەرنیاس یا جەماوەری یە 33 خال كۆمكرینە و رێزا پێنجێ دهێت لێ د سێ یاریێن بۆری دا سێ وەكهەڤی ل دووڤ ئێك ئیناینە وبوویە جهێ نەرازیبوونا جەماوەرێ وێ، لەوما ئەڤ یاریە دێ با بزەحمەت بیت، دیدارێن هەردو یانەیان 11 سەركەفتن بۆ زەورا بوویە و پێنچ سەركەفتن بۆ دهۆكێ و شەش وەكهەڤی هاتینە.
سلێمان رەمەزان راهێنەرێ تیما دهۆكێ یاریا ئەڤرۆ ئێك ژ هێزترین یاریێن خوە یێن ڤێ گەڕێ دانا و گۆت: ژبەركو دێ دناڤ ئەرد و جەماوەرێ خوە دا كەین پێدڤی یە مفایی ژێ وەربگرین، هەموو یاریزان بەرهەڤن ژبلی محەمەد نیزال و ژیار گۆڤەند ژبەر هنگاڤتنێ، لێ گەشبینم ل دووڤ پلانا بوو هاتیە دانان سێ خالێن یاریێ دەستڤە بینن سەرباری ئەركێ مە ب سانەهی نابیت بەرانبەر تیمەكا وەكو زەورا.
ژ یاریێن دی یێن ئەڤرۆ ، جەویە- نەوروز، كەربەلا- نەفت ئەلوەسەت، تەلەبە- نەجەف.
