راگرتنا پەترۆلا هەرێما كوردستانێ نیزیكێ 10 ملیار دۆلاران زیان گەهاندینە ئیراقێ
دووڤچوون:
بەرپرسێ فەرمانگەها پەیوەندیێن دەرڤە یێن حوكمەتا هەرێما كوردستانێ راگەهاند، زەرەرا راگرتنا پەترۆلا هەرێما كوردستانێ نێزیكێ 10 ملیار دۆلاران بوویە و گۆت: ئیراق داخوازا گوژمێ ملیار و نیڤ دۆلاران وەكە قەرەبوو ژ توركیا دكەت، نێزیكێ 11 هەیڤانە هنارتنا پەترۆلا هەرێما كوردستانێ هاتیە راگرتن، ب راگرتنا هنارتنا پەترۆلا هەرێما كوردستانێ ژی، نێزیكێ 10 ملیار دۆلار زەرەر گەهشتیە ئیراقێ.
سەفین دزەیی، بەرپرسێ فەرمانگەها پەیوەندیێن دەرڤە یێن حوكمەتا هەرێما كوردستانێ راگەهاند، ل هەردوو كۆنفرانسێن میونشن و دوبەی هەرئێك ژ سەرۆكێ هەرێما كوردستانێ و سەرۆكێ حوكمەتا هەرێمێ كۆمبوون دگەل سەركردێن پشكداربوو یێن وان هەردوو كوپیتكان سازكرن و ب هووری رەوشا دەڤەرێ رۆژهەلاتا ناڤین و بوویەرێن ئەمنی شروڤە كرن و هەردەم هەرێما كوردستانێ پشكداریا بەرچاڤ هەبوویە ل هەردوو كۆنفرانسێن میونشن و دوبەی.
سەفین دەزیی ئاماژە ب وێ ژی كر، د هەڤدیتنێن سەرۆكێ هەرێما كوردستانێ و سەرۆكێ حوكمەتا هەرێما كوردستانێدا بەحسا پەیوەندیێن ناڤبەرا هەولێر و بەغدا و ئەو ئاریشێن كو نوكە هەنە كرن و هەروەسا گۆتۆبێژ ل سەر رێكێن چارەسەریێ ژی كرن، راستە هەرێما كوردستانێ پشكەكە ژ عێراقا فیدرال، بەلێ یاریكەرەكێ سەرەكییە ل هاوكێشەیێن سیاسیێن دەڤەرێ و هەروەسا د روویێ ئەمنی ژی پێشمەرگە تاتویێن داعشێ تێكبشكینیت و بەرپابوونا ئاسایشێ ل دەڤەرێ خالەكا سەرەكی بوویە و جهێ گرنگیدانا هەمی لایەكێیە.
راگەهاند، ئەو بوویەرێن كۆ ل رۆژهەلاتا ناڤین چێ دبن ب تایبەت بوویەرێن عێراقێ و سووریا و هەروەسا غەززه، مژارا سەرەكی یا وان كۆنفرانسا بوون.
هەڤدەم دەربارێ دەستپێكرنا هنارتنا پەترۆلا هەرێما كوردستانێ بۆ دەرڤە، سەفین دزەیی ئاماژە ب وێ كر، گۆتۆبێژ دناڤبەرا هەولێر و بەغدا ل سەر كۆمەكا مژارا بەردەوامە، بەری نوكە بەحسا وێ ئێكێ دهاتە كرن كۆ توركیا رێكێ نادەت پەترۆلا هەرێما كوردستانێ بچیت، بەلێ توركیا زۆر ب ئاشكرا گوتیە كو ئەو رێگر نینە و ئاریشێن تەكنیكی ژی هاتینە چارەسەر كرن و تەپا كەتیە گۆرەپانا بەغدا، ئاریشەك دناڤبەرا ئەنقەرە و بەغدا هەیە دڤێت ئەو ب خو چارەسەر بكەن.
زەلال ژی كر، ژبەر بریارا دادگەها پاریس، ئاریشەك دناڤبەرا بەغدا و ئەنقەرە هەیە و دڤێت ئەو دناڤبەرا خوەدا چارەسەر بكەن، ئیراق داخوازا گوژمێ ملیار و نیڤ دۆلاران وەكە قەرەبوو ژ توركیا دكەت، نێزیكێ 11 هەیڤانە هنارتنا پەترۆلا هەرێما كوردستانێ هاتیە راگرتن، ب راگرتنا هنارتنا پەترۆلا هەرێما كوردستانێ ژی، نێزیكێ 10 ملیار دۆلار زەرەر گەهشتیە ئیراقێ.
