راگـرتنا قووناغا ئاشتیێ دێ بیتە ئەگـەرێ ئالـۆزیێن گـەلـەک مـەزن
چاڤدێرێن سیاسی ل تورکیا دیار دکەن، قووناغا ئاشتیێ ژ بۆ چارەسەرکرنا پرسا کوردی و پرسێن دی یێن تورکیا گەلەک گرنگە و نابیت دەستهەلاتا تورکیا ژ بەر هندەک بەرژەوەندیێن جودا قووناغا ئاشتیێ بدەتە راگرتن ئەو یەک زیانا خوە بۆ هەموو تورکیا هەیە.
هەڤسەرۆکا دەم پارتی دیار کر، دەولەتا تورکیا ب کریاری هەتا نها چو نەکریە و ئەو یەک بوویە جهێ دلگرانیا هەموو کوردان، وەکو دەم پارتی ئەو کار دکەن دا قووناغا ئاشتیێ ل تورکیا نەهێنە راگرتن، چونکی راگرتنا قووناغا ئاشتیێ دێ بیتە ئەگەرێ ئالۆزیێن گەلەک مەزن، گەلێ کورد ل تورکیا دلگرانە و دڤێت بەرپرسێن تورکیا ژی هەست ب ڤێ یەکێ بکەن بابەت تنێ راگرتنا شەڕی نینە، بەلکو چارەسەرکرنا پرسا کوردی یە و دڤێت ب کریاری هندەک تشت بهێنە کرن.
ل ئالیێ دی د. ئەکرەم ئۆنەن بسپۆرێ پەیوەندیێن نێڤدەولەتی ژی دیار کر، هەکە دەولەتا تورکیا بڤێت پرسا کوردی چارەسەر بکەت دڤێت هندەک ماددەیێن دستوورێ تورکیا بهێنە گوهۆڕین و هەبوونا گەلێ کورد ل تورکیا ب فەرمی بهێتە قەبوول کرن، هەکە ئەو یەک نەهێتە کرن بێگومان دێ ئاریشەیێن گەلەک مەزن بۆ تورکیا دروست بن، هەتا نها دەولەتا تورکیا چو نەکریە و ژ بەر ڤێ یەکێ ژی باوەریا کوردان ب سۆزێن دەولەتا تورکیا نینە.
زیاد ئامەدی چاڤدێرێ سیاسی ژی دیار کر، بەری نها بەرپرسێن تورکیا دگۆتن دێ پێشڤەچوونێن گەلەک باش دروست بن، دێ رەوش گەلەک باش بیت و گەلەک تشتێن دی گۆتن، لێ هەتا نها چو نەهاتیە کرن، هێشتا ژی دبێژن تورکیا بێ تیرۆر، ئەو یەک سڤکاتیە کو ب گەلێ کورد دهێتە کرن، چونکی بابەت مافێن نەتەوەیی یێن گەلێ کوردە ل تورکیا، بابەت شەڕ و تیرۆر نینە، دڤێت کورد ژی وەکو تورکان ل تورکیا بگەهنە هەموو مافێن خوە، ئەو یەک خێرەک نینە کو دەولەتا تورکیا بکەت، بەلکو ئەو مافێن کو ب سالانە تورکیا ژ کوردان ب زۆرێ وەرگرتینە دڤێت بۆ گەلێ کورد ڤەگەرینیت و هەتا ئەو یەک نەهێتە کرن باوەریا کوردان ژی ب دەستهەلاتا نها ناهێت.
هژمارەک زێدە ژ چاڤدێرێن سیاسی ل تورکیا و باکورێ کوردستانێ ژی هۆشداریێ ددەن هەکە قووناغا ئاشتیێ بهێتە راگرتن دێ زیانێن گەلەک مەزن گەهنە تورکیا، چونکی ئێدی کورد قەبوول ناکەن مافێن وان ببنە قوربانیێن بەرژەوەندیێن هندەک هێزێن سیاسی و هەکە ئاکپارتیێ دڤێت پرسا کوردی چارەسەر بکەت دڤێت ب کریاری هندەک تشتان بکەت، چونکی بابەت تورکیا بێ تیرۆر نینە، بابەت مافێن رەوا و نەتەوەیی یێن گەلێ کوردە ل تورکیا و گرنگە ب رێیا گوهۆڕینا دستوورێ تورکیا گەلێ کورد ژی وەکو گەلێ تورک بگەهنە هەموو مافێن خوە.
