راگەهاندن پێدڤی ب رێكخستنێ یە
سۆلین حەسەن
ب خۆشحالی ڤە پشتی سەرهلدانا بهارا سالا 1991 دەرگەهێن باش بۆ راگەهاندنێ هاتنە ڤەكرن و ب دەهان رادیۆ و تەلەفزیۆن و رۆژنامە و گۆڤار هاتە د مەیدانێ دا و هەر ئێكی ل دووف شیان و شارەزاییا خوە كاركرن و جەماوەرەكێ زۆر ل خوە كۆمكرن، راستە ل دەستپێكێ كەسێن ئەكادیمی نەبوون، هەكە هەبان ژی تەمەت تبلێن دەستان بوون، لێ كار و خەباتەكا باش كرن و گەلەك ژوان بوونە قوتابخانە بۆ پتریا كەنالێن راگەهاندنێ یێن ئەڤرۆ، بۆ نموونە تەلەفزیۆنا دایك (كەنالێ دهۆك تیڤی) كو بەری (33) سالان وەك ئێكەم كەنالێ تەلەفزیۆنی ل دهۆكێ دەست ب بەخشێ خوە كر، هەروەسا حەفتینامەیا (پەیمان) كو پشتی چەند سالان ناڤێ وێ هاتە گوهۆڕین و بۆ رۆژنامەیا (ئەڤرۆ) ئەڤ هەردو دەزگەهە شیان ببنە قوتابخانەیێن پێگەهاندنا ب سەدان، بەلكو پتر ژی ژ كادرێن راگەهاندنێ و هەر كەنالەكێ پشتی وان ڤەبووی هێڤێنێ خوە ژ وان وەرگرتیە و جهێ خۆشحالیێ یە ل شوونا كەنالەكێ تەلەفزیۆنی نوكە مە نێزیكی دەه كەنالان یان پتر بەس ل سنۆرێ پارێزگەها دهۆكێ هەنە، زێدەباری هژمارەكا رۆژنامە و گۆڤاران و ئەڤە هەموو ب كادر و كارمەندێن خوە ڤە جهێ رێزگرتنێ نە، لێ یا مە دڤێت ل ڤێرە بێژین كارێ پتریا وان پێدڤی ب ڤەژەنكرن و رێكخستەكا نوویە، چنكو ئەم وەك بینەر یان گوهدار یان خواندەڤان هەست ب وێ چەندێ دكەین كو جۆرە بەرەللاییەك هەیە و هەكە كارێ وان بهێتە رێكخستن دێ شێن باشتر پەیاما خوە گەهینن، هەروەسا دێ ژنوو دیار بیت نەهەر كەسەكێ مایكێ ب هەلگریت مەدیاكارە.
یا من دڤێت ل دووماهیێ بێژم كو فەرە سەندیكا رۆژنامەڤانێن كوردستانێ كوردستانێ، ب هەماهەنگی ل گەل جهێن شۆلەژێ بەرنامەیەكێ گونجای بۆ رێكخستنا كارێ رۆژنامەڤانی دانن، بۆ نموونە هندەك خۆل و وركشۆپان بۆ ڤەكەن و وان فێری ئەتەكێتێن دروست یێن رۆژنامەڤانیێ بكەن و هەكە ئەڤ چەند هاتە كرن و كەسانێن ئەكادیمی و شارەزا ب وی كاری رابوون، ل وی دەمی دێ كارێ راگەهاندنێ پێنگاڤێن باش بەرپێشڤە هاڤێن و مایك هەلگر ژی دێ كێمتر لێ هێن.
