رژێما بەشـاری ژناڤچوو و رەوشا نەئاسـایی ل رۆژئاڤایێ کـوردستانێ هاتە راگـەهاندن
بەشار ئەسەد ژ سووریێ رەڤی و چەکدارێن تەحریر شام ژی دیار کرن وان دیمەشق کۆنترۆل کر و دووماهی ب دەستهەلاتا بەشاری هات و رێڤەبەریا خوەسەر یا رۆژئاڤایێ کوردستانێ ژی بارێ نەئاسایی راگەهاند و داخواز ژ خەلکی کر خوە چەکدار بکەن.
چەکدارێن دەستەیا تەحریر شام چوونە ناڤ دیمەشقێ و راگەهاندن کو بەشار ئەسەد ژ سووریێ ڕەڤیە و دەستهەلاتا وی ب دووماهی هات و ئێدی قۆناغەکا نوو ل سووریێ دەستپێکریە.
ل ئالیێ دی دۆنالد ترامپ سەرۆکێ ئەمریکا ژی راگەهاند کو سەردەمێ دەستهەلاتا بەشاری ل سووریێ ب دووماهی هات و قۆناغەکا نوو ل وی وەلاتی دەستپێ دکەت و هیڤی خواست کو هەموو پرسێن هەی ب رێیێن ئاشتیانە بهێنە چارەسەرکرن.
گەلەک سەرکردێن دی یێن جیهانێ ژی راگەهاندن کو ب دووماهی هاتنا دەستهەلاتا بەشاری دێ رەوشا سووریێ ئالۆزتر لێ هێت و دڤێت دەستەیا تەحریر شام ب رێیا دانوستاندنان ل گەل هەموو هێزێن دی پێکڤە حوکمەتەکا نوو ئاڤا بکەن و رێزێ ل هەموو پێکهاتەیێن ل سووریێ بگرن دا چو قەیرانێن دی ل سووریێ روو نەدەن.
ل ئالیێ دی مەزلوم عەبدی فەرماندارێ گشتی یێ هێزێن سووریا دیموکرات راگەهاند کو ب دووماهی هاتنا رژێما دکتاتور یا بەشار ئەسەدی قۆناغەکا نوو ل سووریێ دەستپێکریە، لێ مەترسیێن مەزن ژی ل سەر سووریێ هەنە و نها هەموو هێزێن وان د ئامادەباشیێ دانە و دێ ل هەمبەر هەر مەترسیەکێ ژی خەلکێ خوە پارێزن.
رێڤەبەریا خوەسەر یا رۆژئاڤایێ کوردستانێ ژی دوهی د داخۆیانیەکێ دا راگەهاند وان بارێ نەئاسایی ل هەموو رۆژئاڤایێ کوردستانێ راگەهاندینە و نها هەموو هێزێن سەربازی و هێزێن ئێمناهیێ د ئامادەباشیەکا تەمام دانە، چونکی یا نها ل سووریێ روو ددەست دەستپێکەکا نوو یە و دێ کاریگەریا خوە ل سەر هەموو دەڤەرێ کەت و ژ بەر ڤێ یەکێ ژی داخواز ژ هەموو خەلکی کرن کو چەکی راکەن و ل هەمبەر هەر مەترسیەکێ خوە پارێزن.
چاڤدێرێن سیاسی ژی دیار دکەن، نها گەلەک سیناریۆ بۆ قۆناغا نوو ل سووریێ هەنە لێ چو سیناریۆیەک بێی رازیبوونا ئەمریکا و ئسرائیلێ یا سەرکەفتی نابیت، نها هێزێن ئسرائیلێ ژ گرێن جۆلانێ هاتینە ناڤ ئاخا سووریێ و خوە بۆ هەر ئەگەرەکێ ژی بەرهەڤ کرینە، ئەو یەک ژی نیشا ددەت د سووریا نوو دا ئسرائیل دێ خوەدان رۆلەکا مەزن بیت.
ل گۆر باوەریا چاڤدێرێن سیاسی هەرچەندە تورکیا پشتەڤانیا تەحریر شام دکەت لێ تورکیا د رەوشا نها دا پێ باش نینە چو شەڕ د ناڤبەرا تەحریر شام و کوردان دا روو بدەت، چونکی ئەو یەک دێ بیتە ئەگەرێ ئاوارەبوونا ب ملیۆنان کەسێن دی ژ سووریێ بۆ تورکیا و ل ئالیێ دی بهێزبوونا تەحریر شام دشێت بۆ تورکیا د پاشەرۆژێ دا ببیتە جهێ مەترسیێ.
