رۆسیا: ئێرشێن توركیا بۆ سه‌ر ئاخا سووریێ د خزمه‌تا تیرۆرستان دایه
ب، سه‌رجان مه‌حمود:
ماریا زاخارۆڤا په‌یڤدارا وه‌زاره‌تا ده‌رڤه یا رۆسیا د داخۆیانیه‌كێ دا بۆ ئاژانسا سپۆتنیك راگه‌هاند كو ئه‌و به‌رده‌وام ل گه‌ل توركیا د ناڤ په‌یوه‌ندیان دانه و ئۆپه‌راسیۆنه‌كا سه‌ربازی یا توركیا ل باكورێ سووریێ نها د جهێ خوه دا نینه و دێ مه‌ترسیێن خوه یێن گه‌له‌ك مه‌زن ژی هه‌بن و گۆت: (ئه‌م بزاڤان دكه‌ین ئالۆزیێن ل سووریێ ب دیالۆگێ چاره‌سه‌ر بكه‌ین و د قۆناغه‌كا وه‌سا دا ئێرشێن توركیا بۆ سه‌ر باكورێ سووریێ د خزمه‌تا ئارامیا ده‌ڤه‌رێ دا نینه و ب ئۆپه‌راسیۆنێن سه‌ربازی ژی چو پرسه‌ك ناهێته چاره‌سه‌ر‌كرن، ئۆپه‌راسیۆنێن سه‌ربازی ب ته‌مامی د خزمه‌تا كۆمێن چه‌كدار دانه و تیرۆرست ژ ئێرشێن توركیا مفایێ وه‌ردگرن، ژ به‌ر كو هه‌ر ئالۆزیه‌كا نوو ل سووریێ روو بده‌ت دێ وه‌سا كه‌ت كو جاره‌كا دی داعش و رێكخستنێن دی یێن تیرۆرستی بهێز كه‌ڤن، ژ به‌ر هندێ ژی ئه‌م دبێژین كو هه‌ر ئۆپه‌راسیۆنه‌كا نوو یا توركیا دێ خزمه‌تا تیرۆرستان كه‌ت و دڤێت توركیا ئێرشێن خوه بده‌ته راگرتن).
په‌یڤدارا وه‌زاره‌تا ده‌رڤه یا رۆسیا هه‌روه‌سا راگه‌هاند ژی كو ئه‌و مه‌ترسیێن ل سه‌ر ئێمناهیا توركیا تێدگه‌هن لێ مه‌ترسی ب ئێرش و ئۆپه‌راسیۆنێن سه‌ربازی ژناڤ ناچن و گۆت: (ئارامیا توركیا و سووریێ ب هه‌ڤدو ڤه گرێدایه و هه‌كه مه‌ترسیه‌ك ل سه‌ر ئێمناهیا توركیا هه‌بیت به‌رپرسێن وی وه‌لاتی دشێن ل گه‌ل حوكمه‌تا سووریێ هه‌ڤدیتنان بكه‌ن و هه‌ر دو وه‌لات پێكڤه دشێن پرسێن ئێماهیێ د ناڤبه‌را خوه دا چاره‌سه‌ر بكه‌ن).
ناڤهاتیێ د دووماهیا ئاخڤتنا خوه دا ژی راگه‌هاند كو ئه‌و وه‌ك رۆسیا ئاماده‌نه به‌رپرسێن پایه بلندێن توركیا و سووریێ ل رۆسیا مێهڤان بكه‌ن و گۆت: (گه‌له‌ك ئاشكرایه هه‌ر شه‌ڕه‌كێ نوو ل سووریێ دێ بیته ئه‌گه‌رێ روودانا گه‌له‌ك ئالۆزیێن، مه به‌ری نها ژی گه‌له‌ك جاران دیار كریه كو دڤێت توركیا و سووریێ پێكڤه ده‌ست ب دانوستاندنان بكه‌ن و پرسێن هه‌ی د ناڤبه‌را خوه دا چاره‌سه‌ر بكه‌ن، ئه‌م وه‌كو رۆسیا به‌رهه‌ڤین هاریكاریا هه‌ر دو وه‌لاتان بكه‌ین دا كو ده‌ست ب قۆناغه‌كا نوو بكه‌ن).
