رێزگرتن
ئاشتی سالح
رێزگرتن ئێكە ژ مەزنترین و جوانترین بهایێن مرۆڤایەتیێ كو دناڤبەرا مرۆڤان دا دهێتە پەیڕەوكرن، رێز نە بتنێ پەیڤەكە دهێتە گۆتن، بەلكو رەفتار و كریارەكا بلندە كو نیشانا تێگەهشتن و رەوشەنبیریا مرۆڤی ددەت، د جڤاكێ مە یێ كوردەواری دا، رێزگرتن هەردەم وەك ستوینەكا سەرەكی یا ژیانێ هاتیە دیتن، چونكی بێی رێز چو پەیوەندیێن جڤاكی ناگرن و چو مروڤ نەشێن ب تەناهی ل گەل ئێك بژین.
هەكە ئەم ل ڕامانا رێزگرتنێ بنێرین، ئەم دێ بینین كو ئەو بتنێ سەردەریكرنا باش نینە ل گەل یێن ژ مە مەزنتر، بەلكو رێزگرتن هەمی تەخ و چینێن جڤاكی دگریتە خۆ، رێزگرتن ل زارۆكان، ل هەڤال و دوستان، هەڤژینان و حەتا رێزگرتن ل وان كەسێن كو د بیر و بۆچوونان دا ژی ل گەل مە جودان. مرۆڤێ خودان رێز ئەو كەسە یێ كو دشێت ب سینگەكێ بەرفرەه گوه ل بەرامبەرێ خۆ بگریت و هزرێن وان ب كێمی نەبینیت. ئەڤە دبیەتە ئەگەرێ هندێ كو باوەری و حەزژێكرن دناڤبەرا خەلكی دا زێدە ببیت.
هەروەسا، رێزگرتن ل دایك و بابان و مەزنێن خێزانێ ئەركەكێ ئەخلاقی و ئایینی یێ مەزنە، چنكو دایك و باب ئەو كەسن یێن كو ژیێ خۆ پێشكێشی مە كری، ژبەر هندێ رێزگرتن ل وان نیشانا وەفاداریێ یە، لایەنەكێ دی یێ گرنگ، رێزگرتنا مرۆڤی یە ژ بۆ خۆ، كەسێ كو رێزێ ل خۆ نەگریت، نەشێت رێزێ ل كەسێن دی ژی بگریت و پاراستنا كەرامەتا خۆ و دووركەفتن ژ كارێن نزم، پشكەكا سەرەكی یا رێزگرتنێ یە و بازنەیێ رێزگرتنێ دڤێت بەرفرەهتر لێ بهێت و ژینگەهێ و یاسایێ ژی بگریتە خۆ،. دەمێ ئەم رێزێ ل سروشتی دگرین و پاراستنا پاقژیا باژێرێ خۆ دكەین، ئەڤە ژی جۆرەكێ بلند یێ رێزگرتنێ یە ل مافێ گشتی، هەروەسا پێگیربوون ب یاسا و رێسایێن جڤاكی نیشا ددەت كو مرۆڤەكێ ب بەرپرسە و رێزێ ل مافێن كەسێن دی دگریت.