رێكا سەرەكی یا ئالۆكا – بەدریك دهێتە نووژەنكرن
دلۆڤان ئاكرەیی
رێڤەبەرێ سەخبێری و پاراستنا رێك و پران ل پارێزگەها دهۆكێ دیاركر، رێڤەبەریا وان ژمارەكا زۆر یا رێكێن سەرەكی و لاوەكی و گوندان چاككرینە و كۆمەكا كارێن چاككرنێ ل چەندین تەوەرێن جودا دا ل پارێزگەها دهۆكێ جێبجێكرینە.
ئەندازیار حازم عومەر تاهر، رێڤەبەرێ سەخبێری و پاراستنا رێك و پران ل دهۆكێ بۆ رۆژنامەیا (ئەڤرۆ) گۆت: رێڤەبەریا وان كار د سەخبێركرنا رێكا سەرەكی یا ئالۆكا – بەدریك ب كۆنكرێتی سایدێ چوونێ، ب بكارئینانا 816 تەنێن قیرێ بۆ پانتاییا 4,712 مەترێن دوجا ئەنجام دایە و كار ل سەر سەخبێركرنا رێكا سەرەكی یا بەدریك بۆ ئالۆكا سایدێ هاتنێ، ب بكارئینانا 714 تەنێن قیرێ بۆ پانتاییا 5,000 مەترێن دوجا كرینە. هەروەسا سەخبێركرنا پارچێن تێكچووی یێن جادەیان ب ترومبێلا سەخبێریێ ب بكارئینانا 80 تەنێن قێری بۆ پانتاییا 506 مەترێن دوجا ئەنجام دایە، و بەرهەمهێنانا قێری ل كارگەها ئەسفەلتی ل كواشێ بەردەوامە بۆ دابینكرنا تێكەلا قێری بۆ تیمێن سەخبێركرنێ، كو د دەمێ 10 رۆژان دا، كارگەهێ شیایە 1,610 تەنێن قێری بەرهەم بهینیت.
زێدەبارێ ڤێ چەندێ، پرۆژەیێ چاككرنا رێكا دهۆك بۆ ئامێدیێ نێزیك سیلاڤێ، كو ژبەر ئەگەرێ هۆریانی (داڕمانێ) پارچەیەكا وێ تێكچووبوو، دهێتە سەخبێركرن؛ كـو ئەڤ پارچە دكەڤیتە د سنوورێ باژێرڤانیا ئامێدیێ دا و ئەڤ كارە ب هەماهنگی دگەل رێڤەبەریا گشتی یا رێكان و پران و دەڤەرداریا ئامێدیێ دهێتە ئەنجامدان. درێژاهیا وێ رێكێ 150 مەتر، فەرهیا وێ 50 مەتر و كویراهیا وێ 20 مەترن، و ئەڤ كارە ل قۆناغێن خۆ یێن دویماهییێ دایە.
هەروەسا د بوارێ سەخبێریكرن و پاقژكرنا رێكێن بیستانێن گوندان دا، ل كەرتێ مانگێشكێ ل گوندێن بەندا، ئەلكیشكێ و گەربەراسكێ و ل كەرتێ بامەرنێ هەتا هەسن پیركا بۆ دوریانا ئەرزێ كار ل سەر سەخبێریكرنا رێكێن وان هاتینە كرن.
