رێكخراوه‌ك ب گوژمێ حه‌فت ملیۆن دۆلاران هاریكاریا ساخله‌میا دهۆكێ دكه‌ت
دهۆك، له‌زگین جوقی:
رێڤه‌به‌رێ گشتی یێ ساخله‌میا پارێزگه‌ها دهۆكێ دیار كر، دوهی 16/10/2021ێ رێكخراوا MAG یا نێڤده‌وله‌تی ب گوژمێ پتر ژ حه‌فت ملیۆن دۆلاران ده‌رمان و پێدڤیێن نۆشداری بۆ ساخله‌میا دهۆكێ دابینكرن.
د. ئه‌فراسیاب موسا، رێڤه‌به‌رێ گشتی یێ ساخله‌میا پارێزگه‌ها دهۆكێ بۆ رۆژناما ئه‌ڤرۆ گۆت: “رێكخراوه‌كا نه‌رویجی هاریكاریێن نۆشداری پێشكێشی ساخله‌میا پارێزگه‌ها دهۆكێ كرن، ئه‌ڤ ساله ئه‌ڤه چه‌ندین جاره وه‌لاتێ نه‌رویج هاریكاریا ساخله‌میا دهۆكێ دكه‌ت، ب تایبه‌تی ژی د وارێ دابینكرنا ده‌رمان و پیدڤیێن نۆشداری دا، هه‌ر د ڤی چارچوڤه‌ی دا، دوهی رێكخراوه‌كا نه‌رویجی ده‌رمانێن نه‌خۆشیا په‌نجه‌شێرێ و نه‌خۆشیا شه‌كرێ و ده‌رمانێن نه‌خۆشیێن ده‌روونی و چه‌ندین جۆرێن دی یێن ده‌رمانان پێشكێشی ساخله‌میا پارێزگه‌ها دهۆكێ كرن”.
رێڤه‌به‌رێ گشتی یێ ساخله‌میا پارێزگه‌ها دهۆكێ ئاشكرا ژی كر كو رێكخراوا MAG دێ هه‌تا دووماهیا ئه‌ڤ ساله هاریكاریا ساخله‌میا دهۆكێ كه‌ت، هه‌تا نوكه هزار و 500 ئامیرێن گوهلێبوونێ ژی پێشكێشی ساخله‌میا دهۆكێ كرینه.
رێكخراوا MAG یا نێڤده‌وله‌تی یا نه‌رویجی د بیاڤێ كه‌رتێ ساخله‌میێ دا كار دكه‌ت، ل سالا 2017ێ وه‌ره ل هه‌رێما كوردستانێ كار دكه‌ت و د ڤی چارچوڤه‌ی دا، دوهی رێكخراوا ناڤهاتی ب گوژمێ پتر ژ حه‌فت ملیۆن دۆلاران ده‌رمان و پێدڤین نۆشداری پێشكێشی ساخله‌میا دهۆكێ كرن.
