رێكخستنا مافێن مرۆڤی: د ناڤ دو مه‌هان دا نێزیكی سه‌د زارۆ ل ئیرانێ هاتینه كوشتن
ئه‌ڤرۆ:
رێكخستنا مافێن مرۆڤی یا ئیرانێ راگه‌هاند كو د خوه‌نیشادانێن دو مه‌هێن بۆری ل ئیرانێ دا نێزیكی ٥٠٠ كه‌سان هاتینه كوشتن كو ژ وان سه‌د كه‌س زارۆنه و مخابن هه‌تا نها د ئاستێ نێڤده‌وله‌تی دا وه‌كو پێدڤی به‌رسڤا ئیرانێ نه‌هاتیه دان.
رێكخستنا مافێن مرۆڤی یا ئیرانێ ل ئۆرۆپا راگه‌هاند كو توندوتیژیا ل دژی خوه‌نیشاده‌ران ل ئیرانێ رۆژ ب رۆژێ زێده‌تر لێ دهێت ب تایبه‌تی ژی ل كوردستانێ و به‌لوچستانێ هێزێن ئێمناهیێ ب ره‌نگه‌كێ راسته‌وخوه ته‌قه ل خوه‌نیشاده‌ران دكه‌ن و ل ده‌ڤه‌رێن دی یێن ئیرانێ ژی توندوتیژی ل دژی خوه‌نیشاده‌ران زێده‌تر لێ هاتیه و ل گۆر ئامارێن ل به‌ر ده‌ست هه‌تا نها نێزیكی ٥٠٠ خوه‌نیشاده‌ران ل هه‌موو ئیرانێ هاتینه كوشتن.
رێكخستنا مافێن مرۆڤی یا ئیرانێ ئه‌و یه‌ك ژی دیار كریه كو د ل گۆر ئامارێن ل به‌ر ده‌ستێ وان سه‌د زارۆ ژی ب ده‌ستێ هێزێن ئێمناهیێ ل ئیرانێ هاتینه كوشتن و چاره‌نڤیسێ ب سه‌دان كه‌سان ژی هه‌تا نها دیار نینه، چونكی هێزێن ئێمناهیێ ناهێلن راستی بۆ رایا گشتی بهێنه ئاشكرا كرن و ژ به‌ر هندێ ژی هه‌تا ره‌وش ئاسایی نه‌بیت مرۆڤ نه‌شێت ئاماره‌كا دروست بۆ رایا گشتی ئاشكرا بكه‌ت.
ل ئالیێ دی سه‌رۆك كۆمارێ به‌رێ یێ ئیرانێ محه‌مه‌د خاته‌می ژی به‌ری دو رۆژان بۆ ده‌زگه‌هێن راگه‌هاندنا ئیرانێ دیار كر كو ره‌وشا ناڤخوه‌یی گه‌له‌ك خرابه و دڤێت ده‌وله‌ت بله‌ز پێداچوونێ د سیاسه‌تا خوه دا بكه‌ت، چونكی گه‌له‌ك مه‌ترسی ل سه‌ر ئیرانێ هه‌نه و ره‌نگه ئیران تووشی شه‌ڕه‌كێ ناڤخوه‌یی ببیت، ژ به‌ر هندێ ژی باشتره كو ده‌وله‌ت پێداچوونێ د سیاسه‌تا خوه دا بكه‌ت، دڤێت ده‌وله‌ت هنده‌ك ژ داخوازیێن ره‌وا یێن خوه‌نیشاده‌ران ژی قه‌بوول بكه‌ت، چونكی هنده‌ك ژ وان داخوازیێن د جهێ خوه دانه و هه‌كه ده‌وله‌ت وان بجه بینیت ره‌نگه تا راده‌یه‌كێ ره‌وش ئاسایی ببیت.
ئه‌و یه‌ك د ده‌مه‌كێ دایه كو دو رۆژان به‌ری نها ل به‌لوچستانێ ژی ب هزاران وه‌لاتی پشته‌ڤانیا خوه بۆ كوردان دیار كرن و راگه‌هاندن كو كوردستان تنێ نینه و به‌لوچستان ژی پشته‌ڤانه، هێزێن ئێمناهیێ ژی ته‌قه ل خوه‌نیشاده‌ران كرن و د ئه‌نجام دا گه‌له‌ك كه‌س بوونه قوربانی.
چاڤدێره‌كێ سیاسی ل رۆژهه‌لاتێ كوردستانێ ژی بۆ ئه‌ڤرۆ دیار كر كو نها ره‌وشا باژێرێن رۆژهه‌لاتێ كوردستانێ گه‌له‌ك خرابه، ب هزاران هێزێن ئێمناهیێ ل باژێرێن وه‌كو مهاباد، جوانرۆ، خانێ، بۆكان، سه‌قز، سنه، كرماشان و گه‌له‌ك باژێرێن دی بجه بووینه و رێ ناده‌ن خه‌لك خوه‌نیشادانان بكه‌ن و هه‌تا نها ب سه‌دان كه‌س ژی هاتینه ده‌سته‌سه‌ر كرن و چاره‌نڤیسێ ب ده‌هان كه‌سان ژی دیار نینه.
سه‌باره‌ت ب ئالۆزیێن ل ئیرانێ ئیلهام عه‌لیێڤ سه‌رۆك كۆمارێ ئازه‌ربایجانێ ژی راگه‌هاند كو هه‌لوه‌ستێ ئیرانێ ل هه‌مبه‌ر وه‌لاتێ وی و خه‌لكێ ئازه‌ری ل ئیرانێ گه‌له‌ك خرابه و ئازه‌ربایجان ل هه‌مبه‌ر ره‌وشا نها بێده‌نگ نامینیت و دێ ب هه‌موو ره‌نگه‌كێ پشته‌ڤانیێ ل ئازه‌ریێن ل ئیرانێ كه‌ت و دڤێت به‌رپرسێن ئیرانێ ژی سیاسه‌تا خوه یا خراب ل هه‌مبه‌ر گه‌لێ ئازه‌ری بگوهۆرن.
چاڤدێرێن سیاسی ژی دیار دكه‌ن كو به‌رپرسێن ئیرانێ نها سیاسه‌ته‌كا جودا برێڤه دبه‌ن، ل ته‌هرانێ و باژێرێن دی یێن مه‌زن كو پرانیا ئاكنجیێن وان فارسن هێزێن ئیرانێ ستراتیژیه‌كا جودا برێڤه دبه‌ن و نها وه‌كو به‌رێ ل هه‌مبه‌ر خه‌لكی توند نینن، ئازادیه‌كا باش داینه كچان و گه‌نجان دا كو ئه‌و خوه‌نیشادانان نه‌كه‌ن و ل ئالیێ دی هێزێن ئێمناهیێ ب هه‌موو شیانێن خوه ل كوردستانێ و به‌لوچستانێ ژی ئێرشی خه‌لكی دكه‌ن و دخوازن خه‌لكی سه‌ركوت بكه‌ن، سیاسه‌تا ئیرانێ هه‌تا نها تا راده‌یه‌كێ یا سه‌ركه‌فتی ژی بوویه، چونكی ل ته‌هرانێ و باژێرێن دی یێن مه‌زن فارس نها خوه‌نیشادانان ناكه‌ن و ل هه‌مبه‌ر كوشتنا كوردان و به‌لوچیان ژی بێده‌نگن، ئه‌و یه‌ك ژی نیشا دده‌ت كو ئالۆزیێن نها دێ بۆ ده‌مه‌كێ درێژ ژی به‌رده‌وام بن.
ل ئالیێ دی وه‌لاتیێن ئیرانی ل ئه‌مریكا و ئۆرۆپا ژی خوه بۆ خوه‌نیشادانێن به‌رفره‌ه به‌رهه‌ڤ دكه‌ن و دهێته چاڤه‌رێكرن كو خوه‌نیشادان ل ئه‌مریكا و گه‌له‌ك وه‌لاتێن ئۆرۆپا ل دژی ئیرانێ برێڤه بچن.
