رێژا كه‌سكاتیێ ل هه‌رێما كوردستانێ 12%ێ‌ یه‌

رێژا كه‌سكاتیێ ل هه‌رێما كوردستانێ 12%ێ‌ یه‌

21

هه‌ولێر، سولین سلێمان

سه‌روكێ ده‌سته‌یا پاراستن و چاككرنا ژینگه‌هێ دیار كر، ئه‌م وه‌ك ده‌سته‌یا ژینگه‌هێ ل دووڤ ڤه‌كۆلینێن مه‌ رێژا كه‌سكاتیێ ل هه‌رێما كوردستانێ ژ سه‌دێ 12.4، هه‌روه‌سا ئه‌م بزاڤێ‌ دكه‌ین هه‌ر پروژه‌كێ‌ موله‌تێ وه‌ربگریت پێدڤیه‌ ژ سه‌دێ ٢٥ كه‌سكاتی هه‌بیت و ئه‌وێن به‌ری نۆكه‌ ژی ب ڤی شێوه‌ی نه‌بووینه‌. مه‌ پروسه‌ك دێ هه‌بیت ب ناڤێ كه‌سكاتیێ، چونكی هه‌ر ب ڤی پرۆژه‌ی ل سالا ٢٠٢١ مه‌ شیایه‌ ٦٠٠ هزار مه‌تر كه‌رتێن تایبه‌ت كه‌سكاتی ژ بۆ وانا دابین كریه‌ ل هه‌ر باخچه‌كێ دناڤندا باژێری ژ سه‌دێ ١٩ كه‌سكاتی دابین كریه‌ كۆ ئه‌ڤه‌ ژی رێژه‌یه‌كا باشه‌.

 

عه‌بدلره‌حمان سدیق سه‌رۆكێ ده‌سته‌یا پاراستن و چاكرنا ژینگه‌هێ ژ بۆ رۆژناما ئه‌ڤرۆ دیاركر، ئه‌م هه‌ر دو هه‌یڤا جاره‌كێ كومبونێ ئه‌نجام دده‌ین دگه‌ل ١٤ وه‌زاره‌تا، یا هه‌ر وه‌زاره‌ته‌كا دی تێدا ئه‌م به‌حسا وان پێدڤیا دكه‌ین ئه‌وێن سه‌ر داخازیا خه‌لكی دهێنه‌ ئه‌نجام دان، لێ پێدڤیه‌ ئه‌ف پێشكه‌فتن سه‌ر حسابا ژینگه‌هێ نه‌بیت و دڤێت ئه‌ڤ پرۆژه‌ دوستێن ژینگه‌هێ بن.

هێشتا گۆت: مه‌ دگه‌ل وه‌زاره‌تا كاره‌بێ ژی كۆمبون كر ده‌ربارێ وان كارێن د پیڤا ژینگه‌هێ دكه‌ن، ل سالا بوریدا ٣ هزار و ٥٠٠ مێگاوات كاره‌ب ل وزا پاقژ ژ تیشكا رۆژێ به‌رهه‌ف كرینه‌، ئه‌م ڤان زانیاریان ب هه‌ر ١٤ وه‌زاره‌تا دده‌ین ئه‌و ژی بۆ خوه‌ چالاكیێن خوه‌ ژ بۆ مه‌ رێتكه‌ن.

عه‌بدلره‌حمان سدیق گۆت ژی: هه‌ر پرۆژه‌كێ‌ ژ ده‌سپێكی دڤێی موله‌تێ ل ده‌سته‌یا وه‌به‌رهێنانێ یان ژی ل پیشه‌سازیێ وه‌ربگریت پشتی وێ زه‌ڤی دێ بۆ هێته‌ ته‌رخان كرن و پاشی ژ لایێ وه‌زاره‌تا كشوكالێ رێك دێ پێ هێته‌ دان، ئیدی ژلایێ مه‌ڤه‌ وه‌ك ده‌سته‌یا ژینگه‌هێ ل دۆر یاسا 1 سالا 2013 دێ رێك پێ هێته‌ دان پروژا خوه‌ ئه‌نجام بده‌ت، چونكی مه‌ نێزیكی ١٢ خال هه‌نه‌ پێدڤیه‌ هه‌ر كه‌سه‌كێ خودان پروژه‌ ڤان خالا بجهبینیت، چونكی ئه‌گه‌ر ل ڤان خالا بجهنه‌ئینیت چێدبیت ژ لایێ دادگه‌هێ ب دانا پاره‌ی بهێته‌ سزادان.

ئاماژه‌ ب وێ چه‌ندێ ژی كر و گۆت: مه‌ زۆر ده‌رچویێن پشكا ژینگه‌هێ هه‌نه‌ ل دۆر وێ كۆ چار زانكۆ ل هه‌رێما كوردستانێ هه‌نه‌ كۆ ئه‌ڤ پشكه‌ لێ هه‌بن، مه‌ هزر ژ ڤێ چه‌ندێ كر كا چاوا بشێیێن كاره‌كی ژ بۆ وانا ببینین، پشتی ڤه‌كولێنێن مه‌ ئه‌ڤ پروژێن ئه‌م وه‌كی ده‌سته‌یا ژینگه‌هێ رێكێ ل سه‌ر دده‌ین سه‌رمایه‌كا زۆرا مه‌زنه‌، یا ئێكێ ئه‌م دشێین كاری ژ بۆ ده‌رچوویێن زانكۆ په‌یمانگه‌هان ببینین كۆ بشێن سه‌رپه‌رشتا ڤان پرۆژا بكه‌ین، ده‌رچوویێن ڤێ پشكێ ل هه‌ر چار پارێزگه‌ها دشێت فورمێن خوه‌ پێشكێشی مه‌ بكه‌ت و ئه‌م ل دووڤ وانا كاره‌كی ژ بۆ دبینین.

گۆتژی: د پیڤا هوشیاریێدا ده‌سته‌یا ژینگه‌هێ فه‌رمانگه‌ك هه‌یه‌ ب ناڤێ هوشیاریا ژینگه‌ه و راگه‌هاندن ب ڤێ رێكی ئه‌م پتر هوشیاریا به‌لاڤ دكه‌ین ئه‌ڤ ساله‌ مه‌ شیایه‌ هوشیاریا ب هه‌می قوتابخانان و ناڤه‌ندێن خواندنی بده‌ین كۆ گرنگیێ ب كه‌سكاتیا جهێن خوه‌ بده‌ن بپارێزن، چونكی ژینگه‌ه هه‌می تشته‌ ژ بۆ مه‌ پێدڤیه‌ به‌رده‌وام ژلایێ مه‌ هه‌میا بهێته‌ پاراستن.

کۆمێنتا تە