رێژەیا بێكاریێ ل هەرێما كوردستانێ دێ هێتە دیاركرن
هەولێر، قائید میرۆ:
بریكارێ وەزارەتا پلاندانانێ دیاركر، ئەو مژوولی بەرهەڤیێن دوماهیێ نە بۆ دەستپێكرنا رۆپیڤانەكێ ل دۆر هێزا كاری ل هەرێما كوردستانێ و دبێژیت: رێژەیا بێكاریێ تێدا دێ هێتە ئاشكراكرن و مەها داهاتی دەست ب رۆپیڤانێ دێ هێتە كرن.
سیروان محەمەد، بریكارێ وەزارەتا پلاندانانێ ل حوكمەتا هەرێما كوردستانێ بۆ رۆژناما ئەڤرۆ گۆت: «دوماهی رۆپیڤان ل دۆر رێژەیا بێكاریێ ل سالا 2021 هاتیە ب رێڤەبرن و تێدا رێژەیا بێكاریێ و هێزا كاری بۆ مە دیاربوویە، نوكە وەزارەتا پلاندانانێ ل گەل دەستەیا ئامارێ و رێكخراوا كار یا جیهانی، یێ بەرهەڤیان دكەین، بۆ ئەنجامدانا رۆپیڤانەكا دی، مەرەم ژ ئەڤێ رۆپیڤانێ ئەوە دوبارە رێژەیا بێكاریێ ل هەرێما كوردستانێ دیار بكەین».
سیروان محەمەد گۆت ژی: «بەرهەڤی گەهشتینە قووناغا دوماهیێ و ئەگەر چو ئاستەنگ نەبن، دوماهیا مەها داهاتی دێ دەست ب ئەنجامدانا رۆپیڤانێ كەین، بێگومان ئەم كار لسەر پێشبینیان ناكەین، بەلكو وەزارەتا پلاندانانێ و دەستەیا گشتیا ئامارا هەرێما كوردستانێ بەردەوام ب رێیا رۆپیڤان و رێكێن زانستی كار بۆ دیاركرنا رێژەیا هەموو كارەكی دكەن، ئێك ژ وان: رێژەیا بێكاریێ یە ل هەرێما كوردستانێ».
