رێژەیا تاوانان زێدەبوویە
ئه‌ڤرۆ نيوز:
دەستەیا گشتیا مافێن مرۆڤی ل ھەرێما کوردستانێ ئاماژە ب ڤێ چەندێ دکەت، کو رێژەیا تاوان و توندوتیژیان ل سەرانسەری ھەرێما کوردستانێ زێدە بوویە و پێشبینی دکەن ھێشتا زێدە ببیت و ببیتە مەترسیەکا مەزن بۆ سەر جڤاکێ کوردستانێ، ھەروەسا دیار کریە، ئەگەرێ سەرەکیێ زێدەبوونا تاوانان و توندوتیژیێ رەوشا ئابووریا وەلاتیانە و ئەڤ قەیرانەیە کو عیراقێ ب سەر ھەرێما کوردستانێ دا سەپاندی.
محەمەد گومەشینی، پەیڤدارێ دەستەیا سەربخۆیا مافێن مرۆڤی ل ھەرێما کوردستانێ بۆ رۆژناما ئەڤرۆ گۆت “مخابن ل گۆر ئامارا ژلایێ دەستەیا مافێن مرۆڤی ڤە ھاتیە کۆمکرن رێژەیا ئەنجامدانا تاوان ل ھەرێما کوردستانێ ل چاڤ سالا بۆری زۆر زێدە کریە و جھێ مەترسیێ یە، چونکە ئامارێن شەش ھەیڤێن ئێکێ یێن سالا بۆری و شەش ھەیڤێن ئەڤ سالە مە ئیناینە بەرامبەر ئێک دەرکەفتیە رێژەیا تەلاقێ ل ھەرێما کوردستانێ زۆر زێدە بوویە و جھێ مەترسیێ یە بۆ سەر جڤاکێ مە”.
پەیڤدارێ دەستەیا سەربخۆیا مافێن مرۆڤی ل ھەرێما کوردستانێ خویا ژی کر کو ب تنێ ل پارێزگەھا ھەولێرێ 300 حالەتێن تەلاقێ پتری سالا بۆری ھاتینە تۆمارکرن و ل سلێمانی و دھۆکێ ب ھەمان شێوە زێدە کریە، ھەروەسا رێژەیا کوشتن و خوەکوشتن و توندوتیژیێن ھەمبەر ژنان زێدە بووینە، تاوانێن دی وەکی دەستدرێژی و دەستدرێژیا سێکسی و قوتان و شەڕ ھەر زۆر زێدە بووینە، بڕیارە ئامارەکا دروست یا ئەڤ سالە بھێتە کۆمکرن.
ھەروەسا گومەشینی ئاشکرا کر ئەگەرێن زێدەبوونا تاوان و توندوتیژیان بۆ چەند خالەکان ڤەدگەڕیت، بەس ئەگەرێ سەرەکی ئەڤ قەیرانا دارایی و ئالۆزیەنە کو نوکە ھەرێما کوردستانێ تێدا دەرباز دبیت، گیروبوونا مووچێ فەرمانبەران و نەبوونا داھاتێ ژیانێ کاریگەری کریە ل سەر ژیانا وەلاتیان و پالدەرەک بووینە بۆ ئەنجامدانا تاوان و توندوتیژیان، ئەگەر رەوش یا ھوسا بیت و قەیرانا دارایی یا بەردەوام بیت و گۆت “مخابن پێشبینیێ دکەین بۆ سەرێ سالێ رێژەیا تاوانان زێدەتر لێ بھێت و حالەتێن نەخۆش بھێنە تۆمارکرن، چونکو چەند ژیانا وەلاتیان خۆشتر بیت و رەوشا ئابووری گەشە بکەت دێ د ھەمبەر دا توندوتیژی و ئاریشە کێمتر بن، ئەگەر بھێت و رەوشا ئابووری باشتر بیت، ئەڤە بێگومان دێ رێژەیا تاوان کمێتر بیت”.
