رێژەیا كەسكاتیێ ل دهۆكێ نێزیكی ١٨٪ یە
دلۆڤان ئاكرەیی:
بەرپرسێ ڕاگەهاندنا باژێرڤانیا دهۆكێ دیار كر، ل ژێر رۆناهیا ڕاسپاردەیێن مەسرور بارزانی، سەرۆكێ حوكمەتا هەرێما كوردستانێ بۆ پاراستنا ژینگەهێ و بەرفرەهكرنا ڕووبەرێ كەسكاتیێ، سەرۆكایەتییا باژێرڤانیا دهۆكێ كار ل سەر جێبەجێكرنا چەندین پڕۆژەیێن ستراتیژی دكەت، د وێ چارچووڤەیێ دا مەزنترین پارك لسەر ئاستێ پارێزگەهێ و 10 پاركێن دی ل ناڤ گەڕەكاندا د جێبەجێكرنێ دانە.
شێروان حەسەن، بەرپرسێ ڕاگەهاندنا باژێرڤانیا دهۆكێ بۆ رۆژنامەیا (ئەڤرۆ) گۆت: باژێرڤانیا دهۆكێ دەست ب جێبەجێكرنا مەزنترین پڕۆژەیێ كەسكاتیێ ب ناڤێ (پاركا ئالۆكا) كریە، ل سەر ڕووبەرێ ملیۆنەك و 575 هزار مەترێن دووجا دهێتە دروستكرن. د هەمان دەمدا دگەل ڤێ پڕۆژەیێ ستراتیژی، 10 پاركێن نوو ل ناڤ گەڕەكێن جوداجودا دهێنە دروستكرن، زێدەباری بەردەوامبوونا كەسككرنا ناڤەڕاست و دەوروبەرێن جادەیێن گشتی.
پشت راستی ژی دا كو ب پشتەڤانیا كابینەیا نەهێ یا حوكمەتا هەرێما كوردستانێ، سیمایێ باژێری دێ كەسكتر بیت و گۆت: ب تەمامبوونا ڤان پڕۆژەیان، دێ ڕێژەیا كەسكاتیێ ل باژێرێ دهۆكێ بۆ 18% بلند بیت، ئەڤە ژی د دەمەكێ دایە كو سالا بۆری ڕێژە تنێ 13% بوو.
بەرپرسێ ڕاگەهاندنا باژێرڤانیا دهۆكێ ئاماژە ب ژێرخانا كەسكاتیێ یا سنووری ژی كر و ئاشكراكر، نوكە ل سنوورێ باژێرڤانیا دهۆكێ 12 پاركێن مەزنێن گشتی و پتر لە 148 پاركێن بچووك ل ناڤ گەڕەكاندا هەنە، دگەل ڕووبەرەكێ مەزن یێ كەسكاتیێ ل سەر جادەیان كو ئەڤە هەمی ژی پشكەكێن ژ پلانا بەردەواما باژێرڤانیێ بۆ باشتركرنا ژینگەی و ڕووبڕووبوونا گۆڕانا كەشوهەوای و جوانكرنا سیمایێ باژێرێ دهۆكێ.
