رێڤه‌به‌رێ گشتیێ ژێده‌رێن ئاڤێ: ره‌نگه 60% ئاڤا سه‌ر ئه‌رد ل هه‌رێمێ نه‌مینیت
هه‌ولێر، قائید میرۆ:
به‌رپرسه‌كێ حوكمه‌تا هه‌رێما كوردستانێ ئاشكرا كر، مه‌ترسی یا هه‌ی ب ئه‌گه‌رێ گوهۆڕینا سه‌قایێ جیهانێ ل داهاتی 60%ێ ئاڤا سه‌ر ئه‌رد كێم ببیت یان ژی نه‌مینیت و دبێژیت: پێدڤیه ئه‌م خوه بۆ له‌هیێن وێران كه‌ر به‌رهه‌ڤ بكه‌ین.
دكتۆر كاروان هه‌ورامی، رێڤه‌به‌رێ گشتیێ ژێده‌رێن ئاڤێ ل هه‌رێما كوردستانێ بۆ رۆژناما ئه‌ڤرۆ دیار كر، گوهۆڕین كه‌فتینه سه‌قایێ جیهانێ و ده‌ڤه‌ر یا به‌ره‌ف هشكاتیێ دچیت، له‌وڕا پێدڤیه به‌رهه‌ڤی بهێنه كرن و مه‌ترسیا كێمبوونا ئاڤا سه‌ر ئه‌رد یا هه‌ی و گۆت: “ئه‌و بارانێن به‌رێ د ده‌مێ هه‌یڤه‌كێ دبارین نوكه د ده‌مێ دو رۆژان دا دبارن، له‌و ژبلی په‌یدابوونا له‌هیان، ناچنه د ناڤا ئه‌ردی دا، ئه‌ڤێ چه‌ندێ ژی زیانێن مه‌زن هه‌نه و چو مفا بۆ ئاڤا بن ئه‌رد نینه”.
دكتۆر كاروان هه‌ورامی گۆتژی: “ل گوره‌ی ڤه‌كۆلینێن هاتینه كرن، ره‌نگه د داهاتی دا 60%ێ ئاڤا سه‌ر ئه‌ردی ل هه‌رێما كوردستانێ به‌ره‌ف كێمبوون و نه‌مانێ بچیت، ئه‌ز باوه‌رم دڤێت ئه‌م هه‌موو خوه ژ بۆی له‌هیێن وێرانكه‌ر و هشكه‌سالیه‌كا خراپ به‌رهه‌ڤ بكه‌ین، گوهۆڕینا سه‌قای یا جیهانیه و گرێدایی چو لایه‌نه‌كی نینه، هه‌ر وه‌لاته‌كی ب شێوه‌یه‌كی گوهۆڕین لێ په‌یدا دبن”.
