رێککەفتنا ئیرانێ و سعوودیێ نیشانا گوهۆڕینێن مەزنە ل دەڤەرێ
ئەڤرۆ
چاڤدێرێن سیاسی دیار دکەن رێککەفتنا ئیرانێ و سعوودیێ دێ کاریگەریا خۆ ل هەموو رۆژهەلاتا ناڤین کەت، چونکی رۆسیا و چینێ رۆلەک کاریگەر بۆ رێککەفتنەکا وەسا گێراینە و ئەو یەک ژی نیشا ددەت دێ گوهۆڕینێن مەزن ل رۆژهەلاتا ناڤین روو دەن.
دەزگەهێن راگەهاندنا ئیرانێ دوهی بەلاڤکرن شاندەکێ سعوودیێ ل تەهرانێ یە و هەر دو وەلاتان نها دەست ب قۆناغەکا نوو کرینە، سعوودیێ و ئیرانێ بریار داینە پەیوەندیێن خۆ ئاسایی بکەن و ژ بۆ هندێ ژی نها هەر دو وەلات بەرهەڤیان دکەن بالیۆزخانێن خۆ ڤەکەن، ئەو یەک ژی د‌هێتە رامانا دەستپێکرنا قۆناغەکا نوو د ناڤبەرا هەر دو وەلاتان دا.
چاڤدێرێن سیاسی ژی دیار دکەن، رێککەفتنا ئیرانێ و سعوودیێ دێ کاریگەریا خۆ ل هەموو هەڤسەنگیێن سیاسی ل دەڤەرێ کەت، چونکی سعوودیێ ژی نها ناکۆکیێن مەزن ل گەل ئەمریکا هەنە، ژ بەر هندێ ژی دەستهەلاتا نها یا سعوودیێ خۆ نێزیکی چینێ و رۆسیا دکەت، رێککەفتنا ئیرانێ و سعوودیێ ژی ب رێیا هەر دو وەلاتێن مەزن ئانکۆ رۆسیا و چینێ هاتە کرن، ئەو یەک ژی نیشا ددەت دێ گوهۆڕینێن گەلەک مەزن ل دەڤەرێ روو دەن، چونکی چین و سعوودیێ دخوازن رۆلێ ئەمریکا ل دەڤەرێ کێم بکەن و هەر دو وەلات نها پتر ژ هەر دەمەکێ پێکڤە کار دکەن، ژ بەر هندێ ژی ب رێککەفتنا ئیرانێ و چینێ دێ گەلەک گوهۆڕینێن مەزن روو دەن، چونکی وەلاتێن رۆژهەلاتا ناڤین ب تایبەتی ژی یێن هەڤپەیمانێن ئەمریکا دێ نەچار بن پێداچوونێ د هەلوەستێ خۆ دا بکەن، چونکی چو وەلاتەکێ نەڤێت مەترسی ل سەر بەرژەوەندیێن وێ دروست ببن.
ل گۆر باوەریا چاڤدێرێن سیاسی رۆسیا و چین دخوازن ئێدی رۆل و کاریگەریا سیاسەتا ئەمریکا ل رۆژهەلاتا ناڤین و ئاسیا کێم بکەن، ژ بەر هندێ ژی حەفتیا بۆری سەرۆکێ رۆسیا راگەهاند، دەم یێ هاتی ئەو دەست ب ئاڤاکرنا هەڤپەیمانیەکا مەزن و بهێز ل دژی ئەمریکا و وەلاتێن رۆژئاڤایی بکەن، چونکی ئەمریکا و ناتۆ ئێدی بووینە مەترسی ل سەر گەلەک وەلاتان، ناتۆ بوویە مەترسیەکا گەلەک مەزن بۆ رۆسیا، چینێ و هندەک ژ وەلاتێن دی، ژ بەر هندێ ژی دڤێت هەڤپەیمانیەکا بهێز ل دژی ئەمریکا و ناتۆ بهێتە ئاڤاکرن.
ئەو یەک د دەمەکێ دایە، کو دوهی BBC د راپۆرتەکێ دا بەحسێ هندێ کر، رۆسیا و چین نها پتر ژ هەر دەمەکێ نێزیکی هەڤدو بووینە، وەلاتێن رۆژهەلاتا ناڤین ژی ژ بۆ پاراستنا بەرژەوەندیێن خۆ نها پتر ژ هەر دەمەکێ خۆ نێزیکی رۆسیا و چینێ دکەن، ئەو یەک بوویە جهێ دلگرانیا ئەمریکا و وەلاتێن دی یێن رۆژئاڤایی، لێ بۆ هەر کەسەکێ ئاشکرایە سەردەمەک نوو دەستپێکریە و دێ گوهۆڕینێن گەلەک مەزن ل رۆژهەلاتا ناڤین روو دەن، ئەو یەک ژی بێگومان دێ کاریگەریا خۆ ل هەموو جیهانێ کەت.
